Isaka abeneminyaka lengu-40 ngesikhatsi ashada naRebheka. Abemtsandza kakhulu. Ngekuhamba kwesikhatsi baba nebantfwana lababili​—bafana labangemaphahla.

Umfana lomdzala bekungu-Esawu kantsi lomncane bekunguJakobe. Esawu bekatsandza kuba semadlelweni, futsi bekangumtingeli lonelikhono. Kodvwa Jakobe abekutsandza kuhlala ekhaya.

Ngaleto tikhatsi, indvodzana lendzala ngiyo lebeyitfola indzawo lenkhulu kanye nemali nakufa babe wayo. Loko kwakubitwa ngekutsi lifa. Emndenini wa-Isaka, lifa belifaka ekhatsi incenye yesetsembiso Jehova lasenta na-Abrahama. Esawu abengenandzaba naleto tetsembiso, kodvwa Jakobe bekati kutsi tibaluleke kakhulu.

Ngalelinye lilanga Esawu wafika ekhaya adziniwe njengobe abetingela lilanga lonkhe. Weva liphunga lelimnandzi lekudla lebekuphekwa nguJakobe wase utsi: “Ngicela usheshise ungiphe leso sitjulo lesibovu, ngobe ngifile yindlala.” Jakobe watsi: ‘Ngitakunika, kodvwa funga kucala kutsi utangitsengisela butibulo bakho!’ Esawu watsi: ‘Anginendzaba nebutibulo bami! Ungabutsatsa, nginikete lesitjulo.’ Ucabanga kutsi bekukahle yini loko lokwentiwa ngu-Esawu? Cha, bekungasikahle. Esawu walahla lilungelo lelibaluleke kakhulu ngenca yesitjulo.

Ngesikhatsi Isaka sekakhulile, besekufanele abusise indvodzana yakhe lendzala. Kodvwa Rebheka wasita Jakobe indvodzana yakhe lencane kutsi atfole lesibusiso. Ngesikhatsi Esawu eva ngaloku, watfukutsela kakhulu waze wafuna kubulala umnakabo. Bo-Isaka naRebheka bebafuna kuvikela Jakobe, ngako batsi kuye: ‘Baleka uye kumalume wakho Labani. Ubohlala khona kuze kwehle intfukutselo ya-Esawu.’ Jakobe wabalalela batali bakhe wase uyabaleka.

Jehova wetsembisa Jakobe kutsi utamvikela njengobe avikela Abrahama na-Isaka. Jakobe bekahlala eHarani lapho ashadela khona, waba nemndeni lomkhulu futsi wanjinga kakhulu.

Kusenjalo Jehova watsi kuJakobe: ‘Buyela eveni lakini.’ Ngako Jakobe nemndeni wakhe babuyela emuva ekhaya. Basesendleleni, labanye bantfu beta kuJakobe batsi: ‘Umnakenu Esawu usendleleni uhamba nemadvodza langu-400.’ Jakobe bekesaba kutsi Esawu ufuna kubulala yena kanye nemndeni wakhe. Wathantaza kuJehova watsi: ‘Ngicela kutsi ungisindzise esandleni semnaketfu.’ Ngelilanga lelilandzelako Jakobe watfumelela Esawu tipho letifaka ekhatsi timvu, timbuti, tinkhomo, emakamela kanye netimbongolo.

Ngalobo busuku Jakobe ayedvwa wabona ingilosi. Lengilosi yase icala kulwa naye. Balwa kwaze kwasa. Nanobe Jakobe alimala, akazange aphele emandla. Lengilosi yatsi: “Ngiyekele ngihambe.” Kodvwa Jakobe watsi: “Ngeke ngikuyekele uhambe ungakangibusisi.”

Ekugcineni lengilosi yambusisa Jakobe. Ngemuva kwaloko Jakobe wase uyati kutsi Jehova angeke avumele Esawu ambulale.

Ngalelo langa ekuseni, Jakobe wabona Esawu eta nemadvodza langu-400. Jakobe wagijima washiya umndeni wakhe ngemuva wefika waguca kasikhombisa embikwemnakabo. Esawu wahlangabeta Jakobe wafike wamgaca. Lamaphahla akhala tinyembeti futsi acolelana. Ucabanga kutsi Jehova wativa njani ngendlela Jakobe lalungisa ngayo lenkinga?

Ngekuhamba kwesikhatsi bo-Esawu naJakobe babuyela emakhaya abo. Jakobe bekanemadvodzana langu-12. BekuboRubeni, Simeyoni, Levi, Juda, Dani, Naftali, Gadi, Asheri, Isakhari, Zebuloni, Josefa naBhenjamini. Lenye yalamadvodzana lokwakunguJosefa, yasetjentiswa nguJehova kuze isindzise bantfu bakhe. Uyati kutsi kwenteka njani loku? Asesifundze.