Ngesikhatsi bo-Adamu na-Eva sebacoshiwe ensimini yase-Edeni, batala bantfwana labanyenti. Indvodzana yabo yekucala Khayini beyingumlimi, yesibili bekungu-Abela, yona beyingumelusi.

Ngalelinye lilanga boKhayini na-Abela baletsa iminikelo kuJehova. Uyati kutsi uyini umnikelo? Sipho lesikhetsekile. Jehova wajabula ngemnikelo wa-Abela kodvwa akajabulanga ngewaKhayini. Loko kwamkwatisa kakhulu Khayini. Jehova wamecwayisa Khayini kutsi lentfukutselo yakhe beyitamenta agcine ente intfo lembi. Kodvwa Khayini akalalelanga.

Esikhundleni saloko Khayini watsi ku-Abela: “Asihambe siye etsafeni.” Nasebabodvwa esigangeni, Khayini wahlasela umnakabo wambulala. Yini Jehova layenta ngaloko? Jehova wajezisa Khayini ngekumcosha emndenini wakubo futsi abengeke amvumele kutsi abuye.

Sifundzani tsine kuloku? Singahle sitfukutsele nasibona tintfo tingenteki ngendlela lebesicabanga ngayo. Nasiva shengatsi sicala kutfukutsela​—nobe labanye basecwayisa ngobe babona kutsi sitfukutsele​—ngekushesha kufanele sitekhute futsi silawule indlela lesitiva ngayo ngaphambi kwekutsi isilawule.

Jehova utawuhlale amkhumbula Abela ngenca yekutsi abemtsandza futsi enta lokulungile. Nkulunkulu utawumvusa Abela nasekente umhlaba waba lipharadisi.

Ngekuhamba kwesikhatsi kwaba nebantfu labanyenti emhlabeni. Labanyenti bebenta tintfo letimbi. Ngisho naletinye tingilosi ezulwini tenta tintfo letimbi. Tesuka ezulwini teta emhlabeni. Uyati kutsi takwentelani loko? Kuze tishintje imitimba yato ifane neyebantfu bese tititfolela bafati lapha emhlabeni.

Labafati batalela letingilosi emadvodzana. Lamadvodzana abetidlakela futsi anemandla lamakhulu. Abehlukumeta bantfu. Jehova akazange akuvumele loku kutsi kuchubeke kwenteka. Ngako-ke, wancuma kubhubhisa bonkhe bantfu lababi ngaZamcolo.

Nanobe kunjalo, beyikhona indvodza lebeyilungile. Beyimtsandza Jehova. Ligama layo bekunguNowa. Beyinemfati nemadvodzana lamatsatfu, boShemu, Hhamu kanye naJafethi, futsi onkhe lamadvodzana ayo abenebafati. Jehova watjela Nowa kutsi akhe umkhumbi lomkhulu kuze atewungena kuwo nemndeni wakhe nakufika Zamcolo. Umkhumbi ufanana nelibhokisi lelikhulu lelikhonako kuntanta emantini. Jehova waphindze watjela Nowa kutsi abongenisa tilwane letinyenti emkhumbini kute nato tisindze kuZamcolo.

Ngekushesha Nowa wacala kwakha umkhumbi. Nowa nemndeni wakhe bakha umkhumbi iminyaka lecishe ibe ngu-50. Lomkhumbi bawakha ngendlela Jehova labekabayale ngayo. Asachubeka nekwakha lomkhumbi, Nowa abetjela bantfu ngaZamcolo. Kodvwa kute lowamlalela.

Ekugcineni, besesifikile sikhatsi sekutsi bangene emkhunjini. Asesibone kutsi kwase kwentekani.