Njalo ngemnyaka kubhajatiswa bantfu labasha labanyenti labakhuliswe BoFakazi BaJehova. Nawe ucabanga kubhajatiswa yini? Nangabe kunjalo, kudzingeka ucale wati kutsi kusho kutsini kutinikela nekubhajatiswa.

• Kuyini kubhajatiswa?

• Kuyini kutinikela?

• Kubaluleke ngani kubhajatiswa?

• Loko lokushiwo bontsanga yakho

• Lokungemanga nalokuliciniso

Kuyini kubhajatiswa?

Kubhajatiswa lokukhulunywa ngako eBhayibhelini kusho kucwiliswa ngalokuphelele emantini, hhayi nje kufafatwa ngemanti, futsi kumelela intfo lebaluleke kakhulu.

• Kucwiliswa emantini nawubhajatiswa kukhombisa labanye kutsi ngeke usaphilela kwenta lokujabulisa wena.

• Kukhishwa emantini kukhombisa kutsi sewucale imphilo lensha yekwenta lokujabulisa Nkulunkulu.

Nawubhajatiswa, ukhombisa labanye kutsi uyavuma kutsi Jehova unelilungelo lekusitjela kutsi yini lelungile nalengakalungi, futsi ukhombisa labanye kutsi wente setsembiso sekutsi utakwenta loko Nkulunkulu lafuna kutsi ukwente.

Longacabanga ngako: Yini lokufanele ikwente ufune kukhombisa labanye kutsi utawulalela Jehova kuko konkhe kuphila kwakho? Buka 1 Johane 4:19 neSembulo 4:11.

Kuyini kutinikela?

Ngaphambi kwekutsi ubhajatiswe, kufanele utinikele kuJehova uwedvwa. Kanjani?

Ngekutsi uthantaze, wetsembise Jehova kutsi utamkhonta kuze kube phakadze, futsi utawenta nobe yini lafuna kutsi uyente ngisho nobe kwentekani, futsi ngisho nobe labanye bakhetsa kwenta ini.

Kubhajatiswa kuyindlela yekukhombisa labanye kutsi sewutinikele kuJehova. Kukhombisa labanye kutsi awusatiphileli wena, nekutsi nyalo sewuwaJehova.​—Matewu 16:24.

Longacabanga ngako: Kuphila kwakho kuba ncono ngayiphi indlela nawuwaJehova? Buka Isaya 48:17, 18 naKumaHebheru 11:6.

Kubaluleke ngani kubhajatiswa?

Jesu watsi bafundzi bakhe kufanele babhajatiswe. (Matewu 28:19, 20) Ngako onkhe emaKhristu kufanele abhajatiswe. Ecinisweni, liBhayibheli litsi kubalulekile kuze sisindziswe.​—1 Phetro 3:21.

Nobe kunjalo, sizatfu lokufanele sikwente ubhajatiswe kutsi uyamtsandza Jehova futsi ubutsatsa njengalobuligugu buhlobo bakho naye. Indlela lotiva ngayo kufanele ifane neyemhlabeleli lowabhala watsi: “Ngitambonga ngani Jehova ngenca yako konkhe lokuhle langentele kona? . . . Ngitawubita libito laJehova. Tetsembiso lengitente kuJehova ngitawutifeza.”​—Tihlabelelo 116:12-14.

Longacabanga ngako: Ngutiphi tintfo letinhle Jehova lakwentele tona futsi ungambonga njani ngato? Buka Dutheronomi 10:12, 13 naKubaseRoma 12:1.

Nangabe uphila ngetimiso teliBhayibheli futsi wetama kuba nebuhlobo lobuhle naNkulunkulu, kungenteka sewuvele ucabanga ngekubhajatiswa. Yini lengakusita ubone kutsi sewukulungele kubhajatiswa?a

Kulesihloko

• Kunganani lokudzingeka ngikwati?

• Yini lokufanele ngabe ngiyayenta?

• Loko lokushiwo bontsanga yakho

Kunganani lokudzingeka ngikwati?

