Bangakhi boFakazi BaJehova lobatiko? Labanye betfu kungenteka babomakhelwane bakho, usebenta nabo, ufundza nabo esikolweni nobe mhlawumbe uke wacoca nabo ngeliBhayibheli. Sibobani vele tsine, futsi kungani sicocela labanye ngetinkholelo tetfu?

Sibantfu labavamile. Sivela etindzaweni nasetimeni tenhlalo letehlukahlukene. Labanye betfu bebasetinkholweni letehlukehlukene, kantsi labanye bebangakholelwa kuNkulunkulu. Nobe kunjalo, ngembikwekutsi sibe boFakazi, satinika sikhatsi sahlolisisa timfundziso teliBhayibheli. (Imisebenti 17:11) Savumelana naloko lesakufundza, ngemuva kwaloko satentela sincumo sekukhonta Nkulunkulu Jehova.

Siyazuza ngekutadisha liBhayibheli. Njengabo bonkhe bantfu, kufanele sibhekane netinkinga kanye nebutsakatsaka betfu. Ngekwenta imetamo yekusebentisa timiso teliBhayibheli ekuphileni kwetfu kwamalanga onkhe, siyente yaba ncono indlela lesiphila ngayo. (Tihlabelelo 128:1, 2) Lesi ngulesinye sizatfu lesenta sicocele labanye tintfo letinhle lesitifundze eBhayibhelini.

Siphila ngetimiso taNkulunkulu. Letimiso njengobe tifundziswa eBhayibhelini, tikhutsata inhlalakahle nenhlonipho ngalabanye bantfu kanye nesimo sekwetsembeka nemusa. Tinesandla ekwenteni kutsi bantfu basendzaweni lesihlala kuyo babe nemphilo lenhle nalezuzisako futsi tikhutsata bunye emindenini nekutiphatsa lokuhle. Siyaciniseka ngekutsi “Nkulunkulu akakhetsi libala lemuntfu,” futsi njengemalunga ebuzalwane bemhlaba wonkhe, sikhululekile elubandlululweni nakutembangalive. Nanobe sibantfu labavamile, kodvwa sehlukile.​—Imisebenti 4:13; 10:34, 35.

• BoFakazi BaJehova bafanana ngani nalabanye bantfu?

• Ngutiphi timiso boFakazi labatifundzile ngekutadisha liBhayibheli?

Bantfu labanyenti bacabanga kutsi boFakazi BaJehova ligama lenkholo lensha. Nanobe kunjalo, eminyakeni lengetulu kwa-2 700 leyendlulile, tinceku taNkulunkulu weliciniso betibitwa ngekutsi ‘bofakazi’ bakhe. (Isaya 43:10-12) Besatiwa ngekutsi siBafundzi beliBhayibheli kwate kwaba ngu-1931. Kungani sakhetsa kubitwa ngeligama lelitsi siboFakazi BaJehova?

Lembula Nkulunkulu wetfu. Emibhalweni yesandla yasendvulo, libito laNkulunkulu lelitsi Jehova, livela tikhatsi letitinkhulungwane eBhayibhelini. Emahumushweni lamanyenti lelibito likhishiwe kwafakwa ticu letitsi Nkhosi nobe Nkulunkulu. Nanobe kunjalo, Nkulunkulu weliciniso watembula yena kuMosi ngelibito lakhe lelitsi Jehova, watsi: “Leli-ke libito lami phakadze naphakadze.” (Eksodusi 3:15) Ngalendlela, watehlukanisa kubonkulunkulu bemanga. Siyatigcabha ngekwatiwa ngelibito laNkulunkulu lelingcwele.

Lichaza umsebenti wetfu. Bantfu labanyenti basendvulo, kusukela ku-Abela lobekalungile, baniketa bufakazi bekukholwa kwabo kuJehova. Emakhulwini eminyaka lendlulile, Nowa, Abrahama, Sara, Mosi, Davide nalabanye, bahlanganyela ‘nalesicumbi lesikhulu sabofakazi.’ (Hebheru 11:4–12:1) Njengemuntfu longase anikete bufakazi enkantolo ngemuntfu lote licala, natsi sitimisele kwenta liciniso ngaNkulunkulu wetfu latiwe.

Silingisa Jesu. LiBhayibheli limbita ngekutsi ‘ngufakazi lowetsembekile nalocinisile.’ (Sembulo 3:14) Jesu ngekwakhe watsi: “Ligama lakho ngilatisile” futsi wachubeka ‘afakazela liciniso’ ngaNkulunkulu. (Johane 17:6; 18:37) Ngako-ke, balandzeli baKhristu labacotfo kufanele bafakaze ngelibito laJehova futsi balente latiwe. Nguloko boFakazi BaJehova labatimisele kukwenta.

• Kungani Bafundzi beliBhayibheli sebabitwa ngeligama lelitsi boFakazi BaJehova?

• Jehova wacala nini kuba nabofakazi emhlabeni?

• Ngubani Fakazi lomkhulu waJehova?

LiBhayibheli labiketela kutsi ngemuva kwekufa kwaKhristu bekutawuvela bafundzisi bemanga emkhatsini wemaKhristu ekucala futsi bebatawulona liciniso leliBhayibheli. (Imisebenti 20:29, 30) Ngekuhamba kwesikhatsi, kwenteka loko. Bahlanganisa timfundziso taJesu netebucaba futsi ngaloko kwase kuvela buKhristu mbumbulu. (2 Thimothi 4:3, 4) Singaciniseka njani kutsi lamuhla sikucondza mbamba loko lokufundziswa liBhayibheli?

Sefika sikhatsi sekutsi Jehova embule liciniso. Wabiketela kutsi ‘esikhatsini sekugcina, lwati lweliciniso luyawuba lunyenti.’ (Danyela 12:4) Ngemnyaka wa-1870, licembu lelincane lebantfu labebafuna liciniso lacaphela kutsi timfundziso temasontfo lamanyenti betingakasekelwa emiBhalweni. Ngako-ke, lelicembu lacala kucwaninga kute licondze timfundziso tekucala teliBhayibheli, futsi Jehova walibusisa layicondza imibhalo.

Emadvodza lacotfo alitadisha ngekucophelela liBhayibheli. LaBafundzi beliBhayibheli labetsembekile bangesikhatsi lesendlulile, bacala indlela yekutadisha lesisayisebentisa nalamuhla. Bebatadisha livesi nelivesi. Nabatfola livesi lokumatima kulicondza, bebafuna lamanye emavesi kute alichaze. Nabafinyelela esiphetfweni lesivumelana nayo yonkhe imiBhalo, bebasibhala phansi. Ngekuvumela liBhayibheli kutsi litichaze, batfola liciniso ngelibito laNkulunkulu nangeMbuso, ngenjongo yakhe ngebantfu nangemhlaba, ngesimo salabafile kanye nangelitsemba leluvuko. Kucwaninga labakwenta kwabakhulula etinkholelweni nasemikhubeni leminyenti yemanga.​—Johane 8:31, 32.

Nga-1879 Bafundzi beliBhayibheli bacondza kutsi sikhatsi sekutsi liciniso lisakatwe sasesifikile. Ngako ngalowo mnyaka, bacala kushicilela magazini, Sicongosekulindza Simemetela UMbuso WaJehova, lesisawushicilela nalamuhla. Nyalo sihlanganyela emaciniso eliBhayibheli nebantfu labasemaveni langu-239 nangetilwimi langu-700. Lwati lweliciniso alukase lube lunyenti kangaka.

• Ngemuva kwekufa kwaKhristu, yini leyenteka ngeliciniso leliBhayibheli?

• Yini leyasisita kute sitfole emaciniso eVini laNkulunkulu?

Sekwendlule iminyaka leminyenti boFakazi BaJehova bashicilela futsi basakata emahumusho lehlukehlukene eliBhayibheli. Kodvwa-ke sabona sidzingo sekuphindze sihumushe liBhayibheli lelitakwenta kube melula kutsi bantfu “bafinyelele ekulatini liciniso,” lokuyintsandvo yaNkulunkulu ngawo wonkhe umuntfu. (1 Thimothi 2:3, 4) Ngako-ke, nga-1950 sacala kukhulula tincenye te-Lihumusho Lemhlaba Lomusha, liBhayibheli lelihunyushelwe elulwimini loluvakala kahle kubantfu. LeliBhayibheli lihunyushelwe etilwimini letingetulu kwa-130 ngekwetsembeka futsi linembile.a

Bekudzingeka liBhayibheli lelicondzakala melula. Tilwimi tishintjashintja njalo futsi emahumusho lamanyenti asebentisa emagama langatiwa nobe langasasetjentiswa, lokwenta kube matima kuwacondza. Kwatfolakala imibhalo yesandla yasendvulo leminyenti lenembile lesondzele kakhulu kulena yasekucaleni, lokwenta kwaba melula kucondza imiBhalo yesiHebheru, yesi-Aramu neyesiGriki.

Bekudzingeka lihumusho leletsembekile lelivi laNkulunkulu. Kunekutsi bashintje livi laNkulunkulu leliphefumulelwe, bahumushi beliBhayibheli kufanele betsembeke emibhalweni yasekucaleni. Nanobe kunjalo, emahumushweni lamanyenti, libito laNkulunkulu lelitsi Jehova, alisetjentiswa emiBhalweni Lengcwele.

Bekudzingeka liBhayibheli lelitawudvumisa umBhali walo. (2 Samuweli 23:2) Kule-Lihumusho Lemhlaba Lomusha libito laJehova libuyiselwe etindzaweni lapho belivela khona tikhatsi letingu-7 000 emiBhalweni yesandla yasendvulo, njengobe kuvetiwe kulesibonelo lesilapha ngentasi. (Tihlabelelo 83:18, NW) Ngesizatfu sekutsi kwatsatsa sikhatsi lesidze kucwaningisiswa, kuyajabulisa kufundza leliBhaybheli, njengobe liyindlulisela ngendlela lecacile imicabango yaNkulunkulu. Ngisho nobe unalo nobe ute Lihumusho Lemhlaba Lomusha ngelulwimi lwakho, sikukhutsata kutsi ufundze liVi laJehova onkhe malanga.​—Joshuwa 1:8; Tihlabelelo 1:2, 3.

• Kungani sabona sidzingo sekutsi kube neLihumusho Lelisha leliBhayibheli?

• Ngumuphi umkhuba lomuhle lokufanele wonkhe umuntfu lofuna kufundza intsandvo yaNkulunkulu abe nawo?