Ema-Israyeli esuka eNtsabeni iSinayi ahamba ayohlala ehlane lasePharani endzaweni lebitwa ngekutsi yiKhadeshi. Jehova watsi kuMosi: ‘Tfumela emadvodza langu-12 kutsi ayewuhlola live laseKhenani, live lengitalinika ema-Israyeli. Esiveni ngasinye sabokhokho benu ubotfumela indvodza yinye.’ Ngako Mosi wakhetsa emadvodza langu-12 futsi watsi kuwo: ‘Hambani niye eKhenani, nibohlola nekutsi lelive linotsile yini nobe cha. Nibuke nekutsi bantfu labahlala kulo banemandla yini nobe cha kanye nekutsi emadolobha alo abiyelwe yini nobe akakabiyelwa.’ Letinhloli letingu-12 lokufaka ekhatsi boJoshuwa naKhalebi besuka baya eKhenani.

Ngemuva kwemalanga langu-40, letinhloli tabuya tiphetse emakhiwa, emahananandza, nemagelebisi. Tafike tatsi: ‘Lihle lelive kepha bantfu labahlala khona banemandla kantsi nemadolobha abo labiyelwe makhulu kakhulu.’ Khalebi wase utsi: ‘Asikhuphukeni ngekushesha, ngobe nakanjani sitawulincoba.’ Uyati kutsi kungani Khalebi asho lamavi? Ngobe yena naJoshuwa bebametsemba Jehova. Kodvwa leletinye tinhloli letingu-10 tona tatsi: ‘Angeke sikhone kukhuphuka, bantfu lesibabonile bangemadvodza latidlakela futsi kuwo sifana netintsetse.’

Ema-Israyeli esaba. Acala kukhonona futsi atsi: ‘Asikhetseni umuntfu lotawuba ngumholi wetfu bese sibuyela eGibhithe! Nasingaya kulelive singafike sibulawe.’ BoJoshuwa naKhalebi batsi: ‘Kufanele ningamvukeli Jehova, nalabantfu ningabesabi ngobe Jehova utasivikela.’ Kodvwa ema-Israyeli awazange alalele. Aze afuna kubulala Joshuwa naKhalebi.

Wenta njani Jehova? Watsi kuMosi: ‘Kuyoze kube ngunini solo labantfu bangangihloniphi, nangetulu kwako konkhe lengibentele kona. Batawuhlala ehlane iminyaka lengu-40, futsi bafele khona. Kute ngisho namunye kini lotawungena kulelive lengafunga kutsi nitawuhlala kulo, ngaphandle kwaKhalebi, Joshuwa nebantfwabenu.’

Ngesikhatsi ema-Israyeli asehlane, boKhora, Dathani, Abiramu kanye nemadvodza langu-250 bavukela Mosi. Batsi kuye: ‘Sesidziniwe ngini! Kungani wena ungumholi bese kutsi Aroni yena ungumphristi lophakeme? Jehova akekho emkhatsisini wakho na-Aroni kuphela, kodvwa unatsi sonkhe?’ Jehova akazange ajabule. Wabona kutsi bebavukela yena.

Mosi wakhuluma naKhora nebalandzeli bakhe watsi: ‘Kusasa kufanele nite ethendeni lekukhontela, futsi nguloyo naloyo abotsatsa sitja sakhe sekufaka emalahle, afake imphepho kuso. Jehova utawuveta kutsi ngubani lamkhetsile.’

Ngelilanga lelilandzelako Khora kanye nemadvodza langu-250 baya kuMosi ethendeni lekukhontela. Nabefika lapho bashisa imphepho njengebaphristi. Jehova watsi kuMosi na-Aroni: ‘Khweshani eceleni kwaKhora nakulabo labamsekelako.’

Noma Khora aya kuMosi ethendeni lekukhontela, Dathani na-Abiramu kanye nemindeni yabo bala kuya. Jehova watsi kuma-Israyeli akasuke eceleni kwemathende aboKhora, Dathani na-Abiramu. Ngekushesha, ema-Israyeli asuka. Dathani, Abiramu kanye nemindeni yabo bema ngaphandle kwemathende abo. Umhlaba wavuleka wabagwinya. Ethendeni lekukhontela kwehla umlilo washisa Khora kanye nemadvodza labekanawo langu-250.

Jehova watsi kuMosi: ‘Ubotsatsa indvuku yinye yemholi wayo, ubhale libito lemholi ngamunye endvukwini yakhe. Endvukwini yakaLevi ubobhala libito la-Aroni. Ubotibeka ethendeni lekuhlangana, indvuku yaloyo lengimkhetsile itawumila timbali.’

Ngelilanga lelilandzelako, Mosi weta netindvuku latikhombisa baholi baleletinye tive. Indvuku ya-Aroni yamila timbali futsi bekunema-alimondi lavutsiwe. Ngalendlela, Jehova wakhombisa kutsi ukhetse Aroni kutsi abe ngumphristi lophakeme.