Mosi wahlala kaMidiyani iminyaka lengu-40. Waba nemfati nebantfwana. Ngalelinye lilanga eluse timvu takhe entsabeni iSinayi wabona intfo lemangalisako. Sihlahla sasivutsa umlilo kodvwa singashi. Watsi nakasondzela weva livi liphuma kulesihlahla litsi: ‘Mosi! Ungasasondzeli. Khumula tincabule takho ngobe lendzawo lome kuyo ingcwele.’ Bekukhuluma Jehova asebentisa ingilosi.

Mosi abesaba, ngako wambonya buso bakhe. Lelivi latsi kuye: ‘Ngikubonile kuhlupheka kwebantfu baka-Israyeli. Ngitabakhulula kulabantfu baseGibhithe, ngibayise eveni lelihle. Nguwe lotawuhola bantfu bami ubakhiphe eGibhithe.’ Ucabanga kutsi kwammangalisa yini loku Mosi?

Mosi wabuta watsi: ‘Kufanele ngitsini-ke kuwo nawangibuta kutsi ngitfunywe ngubani?’ Nkulunkulu waphendvula watsi: ‘Ubotsi kuwo Jehova, Nkulunkulu wa-Abrahama, Nkulunkulu wa-Isaka naNkulunkulu waJakobe ungitfume kini.’ Mosi wase utsi: ‘Asengitsi abangikholwa futsi abalilaleli livi lami?’ Jehova wacinisekisa Mosi kutsi utawumsita. Watjela Mosi kutsi ajike indvuku yakhe phansi. Lendvuku yagucuka yaba yinyoka. Ngesikhatsi Mosi abamba umsila walenyoka yagucuka yaba yindvuku. Jehova watsi: ‘Nawenta lesimangaliso batawukholwa kutsi ngikutfumile.’

Mosi watsi: ‘Angikaze ngibe sikhulumi lesihle.’ Jehova wametsembisa watsi: ‘Ngitakufundzisa loko lokufanele ukusho, futsi ngitawutfumela Aroni umnakenu kutsi akusite.’ Njengobe bekati kutsi Jehova utawumsita, Mosi wahamba nemfati wakhe kanye nemadvodzana akhe babuyela eGibhithe.

Ema-Israyeli aphocelelwa kutsi asebente njengetigcili. Jehova watfuma boMosi na-Aroni kutsi baye kuFaro bafike batsi: “Khulula bantfu bami kuze bayongentela umkhosi ehlane.” Ngekutigcabha Faro waphendvula watsi: “Angimati nekumati loJehova futsi nje angeke ngize ngiwavumele ema-Israyeli kutsi ahambe.” Faro wase uphocelela ema-Israyeli kutsi asebente kamatima. Jehova abetamfundzisa sifundvo Faro. Uyati abetamfundzisa njani? Waletsa tishayo letilishumi. Jehova watsi kuMosi: ‘Faro walile kungilalela. Ekuseni, utawube aseMfuleni iNayili, uboya kuye umtjele kutsi njengobe alile kukhulula bantfu bami, emanti eMfula iNayili atawugucuka abe yingati.’ Mosi walalela futsi waya kuFaro. Faro abebukele njengobe Aroni ashaya umfula iNayili ngendvuku, futsi emanti agucuka aba yingati. Lomfula wacala kunuka, netinhlanti tafa futsi kwaba bete emanti ekunatsa eNayili. Kodvwa Faro wala kukhulula ema-Israyeli kutsi ahambe.

Ngemuva kwemalanga langu-7 Jehova watfuma Mosi kutsi aye kuFaro afike atsi: ‘Nangabe wala kubakhulula, ngitawushaya lelive lakho ngeticoco.’ Aroni waphakamisa indvuku yakhe futsi kwagcwala ticoco yonkhe indzawo. Bantfu batfola ticoco etindlini tabo, emibhedzeni yabo kanye nasetitjeni tabo. Bekugcwele ticoco yonkhe indzawo! Faro watsi Mosi akancenge Jehova kutsi asuse leticoco. Faro wetsembisa kutsi utawakhulula lama-Israyeli ahambe. Ngako Jehova watisusa leticoco futsi emaGibhithe atibutsisa ndzawonye taba ticumbi letinyenti kakhulu. Lelive lacala kunuka. Kodvwa Faro waphindze wala kukhulula ema-Israyeli.

Jehova wase utsi kuMosi: ‘Aroni kufanele atsatse indvuku yakhe ashaye umhlabatsi futsi lolutfuli lwawo lutawuba timbuzulwane nobe timphungane letincane.’ Ngekushesha kwagcwala timbuzulwane yonkhe indzawo. Letinye tinceku taFaro tatsi kuye: “Ngemandla aNkulunkulu lente loku!” Kodvwa Faro abengawavumeli ema-Israyeli kutsi ahambe.