Eveni lase-Uzi kwakunendvodza lekhonta Jehova. Ligama layo bekunguJobe. Abenjinge kakhulu futsi anemndeni lomkhulu. Abenemusa, asita bantfu labahluphekako, bafelokati kanye nebantfwana labete batali. Ngesizatfu sekutsi bekenta lokuhle, abengeke yini abe netinkinga?

Jobe abengati kutsi Sathane Develi umbukile. Jehova watsi kuSathane: ‘Umbonile yini Jobe inceku yami? Kute umuntfu lofana naye emhlabeni. Uyangilalela futsi uyakubalekela nalokubi.’ Sathane waphendvula watsi: ‘Jobe uyakulalela vele. Uyamvikela uphindze umbusise. Kantsi nemfuyo yakhe seyandze kakhulu. Nawungahlasela konkhe lanako utawuyekela kukukhonta.’ Jehova watsi: ‘Konkhe lanako kusesandleni sakho. Kodvwa ungambulali!’ Jehova wamvumelelani Sathane kutsi avivinye Jobe? Abeciniseka kutsi Jobe angeke ahluleke.

Sathane wacala kuvivinya Jobe ngetindlela letehlukene. Wacale watfumela bantfu baseSeba kutsi bayokweba tinkhomo kanye netimbongolo taJobe. Wase ushisa tonkhe timvu taJobe ngemlilo. Lelinye licembu lebantfu labangemaKhaledi latsatsa emakamela akhe. Tisebenti takhe lebetinakekela imfuyo tabulawa. Kwase kulandzela luvivinyo lolumatima kakhulu. Ngesikhatsi kunelidzili, indlu bantfwana baJobe lebebahleti kuyo yawela etikwabo bafa. Jobe weva buhlungu kakhulu kodvwa akazange ayekele kukhonta Jehova.

Sathane abefuna kumvisa buhlungu kakhulu Jobe, ngako waveta tilondza emtimbeni wakhe. Jobe abesetinhlungwini letimatima. Abengati kutsi kungani tintfo letinje tenteka kuye. Nobe kunjalo, Jobe wachubeka akhonta Jehova. Nkulunkulu wakubona konkhe loku futsi Jobe wamjabulisa kakhulu.

Sathane wase utfumela emadvodza lamatsatfu kutsi ayovivinya Jobe. Atsi kuye: ‘Kungenteka wonile wase wetama kusifihla lesono. Nkulunkulu uyakujezisa.’ Jobe watsi: ‘Kute lokubi lengikwentile.’ Wase ucala kucabanga kutsi nguJehova lombangela letinkinga, waze wamsola.

Lenye indvodza lebeyibitwa ngekutsi ngu-Elihu yabeva nabakhuluma. Yase itsi: ‘Konkhe lenikushito kungemanga. Jehova mkhulu kunaloko lesikwatiko. Akatenti tintfo letimbi. Ubona konkhe futsi usindzisa labahluphekile.’

Jehova wase ukhuluma naJobe watsi: ‘Bewukuphi nangibeka sisekelo semhlaba? Ungakusola yini kulunga kwami? Ukhulumile, kodvwa ungati lutfo.’ Jobe walivuma liphutsa lakhe watsi: ‘Ngonile kuwe. Nyalo sengiyati kutsi uyakhona kwenta tonkhe tintfo. Kute lokungakwehlula. Kungako ngikuhocisa loko lengikushito.’

Ngesikhatsi Sathane asacedzile kumvivinya, Jehova waphilisa Jobe waphindze wambusisa ngetintfo letinyenti kunaleto abenato. Jobe waphila kahle sikhatsi lesidze. Jehova wambusisa Jobe ngobe wamlalela ngisho nangetikhatsi letimatima. Utamlingisa yini Jobe, ukhonte Jehova ngisho nobe kungentekani?

Ngesikhatsi uhlala eGibhithe umndeni waJakobe bewatiwa ngekutsi ngema-Israyeli. Nasebafile boJakobe naJosefa, kwase kubusa lomunye Faro. Abesaba kutsi ema-Israyeli sewaba nemandla kwendlula emaGibhithe. Ngako loFaro wenta ema-Israyeli tigcili. Abewafolomisa titini futsi awentisa imisebenti yasemasimini. Ema-Israyeli andza kakhulu ngesikhatsi emaGibhithe awaphocelela kutsi asebente kamatima. Ngenca yekutsi Faro abengakutsandzi loko, wakhipha umyalo wekutsi tonkhe tinswane tebafana tema-Israyeli tibulawe. Ucabanga kutsi abesaba kangakanani ema-Israyeli?

Jokhebedi umfati longum-Israyeli abenemntfwana lomuhle longumfana. Kuze amvikele wamfaka ebhasikidini futsi wamfihla emhlangeni losemfuleni iNayili. Miriyamu dzadzewabo loluswane abeme dvutane, entela kubuka kutsi kutakwentekani kulo.

Indvodzakati yaFaro beyiyogeza emfuleni futsi yabona lebhasikidi. Yatfola kuneluswane lwemfana, lukhala futsi yaluhawukela. Miriyamu wabuta watsi: ‘Ngingakulandzela yini make lotakumunyisela lomntfwana aphindze amnakekele?’ Ngesikhatsi indvodzakati yaFaro itsi angahamba, Miriyamu walandza Jokhebedi, make waloluswane. Indvodzakati yaFaro yatsi kuJokhebedi: “Tsatsa lomntfwana ungimunyisele yena uphindze umnakekele, mine ngitakubhadala.”

Watsi nasakhulakhulile lomntfwana, Jokhebedi wamtsatsa wammikisa kulendvodzakati yaFaro leyametsa yatsi nguMosi futsi yamkhulisa waba ngewayo. Mosi wakhula njengemntfwanenkhosi futsi abetfola noma yini layifunako. Kodvwa Mosi akazange amkhohlwe Jehova. Bekati kutsi ungum-Israyeli hhayi umGibhithe futsi wakhetsa kukhonta Jehova.

Ngesikhatsi aneminyaka lengu-40, Mosi wancuma kusita bantfu bakubo. Watsi nakabona umGibhithe ashaya um-Israyeli, Mosi washaya lomGibhithe, wambulala wase ummbela esihlabatsini. Watsi Faro nakayiva lendzaba wafuna kubulala Mosi. Kodvwa Mosi wabaleka wayewuhlala eveni lakaMidiyani. Jehova abemnakekela lapho.