BoMosi na-Aroni baya kuyotjela Faro umlayeto lebewuvela kuNkulunkulu lotsi: ‘Nawungabakhululi bantfu bami, ngitawutfumela tibawu eGibhithe.’ Libulo letimphungane lagcwala etindlini temaGibhithe lanjingile nalaphuyile. Yonkhe indzawo beseyigcwele timphungane. Kodvwa eveni laseGosheni labekuhlala khona ema-Israyeli bekute timphungane. Kusukela kulesishayo sesine, letishayo tacala kuhlupha baseGibhithe kuphela. Faro wancenga watsi: ‘Ngicela ningincengele kuNkulunkulu wenu kutsi asuse letibawu. Labantfu ngitabakhulula.’ Kodvwa ngesikhatsi Jehova asusa letimphungane, Faro washintja ingcondvo. Faro utake asifundze yini sifundvo?

Jehova watsi: ‘Kodvwa nawungabakhululi kutsi bahambe, ngitawushaya imfuyo yakho ngesishayo lesibulalako.’ Ngelilanga lelilandzelako, letilwane tacala kufa. Kodvwa tilwane tema-Israyeli atizange tife. Nobe kunjalo Faro wacinisa ingcondvo wala kuwakhulula.

Jehova wase utjela Mosi kutsi abuyele kuFaro afike ajike umlotsa emoyeni. Lomlotsa waba lutfuli lolwagcwala emoyeni futsi lahlala emitimbeni yemaGibhithe kuphela. Lolutfuli lwabangela tilondza kuwo onkhe emaGibhithe nasemfuyweni yawo. Ngetulu kwaloko, Faro wala kuwakhulula ema-Israyeli.

Jehova watfumela Mosi kutsi aye kuFaro afike atsi: ‘Nanyalo solo unenkhani, awubakhululi bantfu bami? Kusasa ngalesikhatsi ngitawuletsa sangcotfo lesikhulu lesingazange sesihlasele iGibhithe.’ Ngelilanga lelilandzelako Jehova waletsa sangcotfo nekudvuma lokukhulu kanye nemlilo. Leso sangcotfo saba ngulesibi kunato tonkhe letake taba khona eGibhithe. Tonkhe tihlahla nalobekuhlanyelwe kwafa, ngaphandle kwalebetiseGosheni. Faro watsi: “Ncengani Jehova kute kuphele lokudvuma nalesangcotfo lasiletsile. Ngemuva kwaloko ngitanikhulula.” Ngekushesha nje nakuphela sangcotfo nelitulu, Faro washintja ingcondvo.

Mosi watsi: ‘Kutawuvela sikhonyane futsi sidle tonkhe titjalo letingazange timoshwe sangcotfo.’ Tintsetse letinyenti tadla konkhe lebekuhlanyelwe nalokusihlahla lebekusindze kulesangcotfo. Faro wancenga watsi: ‘Ncengani Jehova kutsi asuse lesikhonyane.’ Ngisho nangesikhatsi Jehova sekatihambisile letintsetse, Faro wachubeka acinisa inhloko.

Jehova watsi kuMosi: “Yelulela sandla sakho emazulwini.” Ngekushesha sibhakabhaka saba mnyama tsu! Kwaphela emalanga lamatsatfu emaGibhithe angaboni lutfo. Tindlu tema-Israyeli kuphela lebetikhanya.

Faro watsi kuMosi: “Hambani niyokhonta Jehova. Kodvwa timvu tenu kanye netinkhomo tenu titawusala.” Mosi watsi: ‘Imfuyo yetfu sitawuhamba nayo kuze sitawunikela ngayo kuJehova.’ Faro watfukutsela kakhulu. Wamemeta watsi: “Suka embikwami! Ungaphindzi nje ute lapha kimi, ngobe mhlazana uta kimi, utawukufa.”

Mosi wetsembisa Faro kutsi angeke aphindze abuye futsi. Kodvwa angakahambi watsi kuFaro: ‘Ekhatsi nebusuku onkhe ematibulo aseGibhithe atawukufa, kusukela etibulweni laFaro kuya etibulweni lesigcilikati.’

Jehova watjela ema-Israyeli kutsi abe nelidzili. Watsi: ‘Bulalani imvu nobe imbuti lendvuna lenemnyaka munye, nitsatse lenye yengati yayo niyifafate etinsikeni totimbili teminyango yetindlu. Kufanele niyose emlilweni futsi niyidle kanye nesinkhwa lesite imvubelo. Niboyidla nigcokile, nifake netincabule etinyaweni tenu futsi nilungele kuhamba. Ngalobo busuku, ngiyonikhulula.’ Ucabanga kutsi ema-Israyeli abejabule kangakanani?

Ebusuku, ingilosi yaJehova yayihambahamba eGibhithe. Ematibulo labafana labekasetindlini lebetingakabhocwa ngengati emnyango afa. Kodvwa lengilosi beyitendlula tindlu letibhocwe ngengati. Yonkhe imindeni yaseGibhithe yafelwa bantfwana. Kodvwa akuzange kufe ngisho namunye umntfwana kuma-Israyeli.

Ngisho nendvodzana yaFaro yafa. Faro akazange akhone kukubeketelela loko. Ngekushesha watsi kuMosi na-Aroni: ‘Hambani la, niphume niphele. Hambani niyokhonta Nkulunkulu wenu. Tsatsani nemihlambi yenu nihambe!’

Ema-Israyeli akhanyiselwa yinyeti aphuma eGibhithe ahamba ngemindeni. Kwakungemadvodza lacishe abengu-600 000, kanye nebafati nebantfwana labanyenti. Bantfu labanyenti labebangasiwo ema-Israyeli babalandzela kuze nabo bayokhonta Jehova. Ema-Israyeli agcine akhululekile.

Kute akhumbule indlela Jehova lawakhulula ngayo, abenta lidzili njalo ngemnyaka. Belibitwa ngekutsi liPhasika.