SIHLOKO LESINGUMGOGODLA | BABOBANI BOFAKAZI BAJEHOVA?
Babantfu labanjani BoFakazi BaJehova?
Siyinhlangano lesemhlabeni wonkhe futsi asihlangani naletinye tinkholo. Nanobe indlunkhulu yetfu iseMelika, linyenti laBoFakazi BaJehova likulamanye emave. Tigidzi letisiphohlongo taBoFakazi tishumayela emaveni langetulu kwa-230. Nasenta njalo sisuke silalela umyalo waJesu lotsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”—Matewu 24:14.
Nome ngabe sihlala kuphi siyayilalela imitsetfo yelive kodvwa asitingeneli tindzaba tepolitiki. Loku sikwenta ngobe silalela umyalo waJesu lotsi: ‘Singabi yincenye yalelive.’ Ngiko singatingeneli tindzaba tepolitiki futsi asiyi emphini. (Johane 15:19; 17:16) Ngemphi yelive yesibili BoFakazi BaJehova baboshwa, baphatfwa kabi futsi baze babulawa ngenca yekutsi bala kuya emphini. Lomunye umbhishobhi waseJalimane watsi: “BoFakazi ngiyo kuphela inkholo leyala kuya emphini ngesikhatsi kubusa umbuso wemaNazi.”
“BoFakazi BaJehova babantfu labanesimilo lesihle. Bantfu labanjengabo labete bugovu angeke sewesabe nekubanika sikhundla lesisetulu kutepolitiki—kodvwa angeke baze bavume. . . . Bayayihlonipha imitsetfo yahulumende kodvwa bakholelwa kutsi nguMbuso waNkulunkulu kuphela lotawucedza tonkhe tinkinga tebantfu.”—Nová Svoboda newspaper, Czech Republic
Loku akusho kutsi asisaphili nalabanye bantfu. Kungako Jesu athantaza watsi: “Angikuceli kutsi ubasuse eveni.” (Johane 17:15) Natsi sifana nalabanye bantfu siyasebenta, siyaya nasesikolweni futsi sitsenga etitolo lakutsenga khona bonkhe bantfu.