IMINININGWANE LESEKUGCINENI

1 JEHOVA

Ligama laNkulunkulu nguJehova, lisho kutsi “Ubangela Kutsi Kube Khona.” Jehova nguNkulunkulu somandla futsi wadala tonkhe tintfo. Unemandla ekwenta noma ngabe yini lafuna kuyenta.

Ngelulwimi lwesiHebheru, ligama laNkulunkulu belibhalwa ngetinhlavu letine. NgesiNgisi letinhlavu timelelwa ngu-YHWH noma JHVH. EmiBhalweni yekucala yesiHebheru ligama laNkulunkulu livela tikhatsi leticishe tibe ngu-7 000. Bantfu emhlabeni wonkhe balibhala ngetindlela letehlukene leligama laJehova, baphindze balibite nangendlela lejwayelekile ngelulwimi lwabo.

▸ Sehl. 1, sig. 15

2 LIBHAYIBHELI ‘LIPHEFUMULELWE NGUNKULUNKULU’

UmBhali weliBhayibheli nguNkulunkulu, kodvwa wasebentisa bantfu kuze balibhale. Loku kuyafana nalokwentiwa ngusomabhizinisi nakatjela mabhalane wakhe kutsi abhale incwadzi lecuketse lokushiwo nguye. Nkulunkulu wasebentisa umoya wakhe longcwele kuze acondzise babhali beBhayibheli kutsi babhale imicabango yakhe. Umoya waNkulunkulu wabacondzisa ngetindlela letehlukahlukene, ngaletinye tikhatsi bebabona imibono noma baphuphe emaphupho labebabese bayawabhala.

▸ Sehl. 2, sig. 5

3 TIMISO

Timiso timfundziso teliBhayibheli letichaza liciniso lelibalulekile. Sibonelo saloku kutsi simiso lesitsi “kutihlanganisa nebantfu lababi kona imikhuba lemihle” sisifundzisa kutsi nasitihlanganisa nebantfu labakahle sitakwenta lokuhle, kantsi nasitihlanganisa nebantfu lababi sitakwenta tintfo letimbi. (1 Khorinte 15:33) Simiso lesitsi “nobe yini umuntfu layihlanyelako, utawuvuna yona” sisifundzisa kutsi ngeke siyibalekele imiphumela yetento tetfu.​—Galathiya 6:7.

▸ Sehl. 2, sig. 12

4 SIPHROFETHO

Siphrofetho ngumlayeto lovela kuNkulunkulu. Singaba yinchazelo yentsandvo yaNkulunkulu, singasifundzisa kutsi kufanele sitiphatse njani, singaphindze sibe ngumyalo noma sehlulelo. Singaphindze sisitjele ngalokusetakwenteka esikhatsini lesitako. Tinyenti tiphrofetho letishiwo liBhayibheli lesetivele tigcwalisekile.

▸ Sehl. 2, sig. 13

5 TIPHROFETHO LETIMAYELANA NAMESIYA

Tiphrofetho letinyenti letikhuluma ngaMesiya tagcwaliseka kuJesu. Fundza libhokisi lelitsi “Tiphrofetho Letimayelana NaMesiya.”

▸ Sehl. 2, sig. 17, umbhalo longentansi.

6 IYINI INJONGO YANKULUNKULU NGEMHLABA?

Ngesikhatsi Jehova adala umhlaba, bekafuna ube likhaya lelihle lebantfu labamtsandzako. Injongo yakhe solo ayikashintji. Masinyane, Nkulunkulu utawususa bubi futsi anikete bantfu labamkhontako kuphila lokuphakadze.

▸ Sehl. 3, sig. 1

7 SATHANE DEVELI

Sathane yingilosi leyacala kuvukela Nkulunkulu. Ubitwa ngekutsi nguSathane, lokusho “Umphikisi” ngoba ulwisana naJehova. Uphindze abitwe ngekutsi nguDeveli, lokusho “Umnyundzeli.” Leligama walitfola ngobe ucamba emanga ngaNkulunkulu aphindze adukise bantfu.