Kulungiselela kubhajatiswa akusho kutsi kufanele uwabambe ngenhloko onkhe emaciniso laseBhayibhelini, kube shengatsi uyobhala luhlolo esikolweni. Nobe kunjalo, kufanele usebentise ‘ingcondvo yakho’ kuze uciniseke kakhulu kutsi loko liBhayibheli lelikufundzisako kuliciniso. (KubaseRoma 12:1) Nasi sibonelo:

• Uyaciniseka yini kutsi Nkulunkulu ukhona nekutsi uyakufanela kukhontwa nguwe?

  LiBhayibheli litsi: “Loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela.”​—KumaHebheru 11:6.

  Tibute: ‘Yini lengenta ngikholwe kuNkulunkulu?’ (KumaHebheru 3:4) ‘Yini leyenta kube nesidzingo sekutsi ngimkhonte?’​—Sembulo 4:11.

  Lokunye lokungakusita: Buka sihloko lesitsi “Indalo Noma Ukuziphendukela Kwemvelo?​—Ingxenye 1: Kungani Kufanele Ukholelwe KuNkulunkulu?,” lesitfolakala ngesiZulu.

• Uyaciniseka yini kutsi umlayeto weliBhayibheli uvela kuNkulunkulu?

  LiBhayibheli litsi: “Yonkhe imiBhalo iphefumulelwe nguNkulunkulu, ilusito ekufundziseni, ekwekhuteni, ekulungiseni tintfo, nasekuyaleni ngekulunga.”​—2 KuThimothi 3:16.

  Tibute: ‘Yini lengenta ngiciniseke kutsi liBhayibheli alisiyo incwadzi lenemicabango yebantfu?’​—Isaya 46:10; 1 KubaseThesalonika 2:13.

  Lokunye lokungakusita: Buka sihloko lesitsi “Lingangisita Njani LiBhayibheli?​—Incenye 1: Hlolisisa LiBhayibheli Lakho.”

• Uyaciniseka yini kutsi Jehova usebentisa libandla lebuKhristu kuze afeze intsandvo yakhe?

  LiBhayibheli litsi: “Kufanele [Nkulunkulu] advunyiswe ngelibandla nangaKhristu Jesu kuto tonkhe titukulwane kuze kube phakadze naphakadze.”​—Kubase-Efesu 3:21.

  Tibute: ‘Lengikufundza emihlanganweni yelibandla ngikutsatsa njengalokuchamuka kubantfu yini nobe kuJehova?’ (Matewu 24:45) ‘Ngiyaya yini emihlanganweni yelibandla, ngisho nobe batali bami bangayi (nangabe bakuvumela)?’​—KumaHebheru 10:24, 25.

  Lokunye lokungakusita: Buka sihloko lesitsi “Kungani Kufanele Ngiye Emihlanganweni LebaseHholweni LeMbuso?”

Yini lokufanele ngabe ngiyayenta?

Akudzingeki kutsi ube bete sono kuze ubhajatiswe. Nobe kunjalo, kufanele ukhombise kutsi ufuna mbamba ‘kufulatsela lokubi, wente lokuhle.’ (Tihlabelelo 34:14) Nasi sibonelo:

• Uphila ngekuvumelana netimiso taJehova yini?

  LiBhayibheli litsi: “Hlalani ninanembeza lomuhle.”​—1 Phetro 3:16.

  Tibute: “Kuze kube ngunyalo, ngikhombise njani kutsi ‘ingcondvo’ yami iceceshiwe kuze ‘yehlukanise lokulungile nalokungakalungi’?” (KumaHebheru 5:14) ‘Tikhona yini timo lengitikhumbulako lapho ngamelana khona nekucindzetelwa bontsanga yami? Bangani bami bayangikhutsata yini kutsi ngente lokulungile?’​—Taga 13:20.

  Lokunye lokungakusita: Buka sihloko lesitsi “Ngingawuqeqesha Kanjani Unembeza Wami?,” lesitfolakala ngesiZulu.

• Uyacondza yini kutsi kufanele utfwale umtfwalo walokwentile?

  LiBhayibheli litsi: “Nkulunkulu utawehlulela umuntfu ngamunye kuye ngekwaloko lakwentile.”​—KubaseRoma 14:12.

  Tibute: ‘Ngetsembekile yini, futsi ngetsembekile yini kulabanye?’ (KumaHebheru 13:18) ‘Ngiyawavuma yini emaphutsa ami nobe ngetama kuwafihla futsi ngisole labanye ngawo?’​—Taga 28:13.

