SIFUNDVO 7

Lokushoko Akube Liciniso Kwetsembeke

Lukha 1:3

LOKUFANELE UKWENTE: Sebentisa bufakazi lobuliciniso kute usite labakulalele babe nesiphetfo lesikahle ngendzaba.

Sebentisa imitfombo leyetsenjwako. Kutsatse eVini laNkulunkulu lokukhulumako, futsi nakungenteka, lifundze ngalokucondzile. Nangabe ukhuluma ngalokushiwo yisayensi, umbiko wetindzaba, lokwenteka, noma lobunye bufakazi, hlola kusenesikhatsi kutsi lobo bufakazi buliciniso nekutsi abukaphelelwa sikhatsi.
Busebentise kahle bufakazi. Chaza imiBhalo ngendlela levumelana nendzaba letsetfwe kuyo, umlayeto lophelele loseBhayibhelini, netincwadzi letivela esisebentini “lesetsembekile nalesihlakaniphile.” (Mat. 24:45) Nawukhuluma ngebufakazi lobungekho eBhayibhelini, ungawushintji umcondvo wabo, noma bese usho lenye intfo leyehlukile kunaloko umbhali lebekafuna kukuchaza.

Ungenti indzaba ibe yinkhulu kunaloko lengiko. Caphela kutsi ungatikhandzi sewutsi “bantfu labanyenti” esikhundleni sekutsi “labanye bantfu,” “ngaso sonkhe sikhatsi” esikhundleni sekutsi “ngaletinye tikhatsi,” noma utsi “kutawenteka” esikhundleni sekutsi “kungenteka.”
Chaza kutsi lobufakazi bushoni. Nasewucedzile kufundza umbhalo noma kuveta bufakazi lobutsite, buta imibuto ngekuhlakanipha noma ufanekise leliphuzu kute usite labakulalele bafike kahle esiphetfweni.