Loti abehlala na-Abrahama eKhenani. Bo-Abrahama naLoti bebanemfuyo lenyenti kangangekutsi besekamancane emadlelo abo. Abrahama watsi kuLoti: ‘Ngicela kutsi simane sehlukane. Ungakhetsa nome nguyiphi indzawo loyifunako. Nangabe uya ngesencele mine ngitakuya ngesekudla.’ Bekukahle yini lolokwentiwa ngu-Abrahama?

Loti wabona indzawo lenhle eceleni kwelidolobha laseSodoma. Beyigeleta emanti iphindze inetjani lobuluhlata. Ngako wakhetsa leyo ndzawo wahamba wayewuhlala khona nemndeni wakhe.

Bantfu baseSodoma kanye nebaseGomora bebenta tintfo letimbi kakhulu. Empeleni bebababi kangangekutsi Jehova wakhetsa kubabhubhisa. Noma kunjalo Jehova abefuna kusindzisa Loti kanye nemndeni wakhe, kungako atfumela tingilosi letimbili tiyewubatjela titsi: “Sheshisani, niphume kulendzawo ngobe Jehova utalibhubhisa lelidolobha!”

Loti akazange ahambe ngaleso sikhatsi. Bekenta kancane. Ngako letingilosi tabamba Loti ngesandla, umfati wakhe kanye nemadvodzakati akhe tabakhiphela ngephandle kwalelidolobha, tatsi: ‘Balekani kuze nisindzise kuphila kwenu! Ningabuki emuva ngobe nabuka emuva nitawufa!’

Nabafika kulelinye lidolobha lokutsiwa yiZowari, Jehova wase uyibhubhhisa ngemlilo iSodoma neGomora. Lamadolobha lamabili abhujiswa angaphindze abakhona. Ngekungalaleli Jehova, umfati waLoti wabuka emuva futsi waba sidvuli seluswayi. Loti nemadvodzakati akhe basindza ngobe balalela Jehova. Kungenteka kwawavisa buhlungu kutsi make wabo akakamlaleli Jehova. Nome kunjalo bajabula ngekutsi batilalela tecwayiso taJehova.

Abrahama wafundzisa indvodzana yakhe Isaka kutsi itsandze Jehova futsi iciniseke kutsi tonkhe tetsembiso taJehova titawugcwaliseka. Kodvwa ngesikhatsi Isaka aneminyaka lecishe ibe ngu-25, Jehova wacela Abrahama kutsi ente lokutsite lobekumatima kakhulu. Bekuyini?

Nkulunkulu watsi ku-Abrahama: ‘Ngicela utsatse indvodzana yakho lekuphela kwayo, uhambe uye eveni laseMoriya futsi unikele ngayo.’ Abrahama abengati kutsi Jehova umcelelani kutsi ente loko, kodvwa walalela.

Ekuseni ngelilanga lelilandzelako, Abrahama wahamba na-Isaka kanye netisebenti takhe letimbili baya eMoriya. Ngemuva kwemalanga lamatsatfu besebatibona tintsaba taseMoriya. Abrahama wacela tisebenti takhe kutsi time kancane njengobe yena na-Isaka bayokwenta umhlatjelo. Abrahama waniketa Isaka tinkhuni wase yena uphatsa umukhwa. Isaka wabuta babe wakhe watsi: ‘Iphi imvu letawuba ngumnikelo wekushiswa?’ Abrahama waphendvula watsi: ‘Ndvodzana, Jehova nguye lotasinika lemvu.’

Nabefika entsabeni bakha lilati. Abrahama wase ubopha Isaka tandla netinyawo wambeka kulelilati.

Abrahama watsatsa umukhwa. Ngaso leso sikhatsi ingilosi yaJehova yamemeta isezulwini yatsi: ‘Abrahama ungamlimati lomfana. Nyalo sengiyati kutsi uyamesaba Nkulunkulu ngobe awukangigodleli indvodzana yakho.’ Abrahama wabona imvu ibanjwe ngetimphondvo esihlahleni. Ngekushesha wachacha Isaka wase sewenta umhlatjelo ngalemvu.

Kusukela ngalelo langa Jehova watsi Abrahama ngumngani wakhe. Leni? Abrahama abekwenta konkhe Jehova abemyala kutsi akwente, ngisho nobe angati kutsi Jehova umcelelani kutsi akwente.

Jehova waphindze wetsembisa Abrahama watsi: ‘Ngitakubusisa futsi ngisandzise situkulwane sakho nobe intalo yakho.’ Loku bekusho kutsi Jehova utawubusisa bonkhe bantfu labalungile ngesitukulwane sa-Abrahama.