Ngesikhatsi sesomiso Jehova watsi ku-Elija: ‘Hamba uye eSarefathi. Umfelokati lolapho utakunika kudla.’ Esangweni lalelidolobha, Elija wabona umfelokati atfota tinkhuni. Wacela emanti ekunatsa. Nakasayolandza lamanti lomfelokati, Elija wambita watsi: “Ngicela ungiphatsele nelucetu lwesinkhwa.” Lomfelokati waphendvula watsi: ‘Ngite sinkhwa, sengisele nafulaha lomncane kanye nemafutsa lamancane.’ Elija watsi kuye: ‘Jehova wetsembise kutsi nangabe wentela mine kucala lesinkhwa, fulaha wakho nemafutsa akho angeke aphele kuze kube ngulapho imvula ina.’

Ngako lomfelokati wabuyela ekhaya wafike wentela lomphrofethi waJehova sinkhwa. Njengobe Jehova abetsembisile, lomfelokati nendvodzana yakhe baba nekudla ngesikhatsi sesomiso. Fulaha wabo nemafutsa abo akuzange kuphele.

Kwase kwenteka intfo lebuhlungu. Lomntfwana walomfelokati wagula kakhulu futsi wafa. Lomfelokati wancenga Elija kutsi amsite. Elija watsatsa lomfana waya naye ekamelweni lelisetulu. Wafike wayilalisa embhedzeni wase uyathantaza utsi: ‘Jehova, ngicela aphindze aphile lomntfwana.’ Ucabanga kutsi kungani kumangalisa kutsi Jehova abengenta intfo lenje? Kungenca yekutsi kute umuntfu lobekake wavuswa ngaleso sikhatsi. Lomfelokati nalendvodzana yakhe bebangesiwo ngisho nema-Israyeli.

Kodvwa lomfana wavuka futsi wacala kuphefumula. Elija watsi kulomfelokati: “Buka-ke, indvodzana yakho seyiyaphila.” Lomfelokati wajabula kakhulu waze watsi ku-Elija: “Nyalo sengiyati kutsi ungumuntfu waNkulunkulu nekutsi livi laJehova leliphuma emlonyeni wakho liliciniso.”

Ihleti ngasefasitelweni endlini yayo eJezreyeli, iNkhosi Ahabi yabona insimu yemagilebisi yaNabothi. Ahabi abesifuna lesivini futsi wetama kusitsenga kuNabothi. Kepha Nabothi wala kumtsengisela ngobe bekuphambene nemtsetfo waJehova kutsengisa lifa. Ahabi wamhlonipha yini Nabothi ngekwenta intfo lenhle? Cha. Ahabi wakwata kakhulu. Waphatseka kabi wangakhoni ngisho nekuphuma ekamelweni lakhe futsi wala nekudla.

Umfati wa-Ahabi lonenhlitiyo lembi, indlovukazi Jezebeli watsi kuye: ‘Wena uyinkhosi yaka-Israyeli. Ungatfola noma yini loyifunako. Mine ngitakunika lesivini saNabothi waseJezreyeli.’ Wabhalela labadzala belidolobha incwadzi wabatjela kutsi ababeke Nabothi licala lekwetfuka Nkulunkulu futsi bamgcobe ngematje aze afe. Labadzala belidolobha benta loko lebekabatjele kona Jezebeli, wase utsi ku-Ahabi: ‘Nabothi sewufile. Lensimu yemagilebisi seyakho.’

Nabothi akusiye yena yedvwa umuntfu longenacala lowabulawa nguJezebeli. Banyenti bantfu lababulala labatsandza Jehova. Bebakhonta titfombe futsi enta naletinye tintfo letimbi. Jehova watibona tonkhe letintfo letimbi lebetentiwa nguJezebeli. Bekatamjezisa ngani?

Ngemva kwekufa kwa-Ahabi, indvodzana yakhe Jehoramu yaba yiNkhosi. Jehova watfumela Jehu kutsi ayojezisa Jezebeli nemndeni wakhe.

Jehu wagibela encoleni yakhe waya eJezreyeli lapho bekuhlala khona Jezebeli. Jehoramu waya encoleni yaJehu futsi wambuta watsi: “Ute ngekuthula yini?” Jehu watsi: ‘Kungaba khona kanjani kuthula nangabe make wakho Jezebeli asenta tintfo letimbi?’ Jehoramu wetama kujikisa Jehu kutsi abuyele emuva. Kepha Jehu wadubula Jehoramu ngebutjoki, wafa khona lapho.

Jehu wase uya esigodlweni saJezebeli. Watsi nakeva kutsi Jehu uyeta, watilungisa kahle, wakama kahle netinwele takhe, wema ngasefasitelweni. Nakefika Jehu, Jezebeli wambingelela ngekumkhahlameta. Jehu wamemeta tisebenti taJezebeli lebetime eceleni kwakhe watsi: “Mjikijeleni phansi!” Tamjikijela ngaphandle kwelifasitelo wawela phansi wafa.

Ngemuva kwaloko, Jehu wabulala emadvodzana a-Ahabi langu-70 futsi wacedza kukhonta kwaBhali eveni lonkhe. Uyabona yini kutsi Jehova wati konkhe futsi ngesikhatsi lesifanele uyabajezisa labo labenta tintfo letimbi?