Kuphumelela Kwemsebenti Wekwakha Ngaphambi Kwe-COVID-19

Njengoba kubhajatiswa bantfu labanyenti njalo ngemnyaka, kudzingeka takhiwo tenhlangano letengetiwe. Ngenca yalokwandza, Ematiko e-Local Design/Construction emhlabeni wonkhe aye ahlela kwakha nobe kulungisa takhiwo tekukhontela letingetulu kwa-2 700 kulomnyaka wemsebenti wa-2020.a

Ngalokudzabukisako, lamalungiselelo aphazanyiswa kuvela kwesifo i-COVID-19. IKomidi Yekushicilela YeSigungu Lesibusako iye yamisa imisebenti lemikhulu yekwakha emhlabeni wonkhe kuze ivumelane nemtsetfo wahulumende futsi kuvikelwe nebazalwane nabodzadze. Nobe kunjalo, emnyakeni wemsebenti wa-2020 kuye kwakhiwa futsi kwalungiswa tindzawo tekukhontela letingetulu kwa-1 700 ngaphambi kwekutsi kucale sifo i-COVID-19. Ngetulu kwaloko, emagatja langetulu kwa-100 acedvwa kwakhiwa. Asesibone kutsi kucedvwa kwemisebenti lemibili yekwakha kubazuzise njani bazalwane betfu.

Egatjeni lase-Cameroon. Ligatja lelidzala lebeliseDouala, belilincane kakhulu futsi bekudzingeka umsebenti lomkhulu wekulilungisa. Ikomidi Yekushicilela beyicabanga kulivusetela leligatja, kodvwa tindleko tekulivusetela betitawuba ngetulu kwemali lelingatsengiswa ngayo. Baphindze benta luhlolo kuze babone kutsi yini lebeyitawuphumelela emkhatsini wekutsenga indzawo bakhe kuyo nobe batsenge sakhiwo basilungise, kodvwa kokubili loku akuzange kuphumelele.

Ngesikhatsi lesifanako, bazalwane beva kutsi hulumende uhlela kwakha umgwaco lohamba eceleni kwalelinye lemaHholwa eMhlangano ngasenyakatfo yeDouala. Lomgwaco bewutakwenta kube melula kufika kuleligatja uphindze wente kube melula kutfola tintfo letitawulenta lisebentiseke. Loku ngiko kanye leligatja lebelikudzinga. Ngako Sigungu Lesibusako savuma kutsi kwakhiwe ligatja lelisha eceleni kweliHholwa leMhlangano.

BoFakazi kanye nalabanye bakhi labacashiwe basebenta ndzawonye kulomsebenti wekwakha, lokwasita ekongeni sikhatsi nemali. Ecinisweni, kwasetjentiswa imali lencane kunaleyo lebeyilidzelekile. Kongiwa imali lengetulu kwa-E32 709 200! Umndeni waseBethel watfutsela kulesakhiwo lesisha ngaphambi nje kwekutsi kubhedvuke i-COVID-19.

Simo lesihle sekuphila kanye nendzawo yekusebentela lekahle kwente umndeni waseBethel, eCameroon, watsatsa leligatja lelisha njengesipho lesivela kuJehova. Labanye labashadene batsi: “Sifuna kusebenta ngekutimisela, futsi singasitsatsi kalula lesipho.”

Lihhovisi Lekuhumusha siTojolabal (RTO), eMexico. Kwaphela iminyaka leminyenti licembu lebahumushi besiTojolabal lisebentela egatjeni leliseCentral America, lelisedvutane neLidolobha iMexico. Nobe kunjalo, lulwimi lwesiTojolabal lukhulunywa kakhulu e-Altamirano nase Las Margaritas, tindzawo letichele ngemakhilomitha langu-1 000 (620 mi)! Ngenca yaloko, bahumushi besiTojolabal bakutfola kumatima kuhambisana nendlela lolulwimi beselukhulunywa ngayo. Ligatja laba nebumatima kutfola bazalwane nabodzadze labahlala dvutane, labatawuhumusha baphindze barekhode lokulalelwako ngalolulwimi lwesiTojolabal.

Kungaleto tizatfu iKomidi Yekubhala yeSigungu Lesibusako yafuna kutfutsa lelicembu lebahumushi kutsi liye endzaweni lakukhulunywa khona lulwimi lwesiTojolabal. Kuze likhone kwenta loku, ligatja lancuma kutsenga sakhiwo futsi lisilungise. Kwenta kanjalo bekushiphile kunekwakha nobe kucasha emahhovisi.

Nakachaza indlela lakasitakele ngayo, lomunye umhumushi watsi: “Kuleminyaka lelishumi ngisebenta egatjeni njengemhumushi, angikaze sengihlangane nemndeni lohlala dvutane, lokhuluma lulwimi lwami. Nyalo lihhovisi letfu selisendzaweni lapho kukhulunywa khona siTojolabal. Onkhe malanga, ngicoca nebantfu labakhuluma siTojolabal. Ngifundze emagama lamasha lamanyenti futsi nemsebenti wami sewutfutfukile.”

Umsebenti Wekwakha Emnyakeni Wemsebenti Wa-2021

Emnyakeni wemsebenti wa-2021, timo nativuma, kuhlelwe kutsi kwakhiwe emaRTO langu-75 kanye netakhiwo tesikolwa seliBhayibheli. Kutawuchubeka nemisebenti yeligatja lemikhulu lengu-8, lokufaka ekhatsi kwentiwa kwemsebenti lomusha wasendlunkhulu eRamapo, leseNew York, kanye nekutfutsa ligatja lase-Argentina nelase Italy. Ngetulu kwaloko, kudzingeka emaHholwa eMbuso lamasha langetulu kwa-1 000, kunetindzawo tekuhlangana letingu-6 000 letingekho esimeni lesikahle, letidzinga kwakhiwa kabusha, kantsi futsi kunemaHholwa eMbuso langu-4 000 ladzinga kulungiswa.

Wonkhe lomsebenti wekwakha newekulungisa, usekelwa njani ngekwetimali? Umzalwane Lázaro González, lolilunga leKomidi yeliGatja laseCentral America, wawuphendvula lombuto nakakhuluma ngemsebenti wekwakha liHhovisi Lekuhumusha lulwimi lwesiTojolabal. Watsi: “Ensimini yeligatja letfu, site tintfo letinyenti. Ngako, ngaphandle kwelusito lwebazalwane emhlabeni wonkhe, besingeke sikhone kwakha emahhovisi ekuhumusha ebazalwane labakhuluma lulwimi lwemdzabu. Iminikelo yebazalwane labasemhlabeni wonkhe isite bahumushi bakhona kutfutsela emimangweni lekhuluma lololwimi. Sibabonga kakhulu bazalwane betfu labasemhlabeni wonkhe ngemoya wabo wekupha.” Kuliciniso, lemisebenti yekwakha beyingeke iphumelele ngaphandle kweminikelo yenu leyentelwe umsebenti wemhlaba wonkhe, leminyenti yayo leyentiwa ku-donate.jw.org.