Uyini Umbono WaBoFakazi BaJehova Ngemingcwabo?

Imibono yetfu kanye naloko lesikwentako emngcwabeni sikusekela etimfundzisweni teliBhayibheli, letifaka ekhatsi leti letilandzelako:

• Kukahle kulilela bantfu lesibasitsandzako labashonile. Bafundzi baJesu bebabalilela bantfu lababatsandzako nabashonile. (Johane 11:33-35, 38; Imisebenti 8:2; 9:39) Ngenca yaloko, asitsatsi umngcwabo njengesikhatsi sekutijabulisa. (Umshumayeli 3:1, 4; 7:1-4) Kunaloko, sisebentisa lesikhatsi kuze sivelane nalabo labashonelwe.​—KubaseRoma 12:15.

• Labafile abati lutfo. Ngisho nobe sisive sini, asiwenti emasiko nemisimeto lesekela imfundziso letsi labafile bayaphila. (Umshumayeli 9:5, 6, 10) Lamasiko afaka ekhatsi, umlindzelo, imingcwabo ledulile, kugeza emanti, kwenta imihlatjelo yalabafile, kukhuluma nalabafile, kugcoka tinzilo kanye nemisimeto leyentiwa kuloshonelwe ngulashade naye. Asiwenti lamasiko nalemisimeto ngobe silalela lomyalo weliBhayibheli lotsi: “Nitehlukanise nabo, futsi ningatsintsi lutfo lolungcolile.”​—2 KubaseKhorinte 6:17.

• Likhona litsemba ngalabafile. LiBhayibheli lifundzisa kutsi labafile batawuvuswa futsi kufa kutawucedvwa. (Imisebenti 24:15; Sembulo 21:4) Lelitsemba lawasita emaKhristu ekucala futsi natsi liyasisita kutsi singalili njengebantfu labete litsemba.​—1 KubaseThesalonika 4:13.

• LiBhayibheli litsi sitfobeke. (Taga 11:2) Asikholelwa kutsi umngcwabo ulitfuba ‘lekubukisa’ ngaloko umuntfu lanako. (1 Johane 2:16) Asiyenti imingcwabo ledule kakhulu lenemabhokisi emngcwabo ladulile, nemiswenko leyentelwe kubukisa.

• Asitiphoceleli tinkholelo tetfu ngemngcwabo kulabanye. Kuloko, silalela lokushiwo liBhayibheli nalitsi: “Nkulunkulu utawehlulela umuntfu ngamunye kuye ngekwaloko lakwentile.” (KubaseRoma 14:12) Nobe kunjalo, nasitfola litfuba siyetama kubachazela ngetinkholelo tetfu “ngemoya lophansi nangenhlonipho lenkhulu.”​—1 Phetro 3:15.

Uchutjwa njani umngcwabo waBoFakazi?

Indzawo: Umndeni ungakhetsa kutsi utawentela kuphi umngcwabo, kungaba seHholeni leMbuso, ekhaya, lakushiswa khona bantfu labafile, nobe emathuneni.

Indlela yekuchuba umngcwabo: Kuba nenkhulumo leyentelwe kudvudvuta labashonelwe, lechaza ngaloko liBhayibheli lelikushoko ngekufa nangelitsemba lekuvuswa kwalabafile. (Johane 11:25; KubaseRoma 5:12; 2 Phetro 3:13) Kuloluhlelo lwemngcwabo kungakhulunywa ngebuntfu lobuhle balona loshonile, mhlawumbe kuvetwe naloko lesingakufundza ngesibonelo sakhe lesihle sekwetsembeka.​—2 Samuweli 1:17-27.

Kungahlatjelwa ingoma lesekelwe emiBhalweni. (KubaseKholose 3:16) Loluhlelo luphetfwa ngemthantazo lodvudvutako.​—KubaseFiliphi 4:6, 7.

Kubhadala nobe iminikelo: Asibhadalisi kuchuba luhlelo lwemngcwabo, futsi alihanjiswa lipulete lemnikelo emihlanganweni yetfu.​—Matewu 10:8.

Lababakhona kulomngcwabo: Nalabangasibo BoFakazi bakhululekile kuya emngcwabeni loseHholeni leMbuso, njengobe bakhululekile nekuya emihlanganweni yetfu.

BoFakazi bayaya yini emingcwabeni lechutjwa nguletinye tinkholo?

Fakazi ngamunye uyatincumela asebentisa nembeza wakhe loceceshwe liBhayibheli. (1 KuThimothi 1:19) Nobe kunjalo, asibi yincenye yemibutsano lengahambisani naloko liBhayibheli lelikushoko.​—2 KubaseKhorinte 6:14-17.