Ngesikhatsi Solomoni sekayiNkhosi ka-Israyeli, Jehova wambuta watsi: ‘Yini longatsandza kutsi ngikunike yona?’ Solomoni watsi: ‘Ngisengumfanyana nje futsi ngite lwati lwekubusa bantfu. Ngicela ungiphe kuhlakanipha ngitewukhona kwehlulela bantfu bakho.’ Jehova watsi: ‘Ngobe ucele kuhlakanipha, kute lotawuhlakanipha njengawe emhlabeni. Ngitakwenta unjinge kakhulu futsi nangabe ungilalela ngitakunika imphilo lendze.’

Solomoni wacala kwakha lithempeli. Wasebentisa ligolide, lisiliva, sigodvo nematje. Tinkhulungwane temadvodza nebafati labanemakhono tasebenta ekwakheni lelithempeli. Ngemuva kweminyaka lengu-7, umsebenti wekwakha lithempeli besewuphelile futsi besekufanele liniketelwe kuJehova. Bekuneli-al’thare futsi kunemihlatjelo yekushiswa. Solomoni waguca embikwaleli-al’thare futsi wathantaza watsi: ‘Awu! Jehova, ngisho emazulu, emazulu laphakeme kakhulu angeke akwetfwale; kangakanani-ke lendlu lengiyakhile, sicela wemukele kukhonta kwetfu futsi ulalele imithantazo yetinceku takho.’ Yini Jehova layicabanga ngelithempeli nangemthantazo waSolomoni? Nakacedza kuthantaza, kwehla umlilo wafike washisa umhlatjelo lebewuselatini. Jehova walemukela lelithempeli. Nakabona loku ema-Israyeli ajabula kakhulu.

INkhosi Solomoni yatiwa ngekuhlakanipha kwayo esiveni sonkhe saka-Israyeli nasetindzaweni letikhashane. Bantfu bebeta bacele lusito kuSolomoni ngetinkinga tabo. Ngisho nendlovukazi yaseSheba yeta kutotibonela kuhlakanipha kwaSolomoni futsi yambuta imibuto lematima. Nayiva timphendvulo taSolomoni yatsi: ‘Angikakukholwa loko bantfu labangitjele kona ngawe, kodvwa sengiyabona kutsi kuhlakanipha kwakho kukwendlula khashane loko lengikuvile ngawe. Nkulunkulu wakho Jehova ukubusisile.’ Sive saka-Israyeli besihleli kahle futsi sijabulile. Kepha tintfo besetitawushintja.

Ngesikhatsi Solomoni akhonta Jehova, bekunekuthula ka-Israyeli. Ngekuhamba kwesikhatsi, Solomoni waba nebafati labanyenti futsi bebakhonta titfombe. Kancane kancane Solomoni washintja futsi naye wacala kukhonta titfombe. Jehova watfukutsela. Watsi kuSolomoni: ‘Sengitawutsatsa umbuso kuwe futsi ngiwehlukanise ekhatsi, incenye lenkhulu ngitayinika inceku yakho, bese kutsi incenye lencane ngiyinike umndeni wakho.’

Jehova wacacisa lesincumo sakhe ngalenye indlela. Asahamba endleleni, Jerobowamu lobekasisebenti saSolomoni wahlangana na-Ahiya umphrofethi. Ahiya wadzabula ingubo yakhe yaba ticucu letingu-12 wase utsi kuJerobowamu: ‘Jehova utamemuka Solomoni umbuso waka-Israyeli futsi awehlukanise ekhatsi. Titsatsele ticucu letingu-10 ngobe wena utakunika tive letingu-10.’ Inkhosi Solomoni yeva ngaloku futsi yafuna kubulala Jerobowamu. Ngako Jerobowamu wabaleka waya eGibhithe. Ngekuhamba kwesikhatsi, Solomoni wafa futsi indvodzana yakhe Rehobowamu yaba yinkhosi. Ngemva kwekufa kwaSolomini, Jerobowamu wabuyela ka-Israyeli.

Emadvodza lamadzala aka-Israyeli atsi kuRehobowamu: ‘Nangabe wena ungenta kutsi lomsebenti lomatima ube melula, tsine sitawuba ngakuwe.’ Kodvwa bangani baRehobowamu labasebasha batsi: ‘Banike umsebenti lomnyenti labantfu! Bente basebente kamatima!’ Rehobowamu walalela bangani bakhe. Wabaphatsa kabi labantfu futsi bamjikela. Babeka Jerobowamu kutsi abe yinkhosi yetive letingu-10 lebetatiwa ngekutsi ngumbuso waka-Israyeli. Leleminye imibuso lemibili yona yatiwa ngekutsi ngumbuso wakaJuda futsi beyetsembekile kuRehobowamu. Letive letingu-12 taka-Israyeli tabese tihlukana ekhatsi.

Jerobowamu bekangafuni kutsi bantfu bakhe bayokhonta eJerusalema lapho bekunembuso waRehobowamu khona. Uyati kutsi leni? Jerobowamu abesaba kutsi batamjikela bese basekela Rehobowamu. Ngako wenta ematfole eligolide lamabili wase utsi kulabantfu: “Kuyintfo lematima kini kukhuphukela eJerusalema. NanguNkulunkulu wenu.” Labantfu bakhonta lamatfole futsi base bayamkhohlwa Jehova.