Jonathani abeyindvodzana lendzala yaSawula futsi abelisotja lelinesibindzi. Davide watsi Jonathani abeshesha njengelusweti futsi anemandla kwendlula libhubesi. Ngalelinye lilanga Jonathani wabona emasotja emaFilisti langu-20 entsabeni. Watsi kulomphatsela tikhali: ‘Sitawahlasela kuphela nangabe Jehova asiniketa luphawu. Nakatsi lamaFilisti asiye kuwo, kutawube kuluphawu lwekutsi asiwahlasele.’ EmaFilisti amemeta atsi: ‘Wotani nitekulwa natsi!’ Ngako lamadvodza lamabili anyukela entsabeni futsi avimbetela lamasotja.

Njengobe abeyindvodzana lendzala yaSawula, Jonathani bekaseluhlwini lwekuba yinkhosi lelandzelako. Jonathani bekati kutsi Jehova ukhetse Davide kutsi abe yinkhosi lelandzelako yaka-Israyeli kepha akazange abe nemona. BoJonathani naDavide baba bangani labakhulu. Betsembisana kutsi batawuvikelana futsi balwelane. Jonathani waniketa Davide lijazi lakhe, sikhali sakhe, butjoki bakhe kanye nelibhande lakhe, lokuyindlela yekukhombisa bungani.

Davide nakabalekela Sawula, Jonathani watsi: ‘Cina ube nesibindzi. Jehova ukhetse wena kutsi ube yinkhosi. Nababe uyakwati loko.’ Ungatsandza yini kuba nemngani lokahle lofana naJonathani?

Etikhatsini letinyenti wafaka kuphila kwakhe engotini kuze asite umngani wakhe. Bekati kutsi iNkhosi Sawula ifuna kubulala Davide, ngako watsi kubabe wakhe: ‘Utawube uyona nawubulala Davide ngoba kute lokubi lakwentile.’ Sawula wamkwatela Jonathani. Eminyakeni leyalandzela boSawula naJonathani bafa kanye kanye emphini.

Ngemuva kwekufa kwaJonathani, Davide wafuna indvodzana yaJonathani Mefiboshethi. Nakamtfola watsi kuye: ‘Ngenca yekutsi babe wakho bekangumngani wami lomkhulu, ngitakunakekela kuphila kwakho konkhe. Utawuhlala esigodlweni futsi udle nami etafuleni lami.’ Davide akazange amkhohlwe umngani wakhe Jonathani.

Ngesikhatsi Sawula sekafile, Davide waba yinkhosi. Abeneminyaka lengu-30 budzala. Ngemuva kweminyaka lembalwa, ngalobunye busuku eme etulu endlini yakhe, wabona umfati lomuhle. Lomfati bekunguBhatisheba futsi abengumfati wa-Uriya lobekalisotja. Davide watfumela kutsi kuletfwe Bhatisheba endlini yakhe. Waya naye ecasini futsi wakhulelwa. Davide wetama kusifihla sono sakhe. Watjela umholi wemphi kutsi abobeka Uriya embili bese lalamanye emasotja ayakwesha kuye. Uriya wabulawa emphini wase Davide ushada naBhatisheba.

Jehova watibona tonkhe letintfo letimbi Davide latenta. Wenta njani? Watfumela umphrofethi Nathani kuDavide. Nathani watsi: ‘Indvodza lenjingile beyinetimvu letinyenti, kodvwa lelephuyile beyinelizinyane lemvu lebeyilitsandza kakhulu. Lendvodza lebeyinjingile yayitsatsa lemvu yalendvodza lephuyile lekuphela kwayo.’ Davide watfukutsela wase utsi: ‘Lendvodza lenjingile kufanele ife noma kanjani!’ Nathani watsi kuDavide: ‘Nguwe lendvodza lenjingile!’ Davide weva buhlungu kakhulu wase uvuma liphutsa lakhe kuNathani watsi: “Ngonile kuJehova.” Lesono saba nemiphumela lebuhlungu kuDavide nemndeni wakhe. Jehova wamjezisa Davide kodvwa akazange ambhubhise ngobe abetsembekile futsi atfobekile.

Davide abefuna kwakhela Jehova lithempeli kodvwa Jehova wakhetsa indvodzana yakhe Solomoni kutsi ilakhe. Davide wacala kufunela Solomoni tintfo tekulakha wase utsi: ‘Lithempeli laJehova kufanele libe lihle kakhulu. Solomoni usemncane kodvwa ngitamsita sente emalungiselelo ekulakha.’ Davide wanikela ngemali yakhe lenyenti kute kwakhiwe lelithempeli. Wafuna nebantfu labakwati kahle kwakha. Wafuna ligolide nelisiliva wase utsenga nemisedari eThire naseSidoni. Nasekatawufa, Davide watjela Solomoni kutsi kufanele alakhe njani lelithempeli. Watsi kuye: ‘Jehova utse angikubhalele letintfo phansi. Jehova utakusita. Ungesabi, cina ube nesibindzi wente lomsebenti.’