Funa Lidolobha Lelitawuhlala Njalo

1. Yini Jesu latsi beyitawenteka eJerusalema?

NASEKUSELE emalanga lambalwa kutsi Jesu Khristu afe, washo siphrofetho lebesitawugcwaliseka kwekucala ngesikhatsi kubhujiswa iJerusalema nelithempeli. Wecwayisa kutsi ngalelinye lilanga lelidolobha laseJerusalema ‘belitawutungeletwa ngemabutfo.’ (Luk. 21:20) Jesu watjela balandzeli bakhe kutsi ngekushesha nje nababona lelibutfo, lokwabonakala ngekuhamba kwesikhatsi kutsi libutfo lemaRoma, bekufanele bahambe ngekushesha eJerusalema.​—Luk. 21:21, 22.

2. Yini umphostoli Pawula layikhumbuta emaKhristu langemaHebheru eJudiya naseJerusalema?

² Nasekusele iminyaka lembalwa kutsi lelibutfo laseRoma litungelete iJerusalema, umphostoli Pawula wabhala incwadzi lenemandla, nyalo leseyatiwa ngekutsi yincwadzi yaKumaHebheru. Kulencwadzi, Pawula waniketa emaKhristu aseJudiya newaseJerusalema seluleko lesibalulekile lebesitawasita alungele loko bekuseta. Yini lena beyiseta? IJerusalema beyitawubhujiswa. LamaKhristu bekatawusindza kuphela nangabe bekakulungele kushiya emakhaya awo nemabhizinisi awo. Ngako, mayelana nelidolobha laseJerusalema, Pawula wabhala watsi: “Lapha site lidolobha lelitawuhlala likhona.” Wabese uyengeta watsi: “Kodvwa ngekutimisela sifuna lelo lelitako.”​—Heb. 13:14.

3. Liyini ‘lelidolobha lelinetisekelo leticinile,’ futsi yini leyenta silifune?

³ Kungenteka bantfu labanyenti bahlekisa ngemaKhristu lancuma kushiya iJerusalema neJudiya futsi batsi abanangcondvo, kodvwa lesincumo sawo sawasindzisa. Lamuhla bantfu bahlekisa ngatsi ngenca yekutsi asetsembeli kubantfu nobe sifune sivikelo nemphilo lentofontofo kulelive. Yini leyenta sikhetse kwenta loko? Siyati kutsi lelive ngeke lihlale njalo. Sifuna “lidolobha lelinetisekelo leticinile,” “lelo lelitako,” lokunguMbuso waNkulunkulu.a (Heb. 11:10; Mat. 6:33) Sihlokwana ngasinye kulesihloko sitawucoca ngekutsi: (1) seluleko saPawula lesiphefumulelwe sawasita njani lamaKhristu ekucala kuze akhone kuchubeka afuna “[lelidolobha] lelitako,” (2) Pawula wawasita njani kutsi alungele loko bekuseta, nekutsi (3) seluleko sakhe sisisita njani lamuhla.

YETSEMBELA KULOYO LONGAYUZE AKUSHIYE

4. Yini lebeyenta iJerusalema ibaluleke kumaKhristu?

⁴ IJerusalema beyibalulekile kumaKhristu. Libandla lekucala lemaKhristu lasungulwa lapho nga-33 C.E., futsi sigungu lesibusako besikulelidolobha. Ngetulu kwaloko, emaKhristu lamanyenti bekanemakhaya futsi analetinye tintfo letinyenti kulelidolobha. Nanobe kunjalo, Jesu wecwayisa balandzeli bakhe kutsi bekutawudzingeka bahambe eJerusalema naseJudiya.​—Mat. 24:16.

5. Pawula wawasita njani lamaKhristu kutsi alungele loko bekuseta?

⁵ Kuze Pawula alungiselele lamaKhristu loko bekuseta, wawasita kutsi anake indlela Jehova bekalibuka ngayo lelidolobha laseJerusalema. Wawakhumbuta kutsi kuJehova, lelithempeli, buphristi kanye nemihlatjelo lebeyentiwa eJerusalema bekungasasiko ngcwele. (Heb. 8:13) Bantfu labanyenti lebebahlala kulelidolobha bebamphikile Mesiya. Besekute sidzingo sekutsi bantfu baye eJerusalema kuze bayokhonta Jehova, futsi beyitawubhujiswa.​—Luk. 13:34, 35.

