Yini Leyenta Jesu Abitwe Ngekutsi YiNdvodzana YaNkulunkulu?

Lokushiwo liBhayibheli

LiBhayibheli lihlale libita Jesu ngekutsi “yiNdvodzana yaNkulunkulu.” (Johane 1:49) Emavi latsi iNdvodzana yaNkulunkulu aveta kutsi Nkulunkulu unguMdali, nobe uMtfombo wako konkhe lokuphilako, lokufaka ekhatsi naJesu. (Tihlabelelo 36:9; Sembulo 4:11) LiBhayibheli alifundzisi kutsi Nkulunkulu waba ngubabe waJesu ngendlela bantfu lababatfola ngayo bantfwana.

LiBhayibheli liphindze libite tingilosi ngekutsi ‘ngemadvodzana aNkulunkulu weliciniso.’ (Jobe 1:6 umbhalo longentasi) LiBhayibheli litsi umuntfu wekucala, Adamu, ‘bekayindvodzana yaNkulunkulu.’ (Lukha 3:38) Nobe kunjalo, ngenca yekutsi Jesu wadalwa nguNkulunkulu kucala futsi nguye kuphela lamdala ngalokucondzile, liBhayibheli limchaza ngekutsi uyiNdvodzana yaNkulunkulu lekuphela kwayo.

• Jesu waphila ezulwini yini ngaphambi kwekutsi atalwe emhlabeni?

• Yini Jesu layenta ngaphambi kwekutsi ete emhlabeni?

Jesu waphila ezulwini yini ngaphambi kwekutsi atalwe emhlabeni?

Yebo. Jesu bekangumuntfu wemoya ngaphambi kwekutsi atalwe angumuntfu emhlabeni. Jesu yena ngekwakhe watsi: “Ngehle ezulwini.”—Johane 6:38; 8:23

GNkulunkulu wadala Jesu ngaphambi kwekutsi adale tonkhe letinye tintfo. Nalikhuluma ngaJesu liBhayibheli litsi:

• ‘Yona . . . ilitibulo layo yonkhe indalo.’—KubaseKholose 1:15.

• Yona ‘isicalo sendalo yaNkulunkulu.’—Sembulo 3:14.

Jesu wagcwalisa siphrofetho lesikhuluma ngaloyo “lobekavele akhona kusukela kadzeni, kusukela emalangeni asendvulo.”—Mikha 5:2; Matewu 2:4-6.

Yini Jesu layenta ngaphambi kwekutsi ete emhlabeni?

Bekanesikhundla lesiphakeme ezulwini. Jesu wakhuluma ngalesikhundla nakathantaza atsi: “Ngako Babe ngikhatimulise . . . ngibe nenkhatimulo lebenginayo live lisengekho.”—Johane 17:5.

Wasita Babe wakhe ekudaleni tonkhe letinye tintfo. Jesu wasebenta naNkulunkulu ‘ayingcweti yekwakha.’ (Taga 8:30) Nalikhuluma ngaJesu, liBhayibheli litsi: “Ngobe tonkhe letinye tintfo tadalwa ngayo ezulwini nasemhlabeni.”—KubaseKholose 1:16.

Nkulunkulu wasebentisa Jesu kuze adale tonkhe letinye tintfo. Loku kufaka ekhatsi tingilosi kanye nato tonkhe tintfo letidaliwe. (Sembulo 5:11) Lokusebentisana lobekukhona emkhatsini waNkulunkulu naJesu, singakufananisa nekusebentisana lokukhona emakhatsini wemdvwebi wesakhiwo kanye nemakhi waso. Umdvwebi udvweba sakhiwo, bese umakhi usebentisa lomdvwebo kuze asakhe.

AbenguliVi. Nalikhuluma ngekuphila kwaJesu asengakabi ngumuntfu, liBhayibheli libita Jesu ngekutsi ‘nguliVi.” (Johane 1:1) Loku kusho kutsi Nkulunkulu wasebentisa iNdvodzana yakhe kuze endlulisele kwatiswa kanye neticondziso kuletinye tingilosi.

Jesu waphindze waba nguMkhulumeli waNkulunkulu kubantfu emhlabeni. Kungenteka Nkulunkulu wasebentisa Jesu longuliVi kuze anikete bo-Adamu na-Eva ticondziso engadzeni yase Edeni. (Genesisi 2:16, 17) Kungenteka nguJesu lengilosi lebeyihola ema-Israyeli ehlane futsi kungenteka liVi lakhe lebekufanele lilalelwe ngema-Israyeli.—Eksodusi 23:20-23.a