▸ Sehl. 3, sig. 4

8 TINGILOSI

Jehova wadala tingilosi kusesele sikhatsi lesidze kutsi adale umhlaba. Watidalela kutsi tiphile ezulwini. Kunetingilosi letingetulu kwetigidzi letilikhulu. (Danyela 7:10) Tinemagama kanye nebuntfu lobungafani, futsi tingilosi letetsembekile ativumi kukhontwa bantfu. Tinetigaba letingafani futsi tiniketwa imisebenti leyehlukahlukene. Lemisebenti ifaka ekhatsi kutjela bantfu umlayeto lovela kuJehova, kusebenta esihlalweni sakhe sebukhosi, kuvikela nekucondzisa tinceku taJehova letisemhlabeni, kwendlulisa tehlulelo takhe, kanye nekusekela umsebenti wekushumayela. (Tihlabelelo 34:7; Sembulo 14:6; 22:8, 9) Esikhatsini lesitako, titawube tinaJesu nakuliwa imphi ye-Amagedoni.​—Sembulo 16:14, 16; 19:14, 15.

▸ Sehl. 3, sig. 5; Sehl. 10, sig. 1

9 SONO

Sono ngunobe yini lesiyicabangako, lesiyentako nobe indlela lesitiva ngayo lengahambisani nentsandvo yaJehova. Nkulunkulu usinike imitsetfo netimiso kute tisisite singenti sono ngemabomu ngobe sono siyabulimata buhlobo betfu naye. Ekucaleni Jehova wadala tonkhe tintfo taba bete sono, kepha ngesikhatsi bo-Adamu na-Eva bangamlaleli, baba nesono. Bo-Adamu na-Eva baguga base bayafa, natsi siyaguga siphindze sife ngobe satfola sono kubo.

▸ Sehl. 3, sig. 7; Sehl. 5, sig. 3

10 I-AMAGEDONI

I-Amagedoni yimphi yaNkulunkulu letawubhubhisa lelive laSathane iphindze icedze bonkhe bubi lobusemhlabeni.

▸ Sehl. 3, sig. 13; Sehl. 8, sig. 18

11 UMBUSO WANKULUNKULU

UMbuso waNkulunkulu nguhulumende wakhe losezulwini. Jesu Khristu uyiNkhosi yaloMbuso. Esikhatsini lesitako, Jehova utawususa bonkhe bubi lobusemhlabeni asebentisa loMbuso wakhe. UMbuso waNkulunkulu utawubusa emhlabeni wonkhe.

▸ Sehl. 3, sig. 14

12 JESU KHRISTU

Nkulunkulu wadala Jesu kucala asengakatidali letinye tintfo. Jehova watfumela Jesu emhlabeni kute afele bonkhe bantfu. Jehova wavusa Jesu ngemuva kwekuba sekafile. Nyalo Jesu uyiNkhosi yeMbuso waNkulunkulu.

▸ Sehl. 4, sig. 2

13 SIPHROFETHO LESIMAYELANA NEMAVIKI LANGU-70

LiBhayibheli labiketela kutsi Mesiya utawuvela nini. Loku bekutawenteka nakuphela emaviki langu-69, lacala ngemnyaka wa-455 B.C.E., aphela nga-29 C.E.

Sati ngani kutsi aphela ngemnyaka wa-29 C.E.? Emaviki langu-69 acala ngemnyaka wa-455 B.C.E., ngesikhatsi Nehemiya efika eJerusalema futsi acala kulakha kabusha lelidolobha. (Danyela 9:25; Nehemiya 2:1, 5-8) Ligama lelitsi “dazini” (dozen) likwenta ucabange ngenombolo lengu-12, ngako ligama lelitsi “liviki” lisikhumbuta ngenombolo lengu-7. Emaviki lakulesiphrofetho akusiwo emaviki lakhiwa ngemalanga lasikhombisa kodvwa ngulakhiwa yiminyaka lesikhombisa, njengobe siphrofetho seliBhayibheli sitsi “umnyaka umele lilanga linye.” (Numeri 14:34; Hezekeli 4:6) Loku kusho kutsi liviki linye liyiminyaka lesikhombisa, futsi emaviki langu-69 nawuwaphindza kasikhombisa kuphuma iminyaka lengu-483 (69 x 7). Nasibala iminyaka lengu-483 sisuka ku-455 B.C.E., kusibeka ku-29 C.E. Lona ngumnyaka Jesu labhajatiswa ngawo futsi waba nguMesiya.​—Lukha 3:1, 2, 21, 22.

Lesiphrofetho saphindze sakhuluma ngalelinye liviki, lelakha leminye iminyaka lesikhombisa. Kuleso sikhatsi, ngemnyaka wa-33 C.E., Mesiya bekatawubulawa futsi ngemnyaka wa-36 C.E., tindzaba letimnadzi teMbuso waNkulunkulu betitawucala kushunyayelwa etiveni tonkhe hhayi nje kumaJuda kuphela.​—Danyela 9:24-27.

▸ Sehl. 4, sig. 7

14 IMFUNDZISO LENGEMANGA LEMAYELANA NAMTSATFU AMUNYE

LiBhayibheli lifundzisa kutsi Jehova Nkulunkulu unguMdali, futsi wadala Jesu kucala asengakatidali letinye tintfo. (Kholose 1:15, 16) Jesu akasuye Nkulunkulu Somandla. Akazange atsi ulingana naNkulunkulu. Ecinisweni watsi: “Babe mkhulu kunami.” (Johane 14:28; 1 Khorinte 15:28) Letinye tinkholo tifundzisa kutsi Nkulunkulu Mtsatfu Amunye, titsi: unguBabe, uyiNdvodzana futsi ungumoya longcwele. EBhayibhelini alikho ligama lelitsi “Mtsatfu Amunye.” Lena yimfundziso yemanga.

Umoya longcwele ngemandla aNkulunkulu langabonakali lawasebentisako kute afeze injongo yakhe. Awusiye umuntfu. Sibonelo saloku kutsi emaKhristu ekucala ‘agcwala umoya longcwele,’ futsi Jehova watsi: “Ngitawutfululela umoya wami kuto tonkhe tinhlobo tebantfu.”​—Imisebenti 2:1-4, 17.

▸ Sehl. 4, sig. 12; Sehl. 15, sig. 17

15 SIPHAMBANO

EmaKhristu eliciniso awasisebentisi siphambano nakakhonta Nkulunkulu. Leni?

1.  Sekuphele sikhatsi lesidze siphambano sisetjentiswa enkholweni yemanga. Kadzeni besisetjentiswa nakukhontwa imvelo nasemikhosini yekulalana lebeyentiwa bantfu labangamkhonti Nkulunkulu. Eminyakeni lengu-300 ngemuva kwekutsi Jesu afile, emaKhristu bekangasisebentisi siphambano nakakhonta Nkulunkulu. Ngekuhamba kwesikhatsi, Constantine, lobekanguMbusi wemaRoma wenta siphambano saba luphawu lwemaKhristu. Siphambano sasetjentiswa kute buKhristu batiwe bantfu labanengi. Kute kuhlobana lokukhona emkhatsini wesiphambano naJesu Khristu. I-“New Catholic Encyclopedia” itsi: “Siphambano besisetjentiswa bantfu busengakacali buKhristu futsi sisetjentiswa ngisho nasemasikweni ebantfu labangasiwo emaKhristu.”

2.  Jesu akazange afele esiphambanweni. Ligama lesiGriki lelisho “siphambano” nalihunyushwa lisho “sigodvo lesicondzile” nobe “sihlahla.” I-“The Companion Bible” itsi: “Kute ngesiGriki [EThestamenteni Lelisha] lokuveta kutsi siphambano sisho tingodvo letimbili.” Jesu wafela elugodvweni lolucondzile.

3.  Jehova akafuni kutsi sisebentise titfombe noma tithico nasimkhonta.​—Eksodusi 20:4, 5; 1 Khorinte 10:14.

▸ Sehl. 5, sig. 12

16 SIKHUMBUTO

Jesu watjela bafundzi bakhe kutsi bagubhe Sikhumbuto sekufa kwakhe. Basigubha minyaka yonkhe ngaNisani 14, lokulilanga lelifanako nalelo ema-Israyeli labegubha ngalo liPhasika. ESikhumbutweni kuhanjiswa sinkhwa neliwayini lokumelela umtimba nengati yaJesu. Labatawubusa naJesu ezulwini badla lesinkhwa futsi banatse leliwayini. Labatawuphila phakadze emhlabeni nabo babakhona eSikhumbutweni kodvwa abasidli lesinkhwa nobe banatse leliwayini.

▸ Sehl. 5, sig. 21

17 UMPHEFUMULO

LiHumusho Lemhlaba Lomusha lisebentisa ligama lelitsi “umphefumulo” nalikhuluma (1) ngemuntfu, (2) ngesilwane (3) nangekuphila kwemuntfu nobe kwesilwane. Nati tibonelo:

• Umuntfu. “Emalangeni aNowa . . . bantfu labambalwa, lokuyimiphefumulo lesiphohlongo, bahamba ngekuphepha etikwemanti.” (1 Phetro 3:20) Kulombhalo ligama lelitsi ‘imiphefumulo’ lisho bantfu, lokunguNowa nemfati wakhe, emadvodzana abo lamatsatfu kanye nebafati bawo.

• Silwane. ‘Nkulunkulu watsi: “Emanti akagcwale yonkhe inhlobo yetilwane [imiphefumulo] letiphilako, kundize tinyoni etikwemhlaba emkhatsini wesibhakabhaka.” Nkulunkulu waphindze watsi: “Umhlaba awuvete tonkhe tinhlobo tetilwane [imiphefumulo] letiphilako: tonkhe tinhlobo tetifuyo, netetilwane letihamba ngesisu, netilo tesiganga.” Kwase kuba njalo.’​—Genesisi 1:20, 24.

• Kuphila kwemuntfu nobe kwesilwane. Jehova watjela Mosi watsi: “Bonkhe labo bebafuna kukubulala [labebafuna umphefumulo wakho] sebafile.” (Eksodusi 4:19) Ngesikhatsi Jesu asemhlabeni watsi: “Ngingumelusi lomuhle; umelusi lomuhle unikela ngemphefumulo wakhe ngenca yetimvu.”​—Johane 10:11.

  Umuntfu nakenta lokutsite ‘ngemphefumulo wonkhe,’ loko kusho kutsi ukwenta ngekutitsandzela nangemandla akhe onkhe. (Matewu 22:37; Dutheronomi 6:5) Ligama lelitsi “umphefumulo” lingasetjentiswa kuze kuchazwe sifiso sekudla yonkhe intfo lephilako lenaso. Umuntfu lofile noma sidvumbu kungaphindze kutsiwe ngumphefumulo lofile.​—Numeri 6:6; Taga 23:2; Isaya 56:11; Hagayi 2:13.

▸ Sehl. 6, sig. 5; Sehl. 15, sig. 17

18 UMOYA

Ku-New World Translation, ligama lesiHebheru nelesiGriki lelitsi “umoya” lingasho tintfo letinyenti letehlukene. Lisho tintfo letingabonakali letifaka ekhatsi umoya lohhushako, nobe umoya lophefumulwa bantfu netilwane. Leligama lingaphindze lisentjetiswe nakukhulunywa ngetingilosi nangemoya longcwele, longemandla aNkulunkulu lawasebentisako. LiBhayibheli alifundzisi kutsi kunalokutsite kumuntfu lokuchubeka kuphila nasekafile.​—Eksodusi 35:21; Tihlabelelo 104:29; Matewu 12:43; Lukha 11:13.

▸ Sehl. 6, sig. 5; Sehl. 15, sig. 17

19 IGEHENA

IGehena ligama lesigodzi lesisedvute neJerusalema lapho bekulahlwa futsi kushiswa khona tibi. Kute bufakazi lobukhombisa kutsi ngesikhatsi saJesu kulesigodzi bekuhlushwa nobe kushiswa tilwane nobe bantfu basaphila. Ngako iGehena ayimeleli indzawo lengabonakali lapho bantfu labafile bahlushwa futsi bashiswa khona kuze kube phakadze. Ngesikhatsi Jesu akhuluma ngebantfu labajikijelwa eGehena, abesho kutsi batawubhujiswa bangaphindzi babe khona.​—Matewu 5:22; 10:28.

▸ Sehl. 7, sig. 20

20 UMTHANTAZO WENKHOSI

Lona ngumthantazo Jesu lawusho nakafundzisa bafundzi bakhe indlela yekuthantaza. Uphindze ubitwe ngekutsi nguBabe Wetfu noma ngumthantazo losibonelo. Sibonelo saloko kutsi Jesu wasifundzisa kutsi sithantaze sitsi:

• “Alingcweliswe libito lakho”

  Sithantazela kutsi Jehova acedze kukhulunyelwa kabi kweligama lakhe nawo onkhe emanga lakhulunywako ngaye. Loku kubalulekile kute konkhe lokusezulwini nasemhlabeni kungcwelise futsi kuhloniphe ligama laNkulunkulu.

• “UMbuso wakho awute”

  Sithantazela kutsi hulumende waNkulunkulu ubhubhise lelive lelibi laSathane, uphindze ubuse lomhlaba futsi uwente ube lipharadisi.

• “Intsandvo yakho ayentiwe emhlabeni”

  Sithantazela kutsi injongo yaNkulunkulu ngemhlaba ifezeke kuze bantfu labalalelako nalabete sono baphile phakadze ePharadisi, njengoba bekunguleyo injongo yaJehova nakadala bantfu bekucala.

▸ Sehl. 8, sig. 2

21 INHLAWULO

Jehova wasiletsela inhlawulo kute asindzise bantfu esonweni nasekufeni. Inhlawulo linani lebelidzingeka kute kubhadalwe kuphila lokute sono lokwalahlwa ngu-Adamu, kuphindze kulungiswe nebuhlobo bemuntfu naJehova lobesebulimele. Nkulunkulu watfumela Jesu emhlabeni kute afele tonkhe toni. Kufa kwaJesu kwenta bonkhe bantfu batfole litfuba lekuphila phakadze futsi bagcine sebete sono.

▸ Sehl. 8, sig. 21; Sehl. 9, sig. 13

22 UBALULEKE NGANI UMNYAKA WA-1914?

Siphrofetho lesikuDanyela sehluko 4 sisifundzisa kutsi Nkulunkulu abetawucalisa uMbuso wakhe nga-1914.

Siphrofetho: Jehova wabangela kutsi iNkhosi Nebukhadnezari iphuphe ngesiphrofetho lesimayelana nesihlahla lesikhulu lesajutjwa. Kuleliphupho, lesihlahla saboshwa ngelibhande lensimbi nelelitfusi kute lisivimbe singakhuli kuze kuphele “tikhatsi letisikhombisa.” Ngemuva kwaloko, lesihlahla besitawuphindze sikhule.​—Danyela 4:1, 10-16.

Sisho kutsini kitsi lesiphrofetho?: Lesihlahla simelela kubusa kwaNkulunkulu. Kwaphela iminyaka leminyenti Jehova asebentisa emakhosi laseJerusalema kute abuse sive sema-Israyeli. (1 Tikhronike 29:23) Kubusa kwawo kwabese kuyaphela ngobe abese awasetsembeki. LiJerusalema labhujiswa ngemnyaka wa-607 B.C.E. Leso kwaba sicalo ‘setikhatsi letisikhombisa.’ (2 Emakhosi 25:1, 8-10; Hezekeli 21:25-27) Ngesikhatsi Jesu atsi: “Tive tiyawuyigcobagcoba ngetinyawo iJerusalema, kudzimate kube sikhatsi lesibekiwe setive,” abekhuluma ‘ngaletikhatsi letisikhombisa.’ (Lukha 21:24) Ngako “tikhatsi letisikhombisa” atizange tiphele ngesikhatsi Jesu alamhlabeni. Jehova wetsembisa kutsi utawubeka iNkhosi nasekuphele “tikhatsi letisikhombisa.” Kubusa kwaleNkhosi lensha lenguJesu, kutawuletsela bonkhe bantfu baNkulunkulu tibusiso emhlabeni wonkhe kuze kube phakadze.​—Lukha 1:30-33.

