Bantfu labanyenti abasayi emasontfweni ngesizatfu sekutsi abasitfoli sicondziso nendvudvuto mayelana nebuhlobo babo naJehova. Kungani-ke kufanele uye emihlanganweni yebuKhristu lehlelwe boFakazi BaJehova? Yini lotayitfola kuyo?

Injabulo letfolakala ngekuba semkhatsini webantfu labanelutsandvo nalabakhatsalelanako. Ngelikhulu lekucala leminyaka, emaKhristu abehlelwa abe ngemabandla, bewaba nemihlangano kute akhonte Nkulunkulu, afundze imiBhalo futsi akhutsatane. (Hebheru 10:24, 25) Kuba sesimeni lesinjalo, bekuwenta ative asemkhatsini webangani beliciniso, lokubazalwane kanye nabodzadzewabo labangemaKhristu. (2 Thesalonika 1:3; 3 Johane 14) Natsi silandzela indlela lefananako lamuhla futsi siyajabula njengawo.

Tinzuzo tekusebentisa timiso teliBhayibheli. Njengasesikhatsini sekubhalwa kweliBhayibheli, emadvodza, bafati nebantfwana, bonkhe bebahlangana ndzawonye. Bazalwane labafanelekako basebentisa liBhayibheli kute basisite sicondze indlela yekusebentisa timiso talo ekuphileni kwetfu kwamalanga onkhe. (Dutheronomi 31:12; Nehemiya 8:8) Sonkhe singahlanganyela nangabe kuyinkhulumo ledzingidvwa netilaleli nalapho kuhlatjelwa, kute sikhombise litsemba lesinalo njengemaKhristu.​—Hebheru 10:23.

Sibusiso sekuciniswa kwekukholwa kwakho kuNkulunkulu. Kulelinye lemabandla angesikhatsi sakhe umphostoli Pawula watsi: “Nginesifiso lesikhulu sekunibona  .  kuze sikhutsatane, nguloyo akhutsateke ngekukholwa kwalomunye, ngekwenu nekwami.” (Roma 1:11, 12) Kuba semkhatsini wemakholwa lesikanye nawo kucinisa kukholwa nekutimisela kwetfu kuphila ngekuvumelana netimiso teliBhayibheli.

Siyakucela kutsi ube khona emihlanganweni yetfu lelandzelako kute nawe utibonele loko lesisandza kucoca ngako. Utawemukelwa ngelutsandvo. Kungenwa mahhala futsi kute lipuleti lemnikelo.

• Isekelwe kuphi imihlangano yetfu?

• Ngutiphi tinzuzo tekuya emihlanganweni yebuKhristu?

Ngisho nobe kufanele sihambe ehlatsini lelimnyama nobe esimeni selitulu lesibi, sihlale siya emihlanganweni yetfu yebuKhristu. Ngetulu kwetinkinga tekuphila nekudzinwa ngemuva kwekusebenta lilanga lonkhe, kungani boFakazi BaJehova benta imetamo yekuhlangana nalamanye emakholwa?

Kuyintfo lenhle enhlalakahleni yetfu. Akhuluma ngalabo lesihlanganyela nabo ebandleni, Pawula wabhala watsi: “Asinakane.” (Hebheru 10:24) Lamavi asho kwatana kancono nalamanye emaKhristu. Ngako-ke, lamavi alomphostoli asikhutsata kutsi sibakhatsalele labanye. Ngekwati imindeni yalamanye emaKhristu, sitawutfola kutsi labanye bakhonile kuncoba tinsayeya letifanana netetfu futsi bangasisita kutsi natsi sitincobe.

Kusenta sakhe bungani lobucinile. Emihlanganweni yetfu sihlangana ndzawonye hhayi nje nebantfu lesingabati, kodvwa nebazalwane nabodzadze lababangani betfu labasedvute. Ngaletinye tikhatsi sicitsa sikhatsi ndzawonye ekutijabuliseni lokwakhako. Kunatiphi tinzuzo kuhlangana lokunjalo? Kusifundzisa kutsatsa labanye njengalababalulekile, futsi loko kucinisa sibopho setfu selutsandvo. Nangabe bazalwane betfu bavelelwe tinkinga, sihlale sikulungele kubasita ngobe sakhe bungani lobucinile nabo. (Taga 17:17) Ngekutihlanganisa nawo onkhe emalunga elibandla, sikhombisa kutsi ‘siyakhatsalelana.’​—1 Khorinte 12:25, 26.

Sikukhutsata kutsi ukhetse bangani labenta intsandvo yaNkulunkulu. Bangani labanjalo, ungabatfola kuboFakazi BaJehova. Sicela ungavumeli nobe yini kutsi ikuvimbe ekutihlanganiseni natsi.

• Kungani kusizuzisa kuhlangana ndzawonye emihlanganweni yetfu?

• Utimisele kucala nini kuya emihlanganweni yetfu?

Emihlanganweni yebuKhristu yasendvulo bekuhlatjelwa, kuthandazwa, kufundvwa imiBhalo kuphindze kucocwe ngayo​—kwakungalandzelwa emasiko. (1 Khorinte 14:26) Ungalindzela lokufananako nasemihlangaweni yetfu.

Ticondziso tisekelwe eBhayibhelini futsi tiyasebenta. Ngetimphelasontfo, libandla ngalinye liyahlangana kute lilalele INkhulumo Yelinyenti lesekelwe eBhayibhelini leveta indlela imiBhalo lehlobana ngayo nekuphila kwetfu nesikhatsi lesiphila kuso. Lenkhulumo itsatsa imizuzu lengu-30. Sonkhe siyakhutsatwa kutsi sihambisane nesikhulumi nasifundza liBhayibheli. Ngemuva kwalenkhulumo, kuba neSifundvo se-Sicongosekulindza, lesitsatsa li-awa. Kuso emalunga elibandla avumelekile kutsi aphendvule nakufundvwa sihloko lesikumagazini lofundvwako we-Sicongosekulindza. Timphendvulo letiniketwa kulomhlangano tisisita kutsi sisebentise sicondziso seliBhayibheli ekuphileni kwetfu. Kufundvwa magazini lofananako emabandleni langetulu kwa-110 000 lasemhlabeni wonkhe.

Siyasitwa kutsi sitfutfukise emakhono etfu ekufundzisa. Siphindze sihlangane nasemkhatsini weliviki kusihlwa kute sibe neluhlelo lolunetincenye letintsatfu, Kuphila kwemaKhristu Nemsebenti Wawo, lokutsetfwe Kubhukwana Wekubhalela lophuma njalo ngenyanga. Incenye yekucala yalomhlangano, nguMcebo Losevini LaNkulunkulu losisita kutsi sitati kahle timfundziso letiseBhayibhelini libandla lelitatiko. Incenye yesibili, yincenye letsi Timisele Emsebentini Wekushumayela leba netinshumayelo letisibonelo tendlela yekucoca nebantfu ngeliBhayibheli. Umeluleki uyanaka, alalelisise kute akwati kusisita kutsi sitfutfukise emakhono etfu ekufundza newekukhuluma. (1 Thimothi 4:13) Incenye yekugcina, Kuphila KwemaKhristu, yona icoca ngekutsi singatisebentisa njani timiso teliBhayibheli ekuphileni kwetfu kwamalanga onkhe. Iphindze ihlanganise netincociswano letinemibuto netimphendvulo letisisita silicondze kahle liBhayibheli.

Kutawukujabulisa kakhulu kutfola imfundvo lesezingeni lelisetulu yeliBhayibheli nawuta kulemihlangano.​—Isaya 54:13.

• Yini lotayiva emihlanganweni yaboFakazi BaJehova?

• Ngumuphi umhlangano longatsandza kuta kuwo kulena lesiba nayo evikini?

Utinakile yini letitfombe letikulencwajana letikhombisa indlela lehloniphekile boFakazi BaJehova labembatsa ngayo nabaya emihlanganweni yabo yelibandla? Kungani siyinaka kangaka indlela lesembatsa siphindze sitilungise ngayo?

Kute sikhombise kutsi siyamhlonipha Nkulunkulu wetfu. Kuliciniso kutsi Nkulunkulu ubuka ngale kwendlela lesibukeka ngayo. (1 Samuweli 16:7) Nobe kunjalo, nasihlangene kute simkhonte, sifiso setfu kuhlonipha yena nebazalwane lesikanye nabo. Nangabe bekungadzingeka kutsi sime embikwelijaji enkantolo, kuliciniso kutsi besitayinaka indlela lesibukeka ngayo kute sihloniphe sikhundla salo. Ngendlela lefananako, kubukeka kwetfu nasiya emihlanganweni kukhombisa indlela lesimhlonipha ngayo “umehluleli wemhlaba wonkhe,” Nkulunkulu Jehova nendzawo lesimkhontela kuyo.​—Genesisi 18:25.

Kute sivete timiso lesiphila ngato. LiBhayibheli likhutsata emaKhristu kutsi ‘agcoke kahle, nangekuhluteka engcondvweni.’ (1 Thimothi 2:9, 10) Kwembatsa “kahle” kusho kungembatsi timphahla letidvonsa emehlo ebantfu, letivusa inkhanuko nobe letiveta umtimba. ‘Kuhluteka engcondvweni’ kusisita kutsi sikhetse timphahla letihloniphekile. Nobe kunjalo, letimiso tiphindze tisinikete inkhululeko yekutikhetsela. Indlela lesembatsa siphindze sitilungise ngayo ‘ihlobisa imfundziso yeMsindzisi wetfu’ iphindze ‘idvumise Nkulunkulu,’ ngaphandle kwelivi. (Thithusi 2:10; 1 Phetro 2:12) Ngekwembatsa kahle nasiya emihlanganweni, sisuke sitsintsa indlela bantfu labakubuka ngayo kukhonta Jehova.

Wemukelekile kuta eHholweni leMbuso ngisho nobe ute timphahla letisezingeni lelisetulu. Timphahla tetfu akudzingeki tidule nobe tibe semfashinini kute tifaneleke, kodvwa kufanele tihlobe tiphindze tizitse.

• Ibaluleke kangakanani indlela lesembatsa ngayo nasikhonta Nkulunkulu?

• Ngutiphi timiso letisicondzisako nasikhetsa kwekwembatsa nekwekutilungisa?

Nangabe utadisha liBhayibheli nalomunye waboFakazi BaJehova, kungenteka uyetama kulungiselela leso sihloko kusenesikhatsi. Kute uzuze kakhulu, kuhle kutsi wente lokufananako nangembikwekuya emihlanganweni yelibandla. Kuba nemiphumela lemihle nangabe sitentela luhlelo lwekulungiselela.

Khetsa kutsi utawutadishela kuphi futsi nini. Kunini lapho ukhona kugcilisa kahle ingcondvo? Kusekuseni ngeluvivi yini ngembikwekucala umsebenti wangalelo langa nobe kusihlwa nangabe bantfwana sebalele? Ngisho nobe ungakhoni kutadisha sikhatsi lesidze, hlela kutsi singakanani sikhatsi lotasisebentisa utadisha bese uyetama kutsi ungavumeli lutfo lukuphatamise. Funa indzawo lethulile futsi ususe tintfo letingakuphatamisa, ungavala umsakato, i-TV namakhalekhikhini. Kuthandaza ngembikwekutsi ucale kutadisha kungakusita unciphise kukhatsateka lokungenteka unako ngalelo langa kute ukhone kwenta ingcondvo yakho kutsi inake liVi laNkulunkulu.​—Filiphi 4:6, 7.

Dvwebela, ulungiselele kuphendvula. Cala ngekutfola kutsi lendzaba ikhuluma ngani. Cabanga ngesihloko saleyo ndzaba, utfole nekutsi tihlokwana tayo tihlobana njani naso. Bukisisa titfombe letikhona nemibuto yekubuketa legcizelela emaphuzu lamcoka. Ungabese uyasifundza sigaba ngasinye futsi ufune imphendvulo yembuto. Fundza imibhalo lekhonjiwe bese ucabangisisa ngekutsi iyisekela njani indzaba lokukhulunywa ngayo. (Imisebenti 17:11) Nangabe sewuyitfolile imphendvulo yembuto, dvwebela emagama lambalwa nobe imishwana leyinhloko kuleso sigaba letakusita kutsi uyikhumbule imphendvulo. Nasewusemhlanganweni, ungase uphakamisa sandla futsi unikete imphendvulo lemfishane ngemavi akho.

Ngekuhlolisisa tihloko letehlukehlukene lokucocwa ngato emihlanganweni liviki ngeliviki, utawukhona kwengeta “engcebeni” yakho yelwati lweBhayibheli.​—Matewu 13:51, 52.

• Nguluphi luhlelo longatentela lona lwekulungiselela imihlangano?

• Ungatilungiselela njani kutsi ukhone kuphendvula emhlanganweni?

Kusukela etikhatsini tasendvulo, Jehova abesolo afuna kutsi imindeni icitse sikhatsi ndzawonye kute yakhe buhlobo lobucinile naye iphindze itfutfukise budlelwane bayo. (Dutheronomi 6:6, 7) Kungako boFakazi BaJehova babeka sikhatsi sekukhonta ndzawonye bangumndeni kusihlwa liviki ngalinye. Lesikhatsi basisebentisela kucoca bakhululekile ngetintfo letitabasita ekukhonteni Jehova. Ngisho nobe uhlala wedvwa, lesi kungaba sikhatsi lesihle longasicitsa unaNkulunkulu, ucwaninga ngesihloko losikhetsile esifundvweni seliBhayibheli lotichubela sona.

Sikhatsi sekusondzela edvute naJehova. “Sondzelani kuNkulunkulu, naye utawusondzela kini.” (Jakobe 4:8) Simati kancono Jehova nasifundza ngemininingwane lemayelana nebuntfu bakhe nangetento takhe letiseVini lakhe liBhayibheli. Indlela lemelula yekucala kukhonta kwenu kwemndeni, kusebentisa incenye yaleso sikhatsi nifundza liBhayibheli ndzawonye, mhlawumbe nilandzele luhlelo lwamaviki onkhe lweSikolwa Semsebenti WemaKhristu. Lilunga ngalinye lemndeni lingabelwa kutsi lifundze tihloko letitsite bese nasenindzawonye nicoce ngaloko lenikufundze emiBhalweni.

Sikhatsi sekusondzelana nemalunga emndeni. Emadvodza nebafati, ngisho nebatali nebantfwana, bangacinisa budlelwane babo nangabe batadisha liBhayibheli bangumndeni. Kufanele kube sikhatsi onkhe emalunga emndeni lasibuka ngalabovu, lesijabulisako nalesinekuthula. Batali bangakhetsa tihloko lokutawucocwa ngato mhlawumbe letitfolakala ku-Sicongosekulindza ne-“Phaphama!” nobe ekhelini letfu le-Internet i-jw.org. Ningakhuluma ngenkinga bantfwana benu labahlangabetana nayo esikolweni nangendlela labangalwisana ngayo nayo. Ningase nijabulele kuphrakthiza tingoma letitawuhlatjelwa emihlanganweni, nekudla nanicedza kukhonta kwemndeni.

Lesikhatsi lesibalulekile sekukhonta Jehova nindzawonye liviki ngeliviki, sitawusita onkhe emalunga emndeni akujabulele kufundza liVi laNkulunkulu futsi naye utayibusisa imetamo leniyentako.​—Tihlabelelo 1:1-3.

• Kungani sihlela sikhatsi sekukhonta kwemndeni?

• Batali bangenta njani kutsi lesi kube sikhatsi lesijabulisako kuwo onkhe emalunga emndeni?

Kungani labantfu bajabulile? Kungobe bakulomunye wemihlangano yetfu. Njengetinceku taNkulunkulu tasendvulo lebetiniketwe sicondziso sekutsi tihlangane katsatfu ngemnyaka, natsi sihlale sikubuke ngalabovu kuhlangana njengelicembu lelikhulu. (Dutheronomi 16:16) Minyaka yonkhe, siba nemihlangano lemitsatfu: imihlangano yesigodzi leba kabili ngemnyaka letsatsa lilanga linye kanye nemhlangano wesifundza lotsatsa emalanga lamatsatfu. Sizuza njani kulemibutsano?

Icinisa buzalwane betfu bebuKhristu. Njengobe nema-Israyeli abejabulela kudvumisa Jehova “embikwemabandla lamakhulu,” natsi siyakujabulela kukhonta Jehova sindzawonye kulemibutsano lebalulekile. (Tihlabelelo 26:12; 111:1) Lemihlangano ivula ematfuba ekutsi sihlangane naboFakazi bakulamanye emabandla ngisho nabakulamanye emave. Ngesikhatsi selikhefu, sijabulela kudla ndzawonye endzaweni yemhlangano futsi loko kusenta sichubeke sijabulela budlelwane lobuhle. (Imisebenti 2:42) Sitibonela ngewetfu lutsandvo loluhlanganisa “bazalwane” betfu emhlabeni wonkhe.​—1 Phetro 2:17.

Iyasisita sitfutfukise buhlobo betfu naJehova. Ema-Israyeli azuza ‘ngekuwacondzisisa kahle lawo mavi’ emiBhalo lachazelwa wona. (Nehemiya 8:8, 12) Natsi siyatijabulela ticondziso teliBhayibheli lesititfola emihlanganweni yetfu. Luhlelo ngalunye lusekelwa emBhalweni. Tinkhulumo letimnandzi letifaka ekhatsi letiluchungechunge nalokuhlangenwe nako, tisifundzisa kutsi singayenta njani intsandvo yaNkulunkulu ekuphileni kwetfu. Siyakhutsateka nasiva lokuhlangenwe nako kwalabo labakhonako kuphila imphilo yebuKhristu kuletikhatsi letimatima. Emihlanganweni yesifundza, ema-drama labukelwako enta sitibone ngemehlo tindzaba lokukhulunywa ngato eBhayibhelini aphindze asifundzise tifundvo lesingatisebentisa. Kuyo yonkhe imihlangano, labo labatinikele kuNkulunkulu, bayabhajatiswa.

• Kungani imihlangano ingimibutsano lejabulisako?

• Ungazuza njani ngekuya emhlanganweni?

Ngembikwekutsi afe, Jesu watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.” (Matewu 24:14) Kodvwa-ke bewutawufezwa njani lomsebenti wekushumayela wemhlaba wonkhe? Bewungafezwa ngekulandzela sibonelo lesabekwa nguJesu nakasemhlabeni.​—Lukha 8:1.

Siya kubantfu emakhaya abo. Jesu wacecesha bafundzi bakhe kutsi bashumayele tindzaba letimnandzi emtini ngemuti. (Matewu 10:11-13; Imisebenti 5:42; 20:20) Labavangeli bangelikhulu lekucala leminyaka bebabelwe tindzawo letitsite lobekufanele bashumayele kuto. (Matewu 10:5, 6; 2 Khorinte 10:13) Nalamuhla, umsebenti wetfu wekushumayela uhlelwe kahle futsi libandla ngalinye labelwa insimu lelitayisebenta. Loko kusenta sikwati kufeza umsebenti Jesu lasitfuma kutsi siwente, “sishumayele kubantfu, sifakaze.”​—Imisebenti 10:42.

Senta konkhe lokusemandleni kute sifinyelele bantfu nobe kuphi labatfolakala khona. Jesu wasibekela sibonelo ngekutsi ashumayele etindzaweni lapho kwakunebantfu khona, letifaka ekhatsi eceleni kwelwandle nobe emitfonjeni yasemmangweni. (Makho 4:1; Johane 4:5-15) Natsi sicoca nebantfu ngeliBhayibheli nome kuphi lapho batfolakala khona​—esitaladini, etindzaweni temabhizinisi, emapaki na-ngelucingo. Nangabe kuvuleka litfuba, siyafakaza kubomakhelwane betfu, kulesisebenta nabo, kulesifundza nabo nasetihlotjeni tetfu. Wonkhe lomfutfo lesiwufakako wenta kutsi tigidzi tebantfu emhlabeni wonkhe tive tindzaba leti-mnandzi ‘tensindziso yakhe.’​—Tihlabelelo 96:2.

Ukhona yini locabanga kutsi ungamcocela tindzaba letimnandzi teMbuso waNkulunkulu nekutsi leto tindzaba tisho kutsini ngelikusasa lakhe? Ungawugcini kuwe lomlayeto welitsemba, wutjele nalabanye ngekushesha.

• Nguliphi “liVangeli” lokufanele silishumayele?

• BoFakazi BaJehova bayilingisa njani indlela yaJesu yekushumayela?

Leligama lelitsi “lihlahlandlela” livame kusetjentiswa kulabo labasebenta emasimini lamasha futsi babekele nalabanye sibonelo labangasilandzela. Jesu abefanana nelihlahlandlela, ngobe watfunywa emhlabeni kutsi atewenta umsebenti loniketa kuphila aphindze avule nendlela yekusindziswa. (Matewu 20:28) Lamuhla, balandzeli bakhe bayamlingisa ngekucitsa sikhatsi lesinyenti benta “bafundzi.” (Matewu 28:19, 20) Labanye bakhonile kuba ngemahlahlandlela.

Lihlahlandlela ngumshumayeli wasikhatsi sonkhe. Bonkhe boFakazi BaJehova babamemeteli betindzaba letimnandzi. Nanobe kunjalo, labanye bakhonile kuhlela timo tabo kute babe ngemahlahlandlela lavamile, basebente ema-awa langu-70 inyanga ngayinye emsebentini wekushumayela. Kute bakwati kwenta loku, labanye banciphise emalanga labawasebentako emisebentini yabo yekutiphilisa. Labanye bakhetfwa kutsi bakhonte njengemahlahlandlela lakhetsekile etindzaweni letinesidzingo lesikhulu sebamemeteli beMbuso. Bona bacitsa ema-awa langu-130 nobe ngetulu ensimini inyanga ngayinye. Lamahlahlandlela ayanetiseka ngekuphila imphilo lemelula, ngobe anelitsemba lekutsi Jehova utawunakekela tidzingo tawo tekuphila. (Matewu 6:31-33; 1 Thimothi 6:6-8) Labo labangakhoni kuba ngemahlahlandlela asikhatsi sonkhe, bangaba ngemahlahlandlela lasitako nangabe timo tibavumela, bashumayele ema-awa langu-30 nobe langu-50 ngenyanga.

Lihlahlandlela likhutsatwa lutsandvo ngaNkulunkulu nangebantfu. NjengaJesu, siyacaphela kutsi bantfu lamuhla bafuna kwati Nkulunkulu netinjongo takhe. (Makho 6:34) Tsine sinalo lwati lolungabasita nyalo, futsi lubanikete nelitsemba ngelikusasa. Lutsandvo ngebantfu lwenta lihlahlandlela linikele ngesikhatsi nangemandla alo kute licocele labanye tindzaba letimnandzi. (Matewu 22:39; 1 Thesalonika 2:8) Loku kuba nemiphumela lemihle, ngobe kukholwa kwelihlahlandlela kuyacina, lisondzela kakhulu kuNkulunkulu liphindze libe nenjabulo lengapheli.​—Imisebenti 20:35.

• Ungalichaza njani lihlahlandlela?

• Yini lekhutsata labanye kutsi babe ngemahlahlandlela asikhatsi sonkhe?

BoFakazi BaJehova bebasolo babonakala ngemfundvo levela kuNkulunkulu. Kunetikolwa letikhetsekile letitfolwa ngulabo labanikela ngaso sonkhe sikhatsi sabo emsebentini wekushumayela ngeMbuso kuze ‘bawente kahle umsebenti wabo.’​—2 Thimothi 4:5.

Sikolwa Semsebenti Semahlahlandlela. Lihlahlandlela lelivamile litsi lingacedza umnyaka walo wekucala emsebentini wasikhatsi sonkhe, bese libhaliswa esikolweni lesitsatsa emalanga lasitfupha lesiba seHholweni LeMbuso lelisedvutane. Injongo yaso ikusita lihlahlandlela kutsi lisondzelane naJehova, libe nemakhono kuto tonkhe tingoni temsebenti walo wekushumayela, futsi lichubeke nemsebenti walo ngekwetsembeka.

Sikolwa SebaVangeli BeMbuso. Lesikolwa lesitsatsa tinyanga letimbili sentelwe kucecesha emahlahlandlela lasanesikhatsi lesidze futsi lete inkinga ngekushiya tindzawo latalelwa kuto ayokhonta nome ngukuphi lapho kunesidzingo khona. Alingisa Jesu Khristu umVangeli lomkhulu lowake waphila lapha emhlabeni, ecinisweni atsi “Nangu mine, tfuma mine!” (Isaya 6:8; Johane 7:29) Kusuka ekhaya uye khashane kakhulu kungadzinga umuntfu akwemukele kuphila imphilo leselizingeni leliphansi. Indlela yekuphila, simo selitulu, kanye nekudla kungehluka kakhulu kuloko lakwetayele. Kungadzingeka nekutsi afundze nekukhuluma lulwimi lolusha. Lesikolwa sisita bazalwane nabodzadze labangakashadi kanye nebantfu labashadene labaneminyaka lesuka ku-23 kuya ku-65 kutsi babe netici tebuntfu labatatidzinga etabelweni tabo kanye nemakhono latakwenta kutsi Jehova nenhlangano yakhe abasebentise kakhulu.

Sikolwa SeliBhayibheli SaseGileyadi. NgesiHebheru, leligama lelitsi “Gileyadi” lisho kutsi “Incumbi Yebufakazi.” Kusukela nga-1943 titfunywa telivangeli leticeceshwe eGileyadi letingetulu kwa-8 000, titfunyelwe “kuto tonkhe tincenye temhlaba.” (Imisebenti 13:47) Ngesikhatsi titfunywa telivangeli tifika kwekucala ePeru, bekute emabandla kulelo live. Nyalo emabandla sangetulu kwa-1 000. Ngesikhatsi titfunywa telivangeli ticala kukhonta eJapan, bekunaBoFakazi labangephansi kwelishumi kulelo live. Kodvwa nyalo sekunaBoFakazi labangetulu kwa-200 000. Lemfundvo yasesikolweni saseGileyadi ifaka ekhatsi kulitadisha lonkhe liVi laNkulunkulu. Labo labangemahlahlandlela lakhetsekile nobe labatitfunywa telivangeli letisensimini, nalabo labasemahhovisini eligatja nobe labababonisi betigodzi bayamenywa kulesikolwa kutsi baceceshwe kakhulu kuze lomsebenti wabo labawenta emhlabeni wonkhe ukhone kucina.

• Iyini injongo yeSikolwa Semsebenti Semahlahlandlela?

• Sikolwa SebaVangeli BeMbuso sentelwe bobani?