Umusa Uyalwehlisa Lulaka
NGESIKHATSI boGeorge naManon boFakazi lababili baseNetherlands baya kulomunye wesifazane losakhulile kute bamcocele tindzaba letimnandzi teMbuso, akazange abemukele ngebungani. Batfola kutsi ushonelwe ngemadvodza lamabili nendvodzana nekutsi abenesifo sematsambo. Nanobe abuyisa umoya phansi nabacoca, abengakhombisi kuba nebungani.
Nobe kunjalo, George watsi kuManon abamtsengele timbali ngobe bekabonakala anesitunge futsi anelulaka. Wamangala kakhulu Rie nababuyela kuye bamphatsele letimbali. Nanobe bekungasiso sikhatsi lesihle kuye sekutsi bacoce, bahlela kutsi baphindze bahlangane naye ngalelinye lilanga. BoGeorge naManon nababuyela kuye ngesikhatsi labebasihlelile, abamtfolanga ekhaya. Nanobe bebetame kumvakashela ngetikhatsi letehlukene, abazange bamtfole. Besebacabanga nekutsi uyababalekela.
Ngalelinye lilanga George wamtfola Rie ekhaya. Wacolisa kakhulu ngekungasigcini setsembiso sakhe wase uyamchazela kutsi bekasesibhedlela. Rie wachubeka watsi: “Angeke ukukholelwe lengakwenta nasenihambile. Ngacala kufundza liBhayibheli.” Bacala kucocisana kamnandzi, futsi kwacaliswa sifundvo seliBhayibheli.
Njengobe Rie besekafundza liBhayibheli, lwaphela lulaka labekanalo wacala wajabula futsi waba nemusa. Nanobe bekangakhoni kuphuma endlini ngenca yekugula, abebashumayela bonkhe labebamvakashela. Bekangakhoni kuya njalo emihlanganweni ngesizatfu sekugula kwakhe, kodvwa bekakujabulela kuvakashelwa bazalwane nabodzadze. Ngelilanga laba ngalo neminyaka lengu-82 budzala, waya emhlanganweni wesifundza futsi wabhajatiswa akhombisa kutsi sewutinikele kuNkulunkulu.
Ngemuva kwetinyanga letimbalwa ashonile, kwatfolakala inkhondlo labekayibhalile. Kulenkhondlo wachaza buhlungu bekuba nesitunge nasewukhulile waphindze wagcizelela nekubaluleka kwekuba nemusa. Manon utsi: “Kwangitsintsa kakhulu kufundza lenkhondlo futsi ngiyajabula kutsi Jehova wasisita sambonisa umusa Rie.”
Sibonelo sebuntfu baJehova sisenta sibonise lutsandvo lolunjalo nemusa. (Ef. 5:1, 2) Umsebenti wetfu wekushumayela utawutsela nangabe ‘sikhombisa kutsi sitisebenti taNkulunkulu . . . ngemusa.’—2 Khor. 6:4, 6.