  Lokunye lokungakusita: Buka sihloko lesitsi “Ngingabhekana Kanjani Namaphutha Ami?,” lesitfolakala ngesiZulu.

• Bucinile yini buhlobo bakho naJehova?

  LiBhayibheli litsi: “Sondzelani kuNkulunkulu, naye utawusondzela kini.”​—Jakobe 4:8.

  Tibute: ‘Yini lengiyentako kuze ngisondzele kuJehova?’ Sibonelo nje, ‘Ngivamile yini kufundza liBhayibheli?’ (Tihlabelelo 1:1, 2) ‘Ngithantaza njalo yini?’ (1 KubaseThesalonika 5:17) ‘Ngicondza endzabeni yini nangithantaza? Bangani bami babangani baJehova yini?’​—Tihlabelelo 15:1, 4.

  Lokunye lokungakusita: Buka sihloko lesitsi “Lingangisita Njani LiBhayibheli?​—Incenye 2: Yenta Kufundza Kwakho LiBhayibheli Kujabulise” nalesitsi “Kungani Kufanele Ngithantaze?”

LONGAKWENTA: Kuze ukulungele kubhajatiswa, fundza sehluko 37 sencwadzi letsi Intsha Iyabuza​—Izimpendulo Ezisebenzayo, Umqulu 2, letfolakala ngesiZulu. Naka kakhulu lishadi lelisekhasini 308 na-309.

Kucabanga ngekutinikela kuJehova nekubhajatiswa kuyakwetfusa yini? Nangabe kunjalo, lesihloko sitakusita kutsi uncobe lokwesaba.

Kulesihloko

• Ngitawenta njani nangitawenta sono lesikhulu ngemuva kwekubhajatiswa?

• Ngente njani nangabe ngesaba tintfo lokufanele ngitente nasengibhajatisiwe?

• Ngente njani nangabe ngiva shengatsi akungifaneli kukhonta Jehova?

• Loko lokushiwo bontsanga yakho

Ngitawenta njani nangabe ngenta sono lesikhulu ngemuva kwekubhajatiswa?

Lokungakwenta ukhatsateke: Kungenteka ukhona lomatiko lowenta sono lesikhulu ngemuva kwekubhajatiswa, futsi wayekeliswa kuba nguFakazi. (1 KubaseKhorinte 5:11-13) Mhlawumbe ukhatsateke ngekutsi kutawenteka lokufanako nakuwe.

“Ngesikhatsi ngicala kucabanga ngekubhajatiswa, ngefikelwa kwesaba kutsi kungenteka ngone. Bengicabanga kutsi loko bekutawubahlaza kakhulu kubatali bami.”​—Rebekah.

Umbhalo loyinhloko: “Umuntfu lomubi akashiye indlela yakhe . . . Akabuyele kuJehova lotawuba nemusa kuye, abuyele kuNkulunkulu wetfu ngobe utamtsetselela ngekukhululeka lokukhulu.”​—Isaya 55:7.

Cabanga nganaku: Ngisho nobe toni letingaphendvuki tiyekeliswa kuba boFakazi, Jehova ubakhombisa umusa labo labatitfobako, baphendvuke futsi bavume kulungiswa nguye.​—Tihlabelelo 103:13, 14; 2 KubaseKhorinte 7:11.

Ngetulu kwaloko, liciniso likutsi ngisho nobe unesono, ungakhona kumelana netilingo ngekusitwa nguJehova. (1 KubaseKhorinte 10:13) Ekugcineni kwako konkhe, ngubani lokuncumela loko lotawukwenta? Nguwe, akusuye lomunye umuntfu.

“Bengesaba kutsi ngitawona nasengibhajatisiwe, kodvwa ngabese ngiyabona kutsi ngitawube ngenta liphutsa ngekutsi ngingabhajatiswa ngenca yaloko. Ngabese ngiyabona nekutsi akukafaneli ngivumele kwesaba tintfo lokungenteka tenteke kutsi tingivimbe.”​—Karen.

Ekugcineni kwako konkhe, nangabe ufuna, angeke usente sono lesikhulu, ngaleyo ndlela utawube ulingisa tikhonti taJehova letinyenti.​—KubaseFiliphi 2:12.

Lokunye lokungakusita: Buka sihloko lesitsi “Ngingamelana Kanjani Nezilingo?,” lesitfolakala ngesiZulu.

