Tangitsintsa kakhulu timphendvulo teliBhayibheli leticacile futsi letinengcondvo

KUPHILA KWAMI KWESIKHATSI LESENGCILE:

Ngatalelwa edolobheni lokutsiwa yiSzékesfehérvár, leliseHungary. Lelidolobha linemlandvo lomudze lohamba uze ufike eminyakeni lengetulu kwa-1 000 leyengcile. Kodvwa ngisawukhumbula umonakalo lomkhulu lowabangelwa yimphi yelive yesibili.

Ngesikhatsi ngisesemncane ngakhuliswa bogogo namkhulu. Ngibakhumbula kakhulu, ikakhulukati gogo wami Elisabeth. Wangenta ngaba nekukholwa lokucinile kuNkulunkulu. Kusukela ngesikhatsi ngiseneminyaka lemitsatfu budzala, njalo ntsambama bengihlale ngiphindzaphindza umthantazo lovame kubitwa ngekutsi nguMthantazo WeNkhosi, ngikanye naye. Nanobe kunjalo, bengingati kutsi lomthantazo usho kutsini kwaze kwaba ngulapho sengiyawufika eminyakeni lengu-30.

Ngesikhatsi ngisemncane benginakekelwa bogogo namkhulu ngenca yekutsi batali bami bebasebenta busuku nemini kuze batfole imali leyenele yekutsenga likhaya lelikahle. Nanobe kunjalo, wonkhe umndeni wakitsi bewecisa uMgcibelo munye bese kulolandzelako uyahlangana kuze udle ndzawonye. Ngangitijabulela kakhulu leto tikhatsi.

Nga-1958, sifiso sebatali bami safezeka ngobe bakhona kutsenga indlu lebesitawuhlala kuyo sobatsatfu. Ngajabula kakhulu ngobe ekugcineni besengitohlala nebatali bami! Kodvwa-ke ngemuva kwetinyanga letisitfupha leyo njabulo yaphela kabuhlungu ngesikhatsi babe abulawa ngumdlavuza.

Ngeva buhlungu kakhulu. Ngikhumbula ngithantaza ngitsi: “Bengikuncengile Nkulunkulu kutsi umsindzise babewami. Ngiyamdzinga. Awukayiphendvuli leni imithantazo yami?” Bengifuna kwati kutsi babewami ukuphi. Ngatibuta ngatsi: ‘Uye ezulwini yini? Nobe akasayuphindze abe khona?’ Ngangibahawukela labanye bantfwana lebebanabobabe.

Kwaphela iminyaka leminyenti ngiya emathuneni cishe onkhe malanga. Bengifike ngiguce ethuneni lababe bese ngiyathantaza ngitsi: “Ngiyacela Nkulunkulu, ngifuna kwati kutsi ukuphi babe.” Bengiphindze ngithantazele kutfola lusito kuze ngicondze kutsi iyini injongo yekuphila.

Nangineminyaka lengu-13 budzala, ngancuma kufundza lulwimi lwesiJalimane. Ngangicabanga kutsi mhlawumbe bengingatitfola timphendvulo temibuto yami etincwadzini tesiJalimane letinyenti futsi letinekwatiswa lokubanti. Nga-1967, ngacala kufundza edolobheni laseJena, ngaleso sikhatsi lebeliyincenye yeMphumalanga yeJalimane. Ngatifundza ngemdlandla tincwadzi lebetibhalwe tati tefilosofi letingemaJalimane, ikakhulukati leto lebetikhuluma ngenjongo yekuba khona kwebantfu. Nanobe ngatfola imibono letsite lejabulisako, kute leyangenetisa. Ngachubeka ngithantazela kutfola timphendvulo.

INDLELA LIBHAYIBHELI LELAKUGUCULA NGAYO KUPHILA KWAMI:

Nga-1970, ngabuyela eHungary lapho ngahlangana khona naRose lowaba ngumfati wami. Ngaleso sikhatsi iHungary beyingaphansi kwembuso wemaKhomanisi. Ngekushesha nje ngemuva kwekushada, mine naRose sabalekela e-Austria. Umgomo wetfu bewukutsi sigcine siye eSydney, e-Australia, lapho bekuhlala khona malume wami.

Ngekushesha nje ngatfola umsebenti e-Austria. Ngalelinye lilanga, lomunye lebengisebenta naye wangitjela kutsi ngingatitfola timphendvulo tayo yonkhe imibuto yami eBhayibhelini. Wanginiketa tincwadzi letimbalwa lebetikhuluma ngeliBhayibheli. Ngatifundza ngekushesha nangemdlandla lomkhulu leto tincwadzi futsi bengisafuna kufundza lokunyenti. Ngako ngabhalela BoFakazi BaJehova, lababashicileli baleto tincwadzi, ngacela letinye.

Ngelilanga lebesigubha ngalo umnyaka sishadile, savakashelwa ngulomunye waBoFakazi BaJehova losemusha wase-Austria. Abephetse letincwadzi lengangiticelile futsi ngavuma nakacela kungichubela sifundvo seliBhayibheli. Njengobe benginesifiso lesikhulu sekufundza, sasifundza kabili ngeliviki​—sifundvo ngasinye besitsatsa ema-awa lacishe abe mane!

Kwangijabulisa kakhulu loko BoFakazi labangifundzisa kona eBhayibhelini. Ngamangala ngesikhatsi bangikhombisa libito laNkulunkulu lelitsi Jehova eBhayibhelini lami lesiHungary. Besekuphele iminyaka lengu-27 ngiya esontfweni kodvwa bengingakaze ngilive ngisho nakanye libito laNkulunkulu. Tangitsintsa kakhulu timphendvulo teliBhayibheli leticacile futsi letinengcondvo. Nasi sibonelo: Ngafundza kutsi bantfu labafile abati lutfo, bafana nemuntfu losebutfongweni lobukhulu. (Umshumayeli 9:5, 10; Johane 11:11-15) Ngaphindze ngafundza ngesetsembiso lesiseBhayibhelini lesimayelana nemhlaba lomusha lapho ‘kufa kungeke kusaba khona.’ (Sembulo 21:3, 4) Ngilangatelela kuphindze ngimbone babe, ngobe “kutawuba neluvuko” kulowo mhlaba lomusha.—Imisebenti 24:15.

Rose wahlanganyela nami ekutadisheni liBhayibheli ngekutimisela. Satfutfuka ngekushesha, kangangekutsi kwasitsatsa tinyanga letimbili nje kuphela kucedza incwadzi lesasiyifundza! Besiya kuyo yonkhe imihlangano BoFakazi lebebabanayo eHholeni LeMbuso. Lwasitsintsa kakhulu lutsandvo BoFakazi BaJehova labanalo. Lokunye lokwasitsintsa kutsi BoFakazi bayasitana futsi banebunye.—Johane 13:34, 35.

Nga-1976, satfola imvume yekungena e-Australia. Sabatfola ngekushesha BoFakazi BaJehova kuleyo ndzawo futsi basenta sasheshe sativa sisekhaya. Nga-1978, natsi saba BoFakazi.

INDLELA LENGIZUZE NGAYO:

Sengititfolile timphendvulo temibuto lebeyisolo ingikhatsata. Ngekusondzela kuJehova Nkulunkulu, ngiphindze ngatfola Babe loncono kakhulu kunalongase umcabange. (Jakobe 4:8) Litsemba lenginalo lekuphindze ngibone babe longitalako emhlabeni lomusha nalo libaluleke kakhulu kimi.​—Johane 5:28, 29.

Nga-1989, sancuma kubuyela eHungary kuze sicoce ngetinkholelo tetfu etihlotjeni tetfu, kubangani kanye nakulabanye bantfu lebesitawuhlangana nabo. Sibe nelilungelo lekufundzisa emakhulu ebantfu ngeliBhayibheli. Labangetulu kwa-70 kubo sebahlanganyela natsi ekukhonteni Jehova, lokuhlanganisa namake wami lengimtsandzako.

Kwaphela iminyaka lengu-17 ngithantazela kutfola timphendvulo temibuto yami. Nyalo sekuphele leminye iminyaka lengu-39, futsi solo ngiyathantaza, kodvwa nyalo sengitsi: “Babe losezulwini, ngiyabonga ngekuphendvula imithantazo lebengiyenta kusukela ebuntfwaneni bami.”