Jehova watsi kuMosi: ‘Wota lapha kimi entsabeni. Ngitakuniketa tibhelekece tematje lengitawubhala kuto imitsetfo yami.’ Mosi wenyukela entsabeni futsi wahlala khona emalanga langu-40 nebusuku lobungu-40. Nakalapho, Jehova wabhala iMitsetfo Lelishumi ematjeni lamabili latibhelekece futsi wawanika Mosi.

Ngekuhamba kwesikhatsi, ema-Israyeli acabanga kutsi Mosi akasabuyi. Atsi ku-Aroni: ‘Sifuna umuntfu lotasihola. Sentele nkulunkulu lotawuhamba embikwetfu.’ Aroni watsi: ‘Nginikeni ligolide lenu.’ Wancibilikisa leligolide wase wenta sithico selitfole. Ema-Israyeli atsi: ‘Lelitfole nguNkulunkulu wetfu lowasihola wasikhipha eGibhithe.’ Ase acala kukhotsamela lelitfole legolide, futsi aba nelidzili. Bekukabi yini loko? Bekukabi ngobe labantfu bebetsembise kukhonta Jehova kuphela. Kodvwa bebangasasigcini lesetsembiso sabo.

Jehova wakubona loko bekwenteka, wase utsi kuMosi: ‘Sale wehla ngobe labantfu abasangilaleli futsi sebakhonta nkulunkulu wemanga.’ Mosi wehla entsabeni aphetse tibhelekece letimbili.

Nakasondzela lapho bekunalabantfu khona, Mosi wabeva bahlabela. Wababona badansa futsi bakhotsamela lelitfole. Watfukutsela kakhulu. Walahla phansi letibhelekece tematje, taphihlika taba tincetu. Ngekushesha watsatsa lelitfole walishisa. Wase utsi ku-Aroni: ‘Yini labantfu labakwente yona kutsi ungaze wente intfo lembi kangaka?’ Aroni watsi: ‘Ungatfukutseli. Wati kahle kutsi labantfu banjani. Bebafuna kuba nankulunkulu, ngako ngifake ligolide labo emlilweni kwase kuphuma lelitfole.’ Aroni bekungakafaneli akwente loko. Mosi wabuyela entsabeni wafike wancenga Jehova kutsi abacolele labantfu.

Jehova wabacolela labo lebebatimisele kumlalela. Uyabona yini kutsi bekubaluleke kangakanani kutsi ema-Israyeli alalele Mosi?

Ngesikhatsi Mosi aseNtsabeni iSinayi, Jehova wamtjela kutsi akhe lithende lelikhetsekile, lelitawubitwa ngekutsi lithende lekukhontela, lapho ema-Israyeli abetamkhontela khona. Abetawukhona kuhamba nalo nomaphi lapho aya khona.

Jehova watsi: ‘Tjela ema-Israyeli kutsi aletse loko lanako kuze kwakhiwe lithende lekukhontela.’ Ema-Israyeli aletsa ligolide, lisiliva, litfusi, ematje laligugu, kanye nebucwebe. Anikela ngetindvwangu, ilineni, sikhumba setilwane, nangaletinye tintfo letinyenti. Anikela kakhulu waze watsi Mosi: ‘Sekwenele! Ningasaletsi lokunye.’

Emadvodza nebafati labanyenti basita nakwakhiwa lelithende lekukhontela. Jehova wabanika kuhlakanipha kuze basebente kahle. Labanye bebeluka tintsambo futsi labanye bebatfunga tindvwangu. Labanye bebalungisa kahle ematje, ligolide, kanye netingodvo lebetitawusetjentiswa.

Labantfu bakha lelithende lekukhontela ngendlela Jehova bekabayale ngayo. Benta indvwangu lekahle lebeyitawehlukanisa iNgcwele kanye neNgcwelengcwele. ENgcwelengcwele bekunelibhokisi lesivumelwane lebelakhiwe ngesigodvo semgamba nangeligolide. ENgcwele bekunelutsi lwesibane lolwentiwe ngeligolide, kunelitafula, kanye nelilati lekushisela imphepho. Ebaleni lelingcwele bekunelibhavu lelikhulu lelitfusi kanye nelilati lelikhulu. Libhokisi lesivumelwane belikhumbuta ema-Israyeli ngesetsembiso lasenta kuJehova sekumlalela. Uyati yini kutsi siyini sivumelwane? Setsembiso lesikhetsekile.

Jehova wakhetsa Aroni kanye nemadvodzana akhe kutsi kufanele basebente ethendeni lekukhontela futsi babe baphristi. Bekufanele balinakekele futsi banikele kuJehova. Ngu-Aroni umphristi lophakeme kuphela lobekavumelekile kutsi angene eNgcwelengcwele. Loku bekakwenta kanye ngemnyaka kuze anikele umnikelo wekutsetselelwa kwetono takhe, tono temndeni wakhe kanye netono taso sonkhe sive saka-Israyeli.

Ema-Israyeli acedza kwakha lelithende lekukhontela ngemuva kwemnyaka aphumile eGibhithe. Ngako-ke nawo besekanayo indzawo yekukhontela Jehova.

Lelithende lekukhontela lagcwala inkhatimulo yaJehova futsi bekunelifu lelingasuki etikwalo. Ema-Israyeli abengahambi nangabe lelifu lingakesuki etikwalelithende lekukhontela. Lalitsi lelifu lingaphakama, ahambe ayohlala kulenye indzawo. Abehlukana ekhatsi bese alandzela lelifu.