Ngente njani nangabe ngesaba tintfo lokufanele ngitente nasengibhajatisiwe?

Lokungakwenta ukhatsateke: Kungenteka bakhona labasebasha lobatiko labashiye imindeni yakubo nebangani kuze bayowentela Jehova lokunyenti. Ngako ukhatsateke ngekutsi bantfu batawulindzela kutsi nawe wente lokufanako.

“Kunyenti emaKhristu labhajatisiwe langakwenta ekukhonteni Jehova. Kodvwa lamanye awo asengakakulungeli, nobe timo tawo atiwavumeli kutsi ente lokunyenti.”​—Marie.

Umbhalo loyinhloko: “Nguloyo naloyo akahlole tento takhe, nakenta njalo utawujabula ngalakwentile, hhayi ngekutsi aticatsanise nalomunye umuntfu.”​—KubaseGalathiya 6:4.

Cabanga nganaku: Kunekutsi uticatsanise nalabanye bantfu, naka emavi lakuMakho 12:30 latsi: “Kufanele utsandze Jehova Nkulunkulu wakho ngayo yonkhe inhlitiyo yakho.”

Naka kutsi kufanele ukhonte Jehova ngenhlitiyo yakho yonkhe, hhayi ngenhlitiyo yalomunye. Nangabe umtsandza mbamba Jehova, utawufuna tindlela tekumentela lokuncono kakhulu kuye ngemandla akho.

“Nanobe kubhajatiswa kusincumo lesibaluleke kakhulu, kodvwa akusiwo umtfwalo. Nawunebangani labakahle, batawuhlale bakulungele kukusita. Nangabe ucala kancane kancane kwentela Jehova lokunyenti, loko kutakwenta ujabule. Nangabe ubalekela kubhajatiswa, utawube utilimata wena.”​—Julia.

Ekugcineni kwako konkhe, khombisa kutsi uyabonga ngendlela Jehova lakutsandza ngayo. Loko kutakwenta kutsi umentela lokuncono kakhulu.​—1 Johane 4:19.

Lokunye lokungakusita: Buka sihloko lesitsi “Nginokwethenjelwa Kangakanani?,” lesitfolakala ngesiZulu.

Ngente njani nangabe ngiva shengatsi akungifaneli kukhonta Jehova?

Lokungakwenta ukhatsateke: Jehova unguMbusi wendzawo yonkhe; bantfu balite nabacatsaniswa naye! Ungahle utibute kutsi Jehova uyati yini nekutsi ukhona.

“Ngenca yekutsi batali bami baBoFakazi BaJehova bengikhatsateka ngekutsi nginebuhlobo naJehova ngenca yaloko nangekutsi akusuye longidvonsele kuye.”​—Natalie.

Umbhalo loyinhloko: “Kute umuntfu longeta kimi ngaphandle kwekutsi Babe longitfumile amdvonse.”​—Johane 6:44.

Cabanga nganaku: Lokutsi nje ucabanga ngekubhajatiswa, kungenteka loko kukhombisa kutsi Jehova ukudvonsela kuye kuze ube ngumngani wakhe. Awufuni yini wena kuba ngumngani wakhe?

Khumbula nekutsi nguJehova, hhayi wena nobe lomunye umuntfu, lokhetsako kutsi ngubani latamdvonsela kuye. LiVi lakhe liyakucinisekisa kutsi nangabe ‘usondzela kuNkulunkulu, naye utawusondzela kuwe.’​—Jakobe 4:8.

“Lokutsi nje uyati ngaJehova futsi ukudvonsele kuye, loko kubufakazi bekutsi uyakutsandza. Ngako nangabe uva shengatsi akukufaneli kumkhonta, khumbula kutsi akavumelani naloko, futsi akwenteki ashaye phansi.”​—Selina.

Ekugcineni kwako konkhe, nangabe uphila ngekuvumelana naloko liBhayibheli lelikushoko ngalabo labafuna kubhajatiswa, loko kukhombisa kutsi ungamkhonta Jehova. Khumbula nekutsi kuyamfanela kutsi umkhonte.​—Sembulo 4:11.

Lokunye lokungakusita: Buka sihloko lesitsi “Kungani Kufanele Ngithantaze?”