Betitawutsatsa sikhatsi lesinganani “tikhatsi letisikhombisa”?: “Tikhatsi letisikhombisa” tatsatsa iminyaka lengu-2 520. Nasibala iminyaka lengu-2 520 sisuka ku-607 B.C.E., sifika ku-1914. Leso sikhatsi Jehova labeka ngaso Jesu longuMesiya kutsi abe yiNkhosi yeMbuso waNkulunkulu ezulwini.

Sifika njani ku-2 520? LiBhayibheli litsi tikhatsi letintsatfu nehhafu takha emalanga langu-1 260. (Sembulo 12:6, 14) Ngako “tikhatsi letisikhombisa” tiwaphindza kabili emalanga langu-1 260 kute akhe emalanga langu-2 520. Lamalanga langu-2 520 ayiminyaka lengu-2 520 ngobe kunesiphrofetho lesitsi “lilanga lilinye limele umnyaka munye.”​—Numeri 14:34; Hezekeli 4:6.

▸ Sehl. 8, sig. 23

23 MIKHAYELI INGILOSI LENKHULU

Ligama lelitsi “ingilosi lenkhulu” lisho “ingilosi leyinhloko.” LiBhayibheli likhuluma ngengilosi yinye lenkhulu, ligama layo nguMikhayeli.​—Danyela 12:1; Juda 9.

Mikhayeli unguMholi wetingilosi taNkulunkulu letetsembekile. Umbhalo weSembulo 12:7 utsi: “Mikhayeli netingilosi takhe balwa nadrago . . . anetingilosi takhe.” Incwadzi yeSembulo itsi uMholi welibutfo laNkulunkulu nguJesu, ngako Mikhayeli ngulelinye ligama laJesu.​—Sembulo 19:14-16.

▸ Sehl. 9, sig. 4

24 EMALANGA EKUGCINA

Lesi sikhatsi lapho kutawenteka tintfo letinyenti emhlabeni, ngaphambi kwekutsi uMbuso waNkulunkulu ubhubhise lelive laSathane. Emagama lasetjentiswe etiphrofethweni latsi ‘kuphela kwalelive’ nalatsi ‘kuba khona kweNdvodzana yemuntfu,’ nawo achaza emalanga ekugcina. (Matewu 24:3, 27, 37) ‘Emalanga ekugcina’ acala nga-1914 ngesikhatsi uMbuso waNkulunkulu ucala kubusa ezulwini, futsi atawuphela ngesikhatsi kubhujiswa lelive laSathane nge-Amagedoni.​—2 Thimothi 3:1; 2 Phetro 3:3.

▸ Sehl. 9, sig. 5

25 KUVUSWA KWALABAFILE

Luvuko ngulesikhatsi Nkulunkulu enta umuntfu lobekafile kutsi aphindze aphile. LiBhayibheli likhuluma ngekuvuswa kwalabafile tikhatsi letiyimfica. Bo-Elija, Elisha, Jesu, Phetro, naPawula bavusa labafile. Emandla aNkulunkulu ngiwo labasita bakhona kwenta letimangaliso. Jehova wetsembisa kutsi utawuvusa ‘labalungile nalabangakalungi’ kuze baphile emhlabeni. (Imisebenti 24:15) LiBhayibheli liphindze likhulume ngalabatawuvuka bayophila ezulwini. Loku kwenteka ngesikhatsi labagcotjiwe nobe labakhetfwe nguNkulunkulu bavuswa baya ezulwini bayophila naJesu.​—Johane 5:28, 29; 11:25; Filiphi 3:11; Sembulo 20:5, 6.

▸ Sehl. 9, sig. 13

26 BUDIMONI (KUSEBENTISA IMIMOYA)

Budimoni nobe kusebentisa imimoya ngumkhuba lomubi wekukhuluma nemadimoni, njengekuya kumuntfu lowasebentisako, kungaba ngumtsakatsi nobe sangoma noma utikhulumele nawo. Bantfu bakhuluma nemadimoni ngobe bakholelwa emfundzisweni lengemanga yekutsi umoya webantfu labafile uchubeka uphila futsi ube tipoko letinemandla. Lamadimoni etama kuyekelisa bantfu kutsi bakhonte Nkulunkulu. Kufundza tinkhanyeti, kuba sangoma, kubhula, kwenta imilingo, butsakatsi, tinkholelo letingemanga, konkhe loku kubudimoni. Tincwadzi letinyenti, bomagazini, tinkhanyeti tekubhula, ema-movie, titfombe taselubondzeni ngisho netingoma tenta kutsi budimoni nekwenta imilingo kubonakale kumnandzi futsi kungasiyo ingoti. Emasiko emngcwabo lamanyenti lanjengemaphathi lentiwa ngemuva kwemngcwabo, kuphahla, emasiko lahambisana nekuzila kanye nemilindzelo nako kufaka ekhatsi budimoni. Bantfu bavame kusebentisa tidzakamiva nabasebentisa emadimoni.​—Galathiya 5:20; Sembulo 21:8.

▸ Sehl. 10, sig. 10; Sehl. 16, sig. 4

27 BUKHOSI BAJEHOVA

Jehova unguNkulunkulu Somandla, futsi konkhe lokusemhlabeni nasezulwini kwadalwa nguye. (Sembulo 15:3) UnguMnikati wato tonkhe tintfo futsi ungumbusi, nobe uneligunya leliphelele lekubusa konkhe lakudalile. (Tihlabelelo 24:1; Isaya 40:21-23; Sembulo 4:11) Wente imitsetfo yako konkhe lakudalile. Jehova uphindze abe neligunya lekubeka nobe ngubani kutsi abe ngumbusi. Nasikhombisa kutsi siyamtsandza Nkulunkulu futsi simlalela, sisuke sisekela bukhosi bakhe.​—1 Tikhronike 29:11.

▸ Sehl. 11, sig. 10

28 KUKHIPHA SISU

Kukhipha sisu kubulala umntfwana losesiswini ngemabomu. Kusuke kungasiyo ingoti futsi kusuke kungakatentakaleli. Kusukela ngalesikhatsi make wakhe akhulelwa, lomntfwana akasiyo incenye yemtimba wenina. Usuke naye asangumuntfu.

▸ Sehl. 13, sig. 5

29 KUFAKWA INGATI

Lena yindlela yekwelapha lawufakwa khona ingati lephelele noma lenye yetincenye tayo letine letiyinhloko. Ungafakwa letsatfwe kulomunye umuntfu noma ufakwe labeyibekiwe. Takhi letiyinhloko letine tengati yi-plasma, tinhlayiya letibovu, tinhlayiya letimhlophe kanye nema-platelets.

▸ Sehl. 13, sig. 13

30 SIYALO

Ligama lelitsi “siyalo” akusilo nje lelinye ligama lelisho kujezisa. Nasiyalwa sisuke sicondziswa, sifundziswa futsi silungiswa. Jehova akabatsetsisi nobe abakhahlabete labo labayalako. (Taga 4:1, 2) Jehova ubabekela sibonelo lesihle batali. Siyalo lasiniketa sona sisita kakhulu kangangekutsi umuntfu angaze asitsandze. (Taga 12:1) Jehova uyabatsandza bantfu bakhe futsi uyabacecesha. Ubaniketa ticondziso letibasita kutsi balungise indlela leliphutsa labacabanga ngayo, aphindze abasite bacabange futsi bente ngendlela lemjabulisako. Siyalo batali labasinika bantfwana babo sifaka ekhatsi kubasita babone kutsi kubaluleke ngani kulalela. Lesiyalo sihlanganisa nekubafundzisa kutsandza Jehova, kutsandza liVi lakhe liBhayibheli futsi bacondze netimiso letikulo.

▸ Sehl. 14, sig. 13

31 EMADIMONI

Emadimoni awabonakali, ayimimoya lemibi futsi anemandla lamakhulu. Emadimoni atingilosi letimbi. Aba tingilosi letimbi ngekungalaleli Nkulunkulu futsi aba titsa takhe. (Genesisi 6:2; Juda 6) Letingilosi letimbi tahlanganyela naSathane ekuvukeleni Jehova.​—Dutheronomi 32:17; Lukha 8:30; Imisebenti 16:16; Jakobe 2:19.

▸ Sehl. 16, sig. 4