Yini Lengingayenta Nangabe Ngephule Umtsetfo Wasekhaya?

Cishe yonkhe imindeni inemitsetfo, lengafaka ekhatsi yesikhatsi sekubuya ekhaya, yekusebentisa tintfo tebuchwephesha kanye neyekutiphatsa, kubala nje lembalwa.

Yini longayenta nawephule umtsetfo wasekhaya? Angeke ukushintje lesevele kwentekile, kodvwa kukhona longakwenta kuze lesimo singabi sibi kakhulu. Lesihloko sitakusita ubone kutsi ungakwenta njani loko.

• Yini lokungakafaneli uyente

• Lokufanele ukwente

• Lokushiwo bontsanga yakho

Yini lokungakafaneli uyente

• Nangabe batali bakho bangati kutsi wephule umtsetfo wasekhaya, ungase ulingeke kutsi ukufihle loko.

• Nangabe bati kutsi wephule umtsetfo ungase ulingeke kutsi ubeke taba nobe usole lomunye umuntfu.

Konkhe loku lesisandza kukubala akusikahle kutsi ungakwenta. Leni? Ngobe kufihla lokwentile nobe kubeka taba kukhombisa kutsi usengakakhuli. Loku kumane kukhombise batali bakho kutsi usadzinga kukhula.

“Kucamba emanga akusiti. Ngobe ngekuhamba kwesikhatsi liciniso litawuphumela ebaleni, futsi nesijeziso sitawuba ngetulu kwaleso bewutasitfola kube bewukhulume liciniso kusukela ekucaleni.”​—Diana.

Lokufanele ukwente

• Vuma liphutsa lakho. LiBhayibheli litsi: “Umuntfu lofihla tono takhe angeke aphumelele.” (Taga 28:13) Batali bakho bayati kutsi uyawenta emaphutsa. Umbuto ukutsi, Ungetsembeka yini?

  “Batali bakho batawuba nemusa kuwe nangabe ukhuluma liciniso. Nangabe ukhuluma liciniso batakwetsemba nakakhulu.”​—Olivia.

• Colisa. LiBhayibheli litsi: “Nonkhe nibotfobelana.” (1 Phetro 5:5) Kudzingeka utfobeke kuze ukhone kutsi “Ngiyacolisa” futsi ungabeki taba.

  “Bantfu labahlale babeka taba balimata nembeza wabo. Ngekuhamba kwesikhatsi kwenta tintfo letimbi angeke kusabatsintsa.”​—Heather.

• Yemukela imiphumela yetento takho. LiBhayibheli litsi: “Nibolalela naniyalwa.” (Taga 8:33) Ungakhononi futsi yemukela siyalo losinikwa batali bakho.

  “Nangabe ukhonona ngesijeziso loniketwe sona wenta kutsi lesimo sibe sibi nakakhulu. Yetama kwemukela lesijeziso lonikwe sona futsi unganaki loko lokukulahlekele.”​—Jason.

• Yetama kuphindze wente batali bakho kutsi bakwetsembe. LiBhayibheli litsi: “Nilahle buntfu lobudzala lobuvumelana nendlela lebenitiphatsa ngayo.” (Kubase-Efesu 4:22) Yetama kuhlale wenta tintfo ngendlela lefanele.

  “Batali bakho batawuphindze bakwetsembe nawutawuhlale wenta tincumo letihlakaniphile futsi ubakhombise kutsi angeke uliphindze lelo phutsa.”​—Karen.

Longakwenta: Sebenta kamatima kuze ukhombise batali bakho kutsi bangakwetsemba. Sibonelo nje, nangabe uhambile ekhaya, yatisa batali bakho nase usendleleni ngisho nobe utawusheshe ubuye. Loku kutawubenta babone kutsi sewufuna baphindze bakwetsembe.