Kuchuba Imihlangano Yelibandla Nge-Videoconferencing

Bohulumende labanyenti emhlabeni wonkhe abafuni kutsi bantfu basondzelane futsi bakuvalile kuhlangana ndzawonye. BoFakazi BaJehova batimesele kulalela labohulumende futsi ngesikhatsi lesifanako babe bahlangana ndzawonye ngendlela lephephile. Kuze sente njalo, emabandla sekasebentisa ema-videoconferencing app, njenge-Zoom, kuze achube imihlangano.

Kuze sihlale sichubeka nemihlangano yetfu, Sigungu Lesibusako sivumile kutsi kusetjentiswe umnikelo kuze kutsengelwe emabandla ema-account e-Zoom. Loku kuwasite kakhulu lamanye emabandla langakhoni kutitsengela ema-account e-videoconference langabita imali lengaba ngu-E249-E332 nobe ngetulu. Lamabandla bekakutfola kuncono kusebentisa ema-app amahhala lavuma kutsi kukhonekithe bantfu labancane kakhulu nalebekungakaphephi kuwasebentisa. Onkhe emabandla lasebentisa lama-account e-Zoom latsengwe yinhlangano ayakhona kusebentisa ema-security settings awo futsi bantfu labanyenti bangakhona kungena emihlanganweni. Kuze kube ngunyalo, emabandla langetulu kwa-65 000, emaveni langetulu kwa-170 asebentisa lama-account.

Libandla laseKairagi, eManado, eNorth Sulawesi, e-Indonesia, layekela kusebentisa i-videoconferencing app yamahhala lasebentisa i-account ye-Zoom letsengwe yinhlangano. UMzalwane Hadi Santoso uchaza utsi: “Ngisho nebazalwane nabodzadze labangaketayelani netintfo tebuchwephesha nyalo sebayijabulela yonkhe imihlangano, ngobe akusadzingeki kutsi baphume bangena emhlanganweni munye.”

Lester Jijón, Jr., longulomdzala welibandla laseGuayacanes Oeste, eGuayaquil, e-Ecuador, utsi: “Ngenca yekutsi bazalwane nabodzadze labanyenti bete kahle imali, lamanye emabandla bekangake akhone kubhadala i-license ye-Zoom lebeyingasita onkhe amalunga elibandla kutsi azuze emihlanganweni. Nyalo ngenca yalama-account e-Zoom latsengwe yinhlangano, bantfu labanyenti sebayakhona kungena kulemihlangano, sesiyakhona kumemela labanye emihlanganweni futsi asesabi kutsi sitawuba banyenti bese labanye abasakhoni kungena.”

Johnson Mwanza, longulomdzala ebandleni laseNgwerere North, eLusaka, eZambia, utsi: “Bazalwane nabodzadze labanyenti bahlale batsi, ‘lilungiselelo le-Zoom aligcini nje ngekusenta sitive sisondzelene nebazalwane nabodzadze, kepha lisenta sibone kutsi Jehova uyasitsandza futsi uyasinakekela.’”

Lama-account latsengwe yinhlangano atsengwe ngemali lebeyibekelwe eceleni kutsi isite nakuvela tehlakalo. Lemali itsetfwe emalini lenikelelwa umsebenti wemhlaba wonkhe. Linyenti laleminikelo lentiwa ku donate.jw.org. Sibonga kakhulu ngeminikelo yenu lephindze isite nakuvele tehlakalo emhlabeni wonkhe.—2 KubaseKhorinte 8:14.