Ngesikhatsi tinhloli taka Israyeli tifika eJerikho tahlala endlini yaRahabi. Inkhosi yaseJerikho nayiva ngaloko yatfuma emasotja kutsi aye endlini yaRahabi. Wafihla letinhloli eluphahleni wase utjela lamasotja kutsi tihambile. Watsi kuletinhloli: ‘Ngitanisita ngobe ngiyati kutsi Jehova unani futsi utaninika lelive. Ngicela ningetsembise kutsi nitawusindzisa umndeni wakitsi.’

Letinhloli tatsi kuRahabi: ‘Siyakwetsembisa kutsi kute ngisho namunye losendlini yakho lotawulimala.’ Tachubeka tatsi: ‘Ubobopha lentsambo lebovu kulelifasitelo lakho, futsi umndeni wakho utawusindza.’

Rahabi wakhipha letinhloli efasitelweni ngentsambo. Taya entsabeni tahlala khona emalanga lamatsatfu tase tibuyela kuJoshuwa. Ema-Israyeli abese ewela umfula iJordani alungela kuhlasela lelive. IJerikho yaba lidolobha lekucala lalincoba. Jehova watsi abatungelete lelidolobha kanye ngelilanga kuze kuphele emalanga langu-6. Ngelilanga lesi-7, atungeleta lelidolobha tikhatsi letingu-7. Baphristi bashaya emacilongo abo, kwatsi emasotja amemeta kakhulu. Lubondza lwalelidolobha lwawa. Kodvwa indlu yaRahabi lebeyikulolubondza ayizange iwe. Rahabi nemndeni wakhe basindza ngobe bebetsembele kuJehova.

Tindzaba talokwenteka eJerikho tafika ngisho naseKhenani. Emakhosi aseKhenani ahlangana kuze alwe nema-Israyeli. Kodvwa baseGibeyoni beta nelicebo lelehlukile. Baya kuJoshuwa bagcoke timphahla letidzabukile, bafike batsi: ‘Sisuka eveni lelikhashane. Sivile ngaJehova nangako konkhe lanentela kona eGibhithe nakaMowabi. Sicela nisetsembise kutsi ngeke nisihlasele futsi tsine sitawuba tinceku tenu.’

Joshuwa wakwetsemba labakusho futsi wabetsembisa kutsi ngeke abahlasele. Ngemuva kwemalanga lamatsatfu, weva kutsi abasuki eveni lelikhashane. Bebasuka eKhenani. Joshuwa wabuta labaseGibeyoni watsi: ‘Nisiyengeleni?’ Baphendvula batsi: ‘Besesaba, futsi sati kahle kutsi Jehova Nkulunkulu wenu uyanilwela. Sicela ningasibulali.’ Joshuwa wasigcina setsembiso sakhe wangababulali.

Kungakapheli nesikhatsi lesidze, emakhosi langu-5 aseKhenani asongela baseGibeyoni. Joshuwa nelibutfo lakhe bahamba busuku bonkhe bayosindzisa baseGibeyoni. Bacala kulwa ekuseni kakhulu. EmaKhenani abaleka. Noma ngukuphi lapho bewabalekela khona Jehova wehlisa ematje lababulala. Ngako-ke Joshuwa wacela Jehova kutsi emise lilanga lingahambi. Kungani acela Jehova kutsi ente loko abe ati kahle kutsi lilanga alizange selime? Kungobe Joshuwa bekametsemba Jehova. Lilanga lema langashoni aze ema-Israyeli awancoba emakhosi aseKhenani kanye nemabutfo awo.