6. Sisho ngani kutsi emavi aPawula laKumaHebheru 13:5, 6 efika ngesikhatsi kulamaKhristu?

⁶ Ngesikhatsi Pawula abhala lencwadzi leya kumaHebheru, iJerusalema bekulidolobha leliphumelelako. Lomunye umbhali waseRoma lebekaphila ngaleso sikhatsi wabita lelidolobha ngekutsi “lidolobha lelidvume kakhulu eMphumalanga.” EmaJuda lavela etindzaweni letinyenti bekavakasha kulelidolobha njalo ngemnyaka kuze atogubha imikhosi, lebekutfutfukisa umnotfo walelidolobha. Siyaciniseka kutsi lesimo senta lamanye emaKhristu enta imali lenyenti. Mhlawumbe kungako Pawula awatjela watsi: “Indlela leniphila ngayo ayingabi yekutsandza imali, kodvwa yenetiswani tintfo leninato.” Wabese usho emavi lanemandla lawacinisekisa latfolakala emiBhalweni, laveta setsembiso lesivela kuJehova lesitsi: “Ngeke ngize ngikushiye, futsi ngeke ngize ngikulahle.” (Fundza KumaHebheru 13:5, 6; Dut. 31:6; Hla. 118:6) EmaKhristu lahlala eJerusalema naseJudiya bekatasidzinga lesicinisekiso. Leni? Ngobe ngekushesha ngemuva kwekutfola lencwadzi, bewatawuphoceleleka kutsi ashiye emakhaya awo, emabhizinisi awo kanye netintfo tawo letinyenti. Ngemuva kwaloko, bekutawudzingeka kutsi acale imphilo lensha kulenye indzawo.

7. Kubaluleke ngani kutsi sikhulise indlela lesimetsemba ngayo Jehova nyalo?

⁷ Loko lesikufundzako: Yini letawenteka ngekushesha? Lelive litawuphela ‘ngekuhlupheka lokukhulu.’ (Mat. 24:21) NjengemaKhristu ekucala, kufanele sihlale siphapheme futsi silungele. (Luk. 21:34-36) Ngekuhlupheka lokukhulu, kungenteka kutawudzingeka sishiye konkhe lesinako nobe lokunye kwako, setsembe ngalokuphelele kutsi Jehova akayuze abashiye bantfu bakhe. Ngisho nanyalo, kusengakacali kuhlupheka lokukhulu, sinelitfuba lekukhombisa kutsi silibeke kuphi litsemba letfu. Tibute: ‘Loko lengikwentako nemigomo yami kuyakhombisa yini kutsi litsemba lami angikalibeki emcebeni, kodvwa ngilibeke kuNkulunkulu lowetsembisa kunginakekela?’ (1 Thim. 6:17) Kuliciniso kutsi nanobe tikhona tifundvo lesitifundza kuloko lokwenteka kumaKhristu ekucala, kodvwa ‘kuhlupheka lokukhulu’ lokutako kutawuba simo lesimatima kakhulu kwendlula nobe ngusiphi emaKhristu lake abhekana naso. Ngako sitawati njani kutsi yini lokufanele siyente nakucala kuhlupheka lokukhulu?

LALELA LABO LABAHOLAKO

8. Yini Jesu latjela bafundzi bakhe kutsi bayente?

⁸ Ngemuva kweminyaka lembalwa lamaKhristu atfole lencwadzi Pawula layibhalela emaHebheru, abona libutfo lemaRoma litungeleta iJerusalema. Loko bekukhombisa kutsi bekusikhatsi sekutsi abaleke; iJerusalema beyitawubhujiswa. (Mat. 24:3; Luk. 21:20, 24) Kodvwa bewatawubalekela kuphi? Jesu wamane nje watsi: “Labo labaseJudiya babobalekela etintsabeni.” (Luk. 21:21) Betitinyenti tintsaba kulendzawo. Ngako bebatawubalekela kuyiphi?

9. Yini lebeyingenta emaKhristu atibute kutsi atawubalekela kutiphi tintsaba? (Buka nelibalave.)

⁹ Cabanga ngetintsaba lamaKhristu lebekangabalekela kuto: tintsaba taseSamariya, tintsaba taseGalile, iNtsaba iHemoni netintsaba taseLebanoni kanye netintsaba letingesheya kweJordane. (Buka libalave.) Lamanye emadolobha lakuletindzawo letinetintsaba kungenteka bekabonakala aphephile. Sibonelo nje, lidolobha laseGamla belisesicongweni sentsaba lephakeme kakhulu futsi bekumatima kakhulu kufika kulo. Lamanye emaJuda acabanga kutsi lena bekuyindzawo lekahle langabalekela kuyo. Nanobe kunjalo, kwesuka imphi lenkhulu emkhatsini wemaