Enhlanganweni yetfu kute befundisi lababhadalwako. Kunaloko, kukhetfwa babonisi kutsi ‘beluse libandla laNkulunkulu’ njengobe bekwentiwa njalo ngesikhatsi kucaliswa libandla lebuKhristu. (Imisebenti 20:28) Labazalwane labanebuhlobo lobuhle naJehova bacondzisa libandla futsi baleluse “hhayi ngekucindzetelwa, kodvwa ngekutitsandzela; hhayi ngekufuna kutizuzisa, kodvwa ngekutimisela.” (1 Phetro 5:1-3) Ngumiphi imisebenti labasentela yona?

Bayasinakekela baphindze basivikele. Labadzala belibandla bayasicondzisa baphindze basite libandla kutsi lihlale lisondzele kuJehova. Ngesizatfu sekutsi bayacaphela kutsi Nkulunkulu ubanike lomsebenti lobalulekile, labadzala abatiphakamisi, kodvwa bayasisekela kute sijabule. (2 Khorinte 1:24) Labadzala betama kwati lilunga ngalinye lelibandla njengobe nemelusi anakekela imvu ngayinye ngesineke.​—Taga 27:23.

Basifundzisa indlela yekwenta intsandvo yaNkulunkulu. Liviki ngalinye labadzala bayacondzisa emihlanganweni yelibandla kute bacinise kukholwa kwetfu. (Imisebenti 15:32) Lamadvodza lakhutsele aphindze acondzise nasemsebentini wekushumayela, asebente natsi futsi asiceceshe kuto tonkhe tincenye talomsebenti.

Bayasikhutsata njengebantfu ngabanye. Kute basisite sicinise buhlobo betfu naJehova, labadzala bayasivakashela emakhaya etfu nobe bacoce natsi eHholweni leMbuso kute basisite baphindze basidvudvute ngemiBhalo.​—Jakobe 5:14, 15.

Ngetulu kwekwenta imisebenti yelibandla, labadzala baphindze bente nemisebenti yekutiphilisa neyekunakekela imindeni yabo, futsi loko kudzinga sikhatsi sabo lesinyenti. Kufanele sibahloniphe labazalwane labasebenta kamatima.​—1 Thesalonika 5:12, 13.

• Uyini umsebenti walabadzala ebandleni?

• Labadzala belibandla bakhombisa njani kutsi bayasikhatsalela?

LiBhayibheli lichaza emacembu lamabili emadvodza langemaKhristu lanakekela imisebenti yelibandla​—‘babonisi netinceku letisebentako.’ (Filiphi 1:1) Ngalokuvamile, ebandleni ngalinye kuba nalabadzala netinceku letisebentako letinyenti. Tinceku letisebentako tisentela miphi imisebenti lesizuzisako?

Tisita sigungu salabadzala. Bazalwane labatinceku letisebentako banebuhlobo lobucinile naJehova, betsembekile futsi bawenta ngekunaka umsebenti wabo, ngisho basebasha ngeminyaka nobe sebakhulile. Benta imisebenti lebalulekile yekunakekela libandla neliHholwa leMbuso. Loku kwenta kutsi labadzala bakhone kunaka imisebenti yekufundzisa nekwelusa.

Tenta imisebenti yelibandla. Bazalwane labatinceku letisebentako banganikwa umsebenti wekuba balindzi kute bemukele bonkhe labefikako emihlanganweni. Labanye bangalungisa imibhobho, basebente ehhovisini letincwadzi, banakekele imali yelibandla futsi bahlelele emalunga elibandla insimu. Baphindze basite ekunakekeleni liHholwa leMbuso. Labadzala belibandla bangabacela kutsi basite lasebakhulile ebandleni. Tinceku letisebentako tikulungele kwenta nobe ngumiphi imisebenti letiniketwa yona, futsi libandla liyatihlonipha ngekutinikela kwato.​—1 Thimothi 3:13.

Tibeka sibonelo lesihle njengemadvodza langemaKhristu. Bazalwane labatinceku letisebentako bakhetfwa ngobe basuke banebuntfu lobuhle bebuKhristu. Nangabe banetinkhulumo emhlanganweni, bayakucinisa kukholwa kwetfu. Ngekubeka sibonelo lesihle emsebentini wekushumayela, bayasikhutsata kutsi natsi sibe nenshisekelo. Batfutfukisa injabulo nebunye ebandleni ngobe babambisana kahle nalabadzala. (Efesu 4:16) Ngekuhamba kwesikhatsi, nabo bangafaneleka kutsi babe ngulabadzala.

• Tingemadvodza lanjani tinceku letisebentako?

• Letinceku tilisita njani libandla kutsi lichubeke lisebenta kahle?

ImiBhalo yemaKhristu yesiGriki ikhuluma kanyenti ngaBhanabasi nemphostoli Pawula. Lamadvodza abebabonisi labajikeletako futsi avakashela emabandla angaleso sikhatsi. Kungani bebawavakashela? Bebanesifiso lesicotfo sekuva ngenhlalakahle yebazalwane babo. Pawula watsi abefuna ‘kubuyela emuva avakashele bazalwane’ kute abone kutsi banjani. Abetimisele kuhamba emakhulu emakhilomitha kute ayobacinisa. (Imisebenti 15:36) Lamuhla babonisi betfu labajikeletako nabo banesifiso lesifananako.

Bayasikhutsata. Umbonisi wesigodzi ngamunye uvakashela emabandla langu-20 nobe ngetulu, kabili ngemnyaka uvakashela libandla ngalinye abe nalo liviki lonkhe. Singazuza kakhulu kulokuhlangenwe nako kwalabazalwane nebafati babo, nangabe bashadile. Benta lokusemandleni abo kute bati lasebakhulile nalabasebasha futsi bayakujabulela kuhamba natsi ensimini nalapho siyewuchuba tifundvo tetfu teliBhayibheli. Lababonisi bangasivakashela emakhaya bahamba nalabadzala kute basicinise. Emihlanganweni babeka tinkhulumo letisikhutsatako.​—Imisebenti 15:35.

Banendzaba natsi sonkhe. Babonisi labajikeletako bayanaka kutsi libandla linebuhlobo lobunjani naJehova. Baba nemhlangano nalabadzala netinceku letisebentako kute babone intfutfuko leyentekile ebandleni, baphindze babanikete teluleko labangatisebentisa nabenta imisebenti yelibandla. Basita emahlahlandlela kutsi aphumelele ekushumayeleni futsi bayakujabulela kwati labo labasandza kuba ngemalunga elibandla, beve nekutsi batfutfuka njani. Labazalwane batinikela ngekutitsandzela kute ‘babambisane emsebentini wekusikhonta.’ (2 Khorinte 8:23) Kufanele silingise kukholwa nekutinikela kwabo kuNkulunkulu.​—Hebheru 13:7.

• Iyini injongo yekuvakasha kwebabonisi labajikeletako emabandleni?

• Ungazuza njani kulokuvakasha kwabo?

Nakuvela inhlekelele, boFakazi BaJehova bacala kusebenta ngekushesha kute basite bazalwane babo labatsintsekile. Imetamo lenjalo ikhombisa bucotfo belutsandvo lesinalo emkhatsini wetfu. (Johane 13:34, 35; 1 Johane 3:17, 18) Sisita ngatiphi tindlela?

Sinikela ngemali. Ngesikhatsi kuba nendlala lenkhulu eJudiya, emaKhristu ekucala ase-Antiyokhi atfumela imali kumaKhristu aseJudiya. (Imisebenti 11:27-30) Ngalokufananako, natsi nasiva kutsi bazalwane betfu kuletinye tincenye temhlaba banetinkinga, sitfumela iminikelo njengemabandla kute sisite labo labatsintsekile.​—2 Khorinte 8:13-15.

Sisita ngetintfo letiphatsekako. Labadzala bakuleyondzawo leyehlelwe yinhlekelele, betama kutfola lilunga ngalinye lelibandla kute baciniseke kutsi bonkhe boFakazi labalapho batfolakele futsi baphephile. Ikomidi yelusito ingacondzisa kutfolakala kwekudla, emanti lahlobile, timphahla, indzawo yekuhlala nelusito lwetemphilo. BoFakazi labanyenti labanemakhono ladzingekile bayavolontiya kute bahlanganyele emsebentini wekuniketa lusito nobe kuvusetela tindlu nemaHholwa eMbuso. Bunye lesibujabulelako njengenhlangano nalokuhlangenwe nako lesikutfola ngekusebenta ndzawonye, kuyasisita kutsi sikhone kuhleleka masinyane nakuvela inhlekelele. Nanobe sisita ‘bendlu yaketfu yekukholwa,’ siyabasita nalabanye bakuletinye tinkholo nasikhona kwenta njalo.​—Galathiya 6:10.

Sibadvudvuta ngemiBhalo futsi sibasekele ngekwemivelo. Bantfu labehlelwe yinhlekelele bakudzinga kakhulu kudvudvutwa. Etikhatsini letinjalo, sitfola emandla lavela kuJehova, “Nkulunkulu longumtfombo wayo yonkhe indvudvuto.” (2 Khorinte 1:3, 4) Siyakujabulela kucocela labanye ngetetsembiso teliBhayibheli, sibanikete siciniseko sekutsi masinyane uMbuso waNkulunkulu utawuticedza tonkhe tinhlekelele letibangela buhlungu nekuhlupheka.​—Sembulo 21:4.

• Yini leyenta boFakazi bakhone kusita masinyane nakuvela tinhlekelele?

• Nguyiphi indvudvuto lesembhalweni lesingayiniketa labasindzile kuleto tinhlekelele?

Ngekushesha ngembikwekufa kwakhe, Jesu wacoca nebafundzi bakhe labane​—Phetro, Jakobe, Johane na-Andreya. Njengobe Jesu abebiketela ngeluphawu lwekuba khona kwakhe emalangeni ekugcina, wabuta lombuto lobalulekile: “Pho, ngubani losisebenti lesetsembekile nalesihlakaniphile, inkhosi yaso lesimise etikwebendlu yayo, kutsi sibanike kudla ngesikhatsi lesifanele?” (Matewu 24:3, 45; Makho 13:3, 4) Jesu abecinisekisa bafundzi bakhe kutsi yena ‘njengenkhosi’ yabo, abetawubeka bantfu labebatawuchubeka balungiselela balandzeli bakhe kudla kwakamoya emalangeni ekugcina. Bobani labebatawuba ngulesigaba sesisebenti?

Licembu lelincane lebalandzeli baJesu labagcotjiwe. ‘Lesisebenti’ sihlobene kakhulu neSingungu Lesibusako saBoFakazi BaJehova. Sikhiphela labo labakhonta nabo Jehova kudla kwakamoya ngesikhatsi lesifanele. Siyasidzinga lesisebenti lesetsembekile kutsi sichubeke sisinika ‘kudla lokusifanele ngesikhatsi lesifanele.’​—Lukha 12:42.

Sinakekela indlu yaNkulunkulu. (1 Thimothi 3:15) Jesu wanika lesisebenti umsebenti lomkhulu wekunakekela lokwentiwa yincenye yasemhlabeni yenhlangano yaJehova​—kunakekela tintfo tayo letiphatsekako, kucondzisa umsebenti wekushumayela nekusifundzisa emabandleni. Ngako-ke, kute sisinikete loko lesikudzingako ngesikhatsi lesifanele, ‘lesisebenti lesetsembekile nalesihlakaniphile’ sikhicita tincwadzi lesitisebentisa ensimini siphindze sisentele tinhlelo lesiba nato emihlanganweni lemincane nalemikhulu.

Lesisebenti setsembekile emacinisweni eliBhayibheli nasemsebentini lesiniketwe wona wekushumayela tindzaba letimnandzi. Sihlakaniphile nangendlela lesinakekela ngayo tintfo lesitiphatsiswe nguKhristu tasemhlabeni. (Imisebenti 10:42) Jehova uyawubusisa umsebenti waso ngekutsi advonse bantfu babe boFakazi bakhe futsi uyasisita lesisebenti kutsi sichubeke sisiniketa imfundvo lenyenti ngaye.​—Isaya 60:22; 65:13.

• Ngubani lowabekwa nguJesu kutsi ondle bafundzi bakhe ngakamoya?

• Lesisebenti setsembeke futsi sihlakaniphe ngatiphi tindlela?

Ngelikhulu lekucala leminyaka, licembu lelincane lelakhiwa ‘baphostoli nalabadzala eJerusalema,’ belisigungu lesibusako lebesentela libandla lemaKhristu lagcotjiwe tincumo letibalulekile. (Imisebenti 15:2) Ngekuhlola loko imiBhalo lekushoko nekulandzela sicondziso semoya longcwele waNkulunkulu, lesigungu besenta sincumo lesivumelana ngaso. (Imisebenti 15:25) Kwentiwa lokufananako nalamuhla.

Sisetjentiswa nguNkulunkulu kute sente intsandvo yakhe. Labazalwane labagcotjiwe labakha Sigungu Lesibusako balinaka kakhulu liVi laNkulunkulu futsi banalokuhlangenwe nako lokunyenti ekwenteni tincumo tekutsi umsebenti wetfu utawentiwa njani baphindze baphendvule imibuto lehlobene netenkholo. Bayahlangana liviki ngalinye kute bacoce ngetidzingo tebazalwane labasemhlabeni wonkhe. Njengasekhulwini lekucala, ticondziso letisekelwe eBhayibhelini tendluliselwa ngetincwadzi letiya emabandleni nobe ngebabonisi labajikeletako nalabanye. Loko kusita bantfu baNkulunkulu kutsi bacabange baphindze batiphatse ngendlela lefananako. (Imisebenti 16:4, 5) Sigungu Lesibusako sicondzisa kulungiswa kwekudla kwakamoya, sikhutsate bonkhe kutsi bawutsatse njengalobalulekile umsebenti wekushumayela ngeMbuso, siphindze sicondzise kunikwa kwebazalwane imisebenti lehlobene nekukhonta Nkulunkulu.

Siyasilalela sicondziso semoya longcwele waNkulunkulu. Sigungu Lesibusako setsembela kuMbusi Wendzawo Yonkhe, Jehova, nakuJesu loyiNhloko yelibandla, kute sitfole sicondziso. (1 Khorinte 11:3; Efesu 5:23) Emalunga aso awatiphatsi njengemakhosi ebantfu baNkulunkulu. LeSigungu sikanye nalamanye emaKhristu lagcotjiwe siyachubeka ‘silandzela liWundlu [Jesu] nome kukuphi lapho liya khona.’ (Sembulo 14:4) Sigungu Lesibusako sijabula kakhulu nasisithandazela.

• Bobani labebakha sigungu lesibusako ngelikhulu lekucala leminyaka?

• Sigungu Lesibusako sisifuna njani sicondziso saNkulunkulu lamuhla?

Ligama lesiHebheru lelitsi Bethel lisho ‘iNdlu yaNkulunkulu.’ (Genesisi 28:17, 19, umbhalo longentasi ku-Rbi8-E) Leligama liyatifanela takhiwo taboFakazi BaJehova letakhiwe emhlabeni wonkhe lapho umsebenti wekushumayela ucondziswa futsi usekelwe khona. Sigungu Lesibusako sisendlunkhulu yemhlaba wonkhe eNew York State, eMelika, futsi sicondzisa umsebenti lowentiwa emagatjeni lasemaveni lamanyenti. Njengelicembu, labo labasebenta kulamagatja batiwa ngekutsi ngemalunga emndeni waseBethel. Njengemndeni, bahlala ndzawonye, basebente ndzawonye, badle, baphindze bafundze liBhayibheli ndzawonye ngebunye.​—Tihlabelelo 133:1.

Iyindzawo lekhetsekile lapho emalunga emndeni asebenta khona ngekutinikela. Kuwo onkhe emaBethel, kunebazalwane nabodzadze labangemaKhristu latinikele kutsi ente intsandvo yaNkulunkulu futsi akhonte yena sikhatsi sonkhe. (Matewu 6:33) Akekho kuwo lotfola umholo ekupheleni kwenyanga, kodvwa bonkhe baniketwa indzawo lekahle yekuhlala baphindze batfole kudla nemadlana lencane yekunakekela tidzingo tabo. Bonkhe labaseBethel babelwe umsebenti lotsite, kungaba sehhovisi, ekhishini nobe endzaweni yekudlela. Labanye basebenta lapho kushicilelwa khona tincwadzi nobe lapho kuhlanganiswa khona emakhasi etincwadzi, labanye bahlanta tindlu tekuhlala, labanye basebenta lapho kuwashwa khona timphahla, labanye banakekela sakhiwo naleminye imisebenti.

Yindzawo lematasatasa lesekela umsebenti wekushumayela ngeMbuso. Umgomo loyinhloko wemaBethel kwenta emaciniso eliBhayibheli afinyelele kubantfu labanyenti. Lencwajana loyifundzako ibufakazi baloko. Ibhalwe ngekucondzisa kweSigungu Lesibusako, yendluliselwa ngeluhlelo lwabongcondvomshini kubahumushi labanyenti emhlabeni wonkhe, yashicilelwa kusetjentiswa imishini lenemandla nesivinini lesikhulu kumaBethel lamanyenti, yabese itfunyelwa emabandleni lange-tulu kwa-110 000. Kuko konkhe loku, imindeni yaseBethel iniketa lusito lolufanele kute kusekelwe lomsebenti lophutfumako wekushumayela tindzaba letimnandzi.​—Makho 13:10.

• Bobani labasebenta eBethel, futsi basekelwa njani?

• Ngumuphi umsebenti lophutfumako losekelwa nguloko lokwentiwa eBethel?

Emalunga emndeni waseBethel enta imisebenti leyehlukehlukene kute anakekele umsebenti wekushumayela welive linye nobe ngetulu. Enta umsebenti wekuhumusha, ashicilele bomagazini netincwadzi, asebente lapho kugcinwa khona tincwadzi, ente ema-CD nema-video nobe anakekele tidzingo tesifundza.

IKomidi Yeligatja icondzisa umsebenti lowentiwako. Sigungu Lesibusako siphatsise iKomidi Yeligatja leyakhiwa ngulabadzala labafanelekako labatsatfu nobe ngetulu kutsi banakekele lihhovisi leligatja. Lekomidi iyasitjela Sigungu Lesibusako ngentfutfuko leyentekako kulelo gatja, nangetinkinga letivela emaveni langephansi kwalo. Imibiko lenjalo isita Sigungu Lesibusako kutsi sikhetse tihloko lokufanele kucocwe ngato etincwadzini tetfu letilandzelako nasemihlanganweni yelibandla nalemikhulu. Labo labamelele Sigungu Lesibusako bayatfunywa kutsi bavakashele emagatja futsi banikete iKomidi Yeligatja sicondziso lesimayelana nemisebenti yalo. (Taga 11:14) Kuba neluhlelo lolukhetsekile lolufaka ekhatsi inkhulumo yemmeleli wendlunkhulu lekhutsata labo labahlala ensimini yeligatja.

Kusitwa emabandla endzawo. Bazalwane labafanelekako labasehhovisi leligatja bakhipha imvume yekutsi kwakhiwe emabandla lamasha. Labazalwane baphindze bacondzise umsebenti wemahlahlandlela, wetitfunywa telivangeli newebabonisi betigodzi labangephansi kwalelo gatja. Bahlela imihlangano lemikhulu, bacondzise umsebenti wekwakhiwa kwemaHholwa eMbuso lamasha baphindze banakekele tindzaba tekutfunyelwa kwabomagazini emabandleni kute kunakekelwe tidzingo tawo. Yonkhe imisebenti leyentiwa ehhovisi leligatja isita ekwenteni umsebenti wekushumayela ngekuhleleka.​—1 Khorinte 14:33, 40.

• IKomidi Yeligatja isisita njani Sigungu Lesibusako?

• Ngumiphi imisebenti leyentiwa ehhovisini leligatja?

Kute siphumelele ekushumayeleni “liVangeli, . . . etiveni tonkhe, nasemindenini yonkhe, nasetilimini tonkhe, nakubantfu bonkhe,” sishicilela tincwadzi ngetilwimi letingetulu kwa-700. (Sembulo 14:6) Siwenta njani lomsebenti lomatima kangaka? Siwenta ngelusito lwebabhali labasemhlabeni wonkhe kanye nebahumushi labangaba ngu-3 300​—bonkhe baboFakazi BaJehova.

Kucale kubhalwe ngesiNgisi. Sigungu Lesibusako sinakekela umsebenti lowentiwa liHhovisi Lekubhala lelisendlunkhulu yetfu yemhlaba wonkhe. Lelihhovisi licondzisa imisebenti yalababhali labasendlunkhulu neyalabo labasemahhovisini eligatja. Kuyasisita kakhulu kuba nebabhali labehlukehlukene ngobe siyakwati kubhala ngetihloko letitsintsa bantfu bebuve lobehlukehlukene futsi loko kwenta tincwadzi tetfu titsandvwe tive tonkhe.

Lomlayeto ubese utfunyelwa kubahumushi. Ngemuva kwekuhlolwa kwalomlayeto futsi sekuphume nemvume yekuwuhumusha, ubese utfunyelwa ngabongcondvomshini emacenjini ebahumushi labasemhlabeni wonkhe. Ecenjini ngalinye kuba nalohumushako, lomunye uhlola lomsebenti lohunyushiwe bese kutsi lomunye awufundze. Benta konkhe lokusemandleni abo kute bakhetse ‘emavi laliciniso’ latawuveta umcondvo lofanana nalowo losesiNgisini, ngelulwimi lwabo.​—Umshumayeli 12:10.

Bongcondvomshini bayawusheshisa lomsebenti. Ngcondvomshini angeke ukwati kwenta umsebenti webabhali newebahumushi. Nobe kunjalo, umsebenti walabahumushi uyaphangisa nabasebentisa tichazamagama naletinye tintfo tekucwaninga letitfolakala kubongcondvomshini. BoFakazi BaJehova batentele luhlelo lolubitwa ngekutsi yi-Multilanguage Electronic Publishing System (MEPS), kulo kufakwa kwatiswa lokubhalwe ngetilwimi letinyenti kanye netitfombe, lomsebenti ubese uhlelwa kahle kute ushicilelwe.

Kungani senta konkhe loku ngisho nasetilwimini letikhulunywa bantfu labambalwa nje kuphela? Kungobe intsandvo yaJehova ikutsi “tonkhe tinhlobo tebantfu tisindziswe, titfole nelwati lolungulonalona lweliciniso.”​—1 Thimothi 2:3, 4.

• Tibhalwa njani tincwadzi tetfu?

• Kungani sihumusha tincwadzi tetfu ngetilwimi letinyenti kangaka?

Inhlangano yetfu ishicilela iphindze isakate emakhophi langemakhulu etigidzi emaBhayibheli naletinye tincwadzi umnyaka nemnyaka, ngaphandle kwekubhadalisa. Sakha siphindze sinakekele emaHholwa eMbuso netakhiwo temagatja. Sisekela tinkhulungwane temalunga emndeni waseBethel netitfunywa telivangeli, siphindze sinikete lusito nakuvele inhlekelele. Ngako-ke ungase utibute: ‘Konkhe loku kusekelwa njani ngetimali?’

Asikhokhisi kwelishumi nobe sihambise lipulete. Nanobe titinkhulu tindleko tekusekela umsebenti wetfu wekushumayela, asihambi sicela imali. Eminyakeni lelikhulu leyendlulile, lomunye magazini we-Sicongosekulindza wachaza kutsi sikholelwa kutsi Jehova nguye losisekelako nekutsi “angeke size sicele nobe sincenge bantfu kutsi basisekele,” futsi asikaze sikwente loko.​—Matewu 10:8.

Imisebenti yetfu isekelwa ngeminikelo yekutitsandzela. Bantfu labanyenti bayawujabulela umsebenti wetfu wekufundzisa ngeliBhayibheli futsi bayanikela kute bawusekele. BoFakazi nabo bayakujabulela kunikela ngesikhatsi, ngemandla abo, ngemali nangaletinye tintfo kute kwentiwe intsandvo yaNkulunkulu emhlabeni wonkhe. (1 Tikhronike 29:9) EHholweni leMbuso, emihlanganweni lemincane nalemikhulu, kunemabhokisi emnikelo lapho nobe ngubani lofisako angafaka khona umnikelo. Ngalokuvamile, imali letfolakalako ivela kubantfu labangakanjingi, njengobe nje Jesu akhuluma ngemfelokati lobekaswele lowanikela ngetinhlavu letincane letimbili temali ebhokisini lemnikelo lebelisethempelini. (Lukha 21:1-4) Ngako-ke, nobe ngubani ‘angalondvolota loko lokumlingene’ kute anikele ngaloko ‘latincumele yena enhlitiyweni yakhe.’​—1 Khorinte 16:2; 2 Khorinte 9:7.

Siyaciniseka kutsi Jehova utawuchubeka atsintsa tinhlitiyo talabo labafuna ‘kumdvumisa ngalokuhle labanako’ kute basekele umsebenti weMbuso futsi intsandvo yakhe yentiwe.—Taga 3:9.

• Yini leyenta inhlangano yetfu yehluke kuletinye tinkholo?

• Isetjentiswa njani iminikelo yekutitsandzela?

Njengobe leligama lelitsi liHholwa leMbuso litichaza, imfundvo lokucocwa ngayo lesekelwe eBhayibhelini ikhuluma ngeMbuso waNkulunkulu, lobowusihloko semsebenti waJesu wekushumayela.​—Lukha 8:1.

Atindzawo tekukhonta kweliciniso emmangweni. EmaHholwa eMbuso atindzawo letisetjentiswa boFakazi BaJehova kute bahlele umsebenti wekushumayela lowentiwa kuleyo ndzawo. (Matewu 24:14) LamaHholwa eMbuso ayehlukahluka ngebukhulu nangekwakhiwa, kodvwa onkhe atakhiwo letihloniphekile. Lamanyenti awo asetjentiswa ngemabandla lamabili nobe ngetulu. Kuleminyaka leyendlulile, sakhe emaHholwa eMbuso langemashumi etinkhulungwane (silinganiso salasihlanu ngelilanga) kute sinakekele kwandza emabandleni etfu. Sikhone njani kukwenta loko?​—Matewu 19:26.

Akhiwa ngeminikelo lefakwa esikhwameni sinye. Leminikelo itfunyelwa ehhovisini leligatja kute kube nemali yemabandla ladzinga kwakha nobe kuvusetela liHholwa leMbuso.

Akhiwa tisebenti tekutitsandzela letivela etindzaweni letehlukene. Emaveni lamanyenti kuhlelwe kutsi kube Nemacembu Ekwakhiwa KwemaHholwa EMbuso. Emacembu etisebenti tekutitsandzela nalabo labakwatiko kwakha, basuka ebandleni linye baye kulelinye lelikulelo live, baye ngisho nasetindzaweni letikhashane bayosita emabandla kutsi akhe emahholwa awo eMbuso. Kulamanye emave, BoFakazi labawati kahle umsebenti babekwe kutsi bacondzise kwakhiwa nekuvusetelwa kwemaHholwa eMbuso esifundzeni lababelwe kuso. Nanobe tisebenti letinyenti letinemakhono tasesifundzeni tibakhona ngekutitsandzela kunome ngukuphi lapho kwakhiwa khona, emalunga elibandla lakuleyo ndzawo nawo asebenta ngekutitsandzela njengobe kuchubeka loko kwakhiwa. Umoya waJehova nemetamo yemphefumulo wonkhe yebantfu bakhe yenta sikhone kukwenta konkhe loku.​—Tihlabelelo 127:1; Kholose 3:23.

• Kungani tindzawo tetfu tekukhontela tibitwa ngekutsi ngemaHholwa eMbuso?

• Yini leyenta sikhone kwakha emaHholwa eMbuso emhlabeni wonkhe?

Onkhe emaHholwa eMbuso aboFakazi BaJehova embula libito lelingcwele laNkulunkulu. Ngako-ke, kuhlanganyela ekuligcineni lihlobile, libukeka kahle futsi lilungiswe kahle, kulilungelo futsi kuyincenye lebalulekile yekukhonta kwetfu lokungcwele. Sonkhe singafaka sandla ekuligcineni lihlobile.

Ngemuva kwemihlangano ungahlanganyela ekulihlanteni. Nakuphela umhlangano ngamunye, bazalwane nabodzadze bahlanta liHholwa leMbuso bajabulile. Kanye ngeliviki, kwentiwa umsebenti lomkhudlwana wekulihlanta. Lomsebenti ucondziswa ngulomdzala welibandla nobe inceku lesebentako, babuka luhla lwaloko lokufanele kwentiwe. Kuye ngesidzingo, labanye bayatsanyela, bakolobhe, batsintsite tintfuli, balungise titulo, bakolobhe imithoyi, bawashe emafasitelo netibuko, bacitse tibi nobe basebente ngaphandle balungise lijalidi. Kanye ngemnyaka kuba nelilanga lekwenta umsebenti lomkhulu wekuhlanta. Nasihlanganyela nebantfwabetfu ekuhlanteni lihholwa, sisuke sibafundzisa kuyihlonipha indzawo yetfu yekukhontela.​—Umshumayeli 5:1.

Yiba nencenye ekulilungiseni. Kanye ngemnyaka, liHholwa leMbuso liyahlolwa ngekhatsi nangephandle. Ngemuva kwalokuhlolwa kwalo, liyalungiswa kute ligcineke lisesimeni lesikahle, futsi loko kuyasita ekunciphiseni tindleko letingakadzingeki. (2 Tikhronike 24:13; 34:10) LiHholwa leMbuso lelihlobile nalelinakekelwa kahle, liyindzawo lekahle kakhulu yekukhonta Nkulunkulu wetfu. Ngekuba nencenye kulomsebenti sisuke sikhombisa kutsi sisondzele kuJehova nekutsi siyatitsandza tindzawo tetfu tekukhontela. (Tihlabelelo 122:1) Kwenta njalo kuphindze kubangele kutsi sihlonishwe emmangweni.​—2 Khorinte 6:3.

• Kungani kungakafaneli singatinaki tindzawo tetfu tekukhontela?

• Ngumaphi emalungiselelo lentiwe kute kugcinwe liHholwa leMbuso lihlobile?

Ungatsandza yini kucwaninga kute ukhulise lwati lwakho lweBhayibheli? Uyafuna yini kwati ngembhalo lotsite, ngemuntfu, ngendzawo nobe ngentfo letsite lokukhulunywa ngayo eBhayibhelini? Uke watibuta yini kutsi liVi laNkulunkulu lingakusita njani ngentfo letsite lohlale uyicabanga? Nangabe kunjalo, yani emtatjeni waseHholweni leMbuso.

Unemathulusi lalusito ekucwaninga. Kusenekwenteka kutsi ute tonkhe tincwadzi letisekelwe eBhayibhelini taboFakazi BaJehova letitfolakala ngelulwimi lwakho. Kodvwa umtapo waseHholweni leMbuso unato tincwadzi letinyenti letisandza kukhululwa. Lomtapo ungase ube nemahumusho lamanyenti eliBhayibheli, sichazamagama lesikahle nalamanye emathulusi lalusito ekucwaninga. Ukhululekile kuwusebentisa lomtapo nayisengakacali imihlangano yelibandla nobe naseyiphumile. Nangabe kunangcondvomshini kulomtapo, kusenekwenteka unayo i-Watchtower Library. I-Watchtower Library inetincwadzi tetfu letinyenti futsi ilithulusi lokumelula kulisebentisa, lelingakusita kute ufune indzaba letsite, ligama nobe umbhalo.

Ulusito lolukhulu kubafundzi labaseSikolweni Semsebenti WemaKhristu. Nangabe ubhalisile kulesikolwa, ungakwati kuwusebentisa kahle umtapo waseHholweni leMbuso nawulungiselela inkhulumo yakho. Lomtapo kufanele unakekelwe ngumbonisi wesikolwa. Uyaciniseka kutsi tincwadzi letisandza kushicilelwa tikhona futsi tihlelwe kahle. Yena nobe loyo lokuchubela sifundvo angakusita kute utfole kwatiswa lokudzingako. Nobe kunjalo, akukafaneli kutsi tincwadzi titsatfwe kulomtapo kuhanjwe nato. Kufanele sitiphatse kahle letincwadzi futsi singabhali lutfo kuto.

LiBhayibheli liyachaza kutsi kute ‘sitfole lwati ngaNkulunkulu,’ kufanele sibe nesifiso sekulufuna “njengemcebo lofihliwe.” (Taga 2:1-5) Umtapo waseHholweni leMbuso ungakusita kute ucale kufuna lwati ngaNkulunkulu.

• Ngumaphi emathulusi ekucwaninga latfolakala emtatjeni waseHholweni leMbuso?

• Ngubani longakusita kute ukwati kuwusebentisa kahle lomtapo?

Jesu Khristu watjela balandzeli bakhe kutsi: “Akukhanye kukhanya kwenu embikwebantfu, kuze babone lokulungile lenikwentako, bese badvumisa uYihlo losezulwini.” (Matewu 5:16) Kute sente loko, sibusebentisa kahle bucwepheshe besimanjemanje lobufaka ekhatsi i-Internet. Likheli letfu le-Internet lelitsi jw.org, linekwatiswa lokusemtsetfweni lokumayelana netinkholelo nemisebenti yaboFakazi BaJehova. Yini letfolakala kulo?

Timphendvulo teliBhayibheli temibuto levame kubutwa. Ungatfola timphendvulo taleminye imibuto lebalulekile bantfu labake bayibuta. Lesitfupha yayo iyaphendvulwa kulelipheshana lelitsi Ungatsandza Yini Kwati Liciniso? lelitfolakala kulelikheli ngetilwimi letingetulu kwa-600. Ungaphindze utfole ne-Lihumusho Lemhlaba Lomusha ngetilwimi letingetulu kwa-130 naletinye tincwadzi letisekelwe eBhayibhelini, njengaletsi Lifundzisani Mbambambamba LiBhayibheli? nabomagazini labasandza kuphuma be-Sicongosekulindza ne-“Phaphama!” Linyenti laletincwadzi ungakhona kutifundza nobe utilalele kulelo kheli. Ungaphindze ukwati kutitsatsa kulo utifake ku-CD, ungatitfola nangeluhlelo lwe-PDF, nobe lwe-EPUB. Ungakhona nekuphrinta emakhasi lambalwa kute uwakhombise umuntfu lonenshisekelo yekufundza lokubhalwe ngelulwimi lwakhe. Ema-video ayatfolakala ngetilulwimi letinyenti tetandla. Ungakhona nekufaka ku-CD ema-drama eliBhayibheli lalalelwako, nema-drama eliBhayibheli labukelwako kanye nemculo lomnandzi longawulalela ngesikhatsi sakho.

Kwatiswa lokumayelana naboFakazi BaJehova. Lokunye lokutfolakalako tindzaba takamuva nema-video emsebenti wetfu wemhlaba wonkhe, tentakalo letitsintsa boFakazi BaJehova kanye nelusito lesiluniketile. Ungaphindze utfole nekwatiswa ngemihlangano letako nemakheli alamanye emahhovisi etfu eligatja.

Ngekusebentisa letindlela, senta kukhanya kweliciniso kukhanye kuto tonkhe tincenye temhlaba. Bantfu bakuwo onkhe emave bayazuza ngaloluhlelo, ngisho nebase-Antarctica. Sithandazela kutsi ‘livi laJehova lichubeke landza ngekushesha’ kuwo wonkhe umhlaba, kute kudvunyiswe Nkulunkulu.​—2 Thesalonika 3:1.

• Likheli lelitsi jw.org libasite njani bantfu labanyenti kutsi bati liciniso leliBhayibheli?

• Yini longatsandza kuyibuka ekhelini letfu le-Internet?