Bewati Yini Ngaloku?
Iyini indvwangu ‘lebovu ngalokutopele’ lokuvame kukhulunywa ngayo encwadzini ya-Eksodusi?
▪ Ngekusho kwekulandzisa kweliBhayibheli, tindvwangu telithende letatisetjentiselwa kwakha lubondza kanye nelisango lelithende lekukhontela lelalisetjentiswa ngema-Israyeli, tatakhiwa “ngensontfo lenembala loluhlata njengesibhakabhaka, nalobukhwebeletane, nalobovu ngalokutopele.” (Eksodusi 26:1; 38:18) “Tembatfo letingcwele” tebaphristi nato kwakufanele takhiwe ngendvwangu ‘lebovu ngalokutopele.’—Eksodusi 28:1-6.
Umbala lobovu ngalokutopele, lophindze watiwe ngekutsi yi-kermes, wawungudayi lobovu kakhulu. Lodayi wawutsatfwa emitimbeni yetilwanyana letinsikati teluhlobo lwe-Coccidae. Letilwanyana letite timphiko tihlala etihlahleni tem-okhi (Quercus coccifera), letikhula eMphumalanga yelwandle iMedithera kanye naselusentseni lwayo. Lombala lobovu uba semacandzeni langekhatsi kwalesilwanyana lesisikati. Nasinjalo, lesilwanyana sifanana neligungumence, lelilingana neliphizi futsi sinamatsela emacembeni kanye nasemagaleni alesihlahla sem-okhi. Nasetibutsiwe futsi tapitjitwa, letilwanyana tikhipha umbala lobovu loncibilikako emantini, nalovame kusetjentiswa njengadayi. Pliny, losati semlandvo lesingumRoma wakhuluma ngembala lobovu ngalokutopele futsi watsi bewungulomunye wemibala leyayitsandvwa kakhulu esikhatsini sakhe.
Ngubaphi babhali bemiBhalo YemaKhristu YesiGriki labebakhona ngeliPhentekhoste la-33 C.E.?
▪ Kungenteka kutsi emadvodzeni lasiphohlongo labhala lencenye yeliBhayibheli, ngulasitfupha labekhona.
Ngekusho kwencwadzi yeMisebenti, Jesu wayala bafundzi bakhe: “Ningesuki eJerusalema, kodvwa hlalani nimele sipho lenetsenjiswa sona nguBabe.” (Imisebenti 1:4) Lokulandzisa lokufananako kuphindze kuchaze kutsi bo-Matewu, Johane, kanye na-Phetro bawulalela lomyalo futsi bahlangana “ndzawonye” nalabanye bafundzi baJesu. Banakabo Jesu nabo bebakhona. (Imisebenti 1:12-14; 2:1-4) Ngekuhamba kwesikhatsi, babili babo, bo-Jakobe kanye na-Juda (Judasi), babhala tincwadzi letimbili teliBhayibheli letibitwa ngemabito abo.—Matewu 13:55; Jakobe 1:1; Juda 1.
EVangelini lakhe, Makho ukhuluma ngelijaha lelabaleka ngebusuku bekuboshwa kwaJesu. Kubonakala shengatsi abetisho yena, njengobe bonkhe labanye bafundzi besebavele bambalekele Jesu. (Makho 14:50-52) Ngako-ke, kubonakala shengatsi Makho abesavele angumfundzi futsi kungenteka kutsi abekhona ngeliPhentekhoste.
Lalabanye babhali lababili bemiBhalo YemaKhristu YesiGriki bekuboPawula kanye naLukha. NgeliPhentekhoste la-33 C.E., Pawula abesengakabi ngumlandzeli waKhristu. (Galathiya 1:17, 18) Kubonakala shengatsi naLukha abengekho, njengobe angatibali kanye nalabo ‘labatibonela’ umsebenti waJesu.—Lukha 1:1-3.
[Sitfombe ekhasini 20]
Tilwanyana letisetjentiswa nakwakhiwa bodayi
[Emavi laveta Umtfombo walentfo]
Courtesy of SDC Colour Experience (www.sdc.org.uk)
[Sitfombe ekhasini 20]
Phetro, ngesikhatsi akhuluma ngeliPhentekhoste la-33 C.E.