Edvute naseBhabhele bekunelidolobha lebelibitwa ngekutsi yi-Uri. Bantfu base-Uri bebakhonta bonkulunkulu bemanga kunekutsi bakhonte Jehova. Nanobe kunjalo, bekunendvodza lebeyikhonta Jehova kuphela, ligama layo bekungu-Abrahama.

Jehova watsi ku-Abrahama: ‘Suka eveni lakini, ushiye tihlobo takho nendlu yababe wakho, uye eveni lengitakukhombisa lona.’ Nkulunkulu wase uyametsembisa utsi: ‘Ngitawukwenta ube sive lesikhulu, futsi utawuba sibusiso kulabanye. Tonkhe tive letisemhlabeni titawubusiswa ngawe.’

Abrahama abengayati lendzawo Jehova labemtfuma kuyo, kodvwa wetsemba Jehova. Ngako-ke Abrahama, nemfati wakhe Sara, nababe wakhe Thera kanye naLoti umntfwana wabhuti wakhe batilungiselela loluhambo loludze base bayahamba.

Abrahama bekaneminyaka lengu-75 ngesikhatsi yena nemndeni wakhe befika kulelive Jehova abebatsembise lona. Lelive belibitwa ngekutsi yiKhenani. Kulapho Nkulunkulu akhuluma khona na-Abrahama futsi wenta nasi setsembiso: ‘Lonkhe lelive ngitalinika situkulwane sakho.’ Bo-Abrahama naSara besebabadzala kakhulu futsi bete bantfwana. Bekutawenteka njani loku lobekutsenjiswe nguJehova?

Bo-Abrahama naSara besebaneminyaka leminyenti bashadile. Bashiya likhaya labo lelintofontofo e-Uri bahamba bayohlala emathendeni. Kodvwa Sara akazange akhonone ngobe abemetsemba Jehova.

Sara abefuna mbamba kuba nemntfwana ngobe waze watsi ku-Abrahama: ‘Ngicela kutsi ulale nencekukati yami Hagari, mhlawumbe nje ingangitalela bantfwana.’ Ngekuhamba kwesikhatsi Hagari watfola indvodzana futsi ligama layo bekungu-Ishmayeli.

Eminyakeni leminyenti leyalandzela ngesikhatsi Abrahama aneminyaka lengu-99 budzala Sara analengu-89, kwefika tivakashi letintsatfu. Abrahama wacela letivakashi kutsi tiphumule emtfuntini wesihlahla futsi watipha nekudla. Uyati kutsi bekubobani letivakashi? Bekutingilosi! Tatsi ku-Abrahama: ‘Ngalesikhatsi lesi emnyakeni lotako, wena nemfati wakho nitawuba nemntfwana.’ Sara abesekhatsi ethendeni alalele futsi watihlekela wase utsi: ‘Njengobe mine sengimdzala kangaka ngisengamtfola yini umntfwana?’

Ngemnyaka lolandzelako, Sara wabeleka indvodzana, njengobe ingilosi yaJehova beyetsembisile. Abrahama wayetsa libito watsi ngu-Isaka, lokusho kutsi “Kuhleka.”

Ngesikhatsi Isaka anemimyaka lesihlanu budzala, Sara wabona Ishmayeli amhlupha. Abefuna kuvikela indvodzana yakhe, ngako wacela Abrahama kutsi acoshe Hagari na-Ishmayeli. Abrahama wacale wala kubacosha. Kodvwa Jehova watsi ku-Abrahama: ‘Lalela Sara ngobe situkulwane sakho sitawuvela ku-Isaka, naku-Ishmayeli ngitawuveta sive ngobe ungumntfwana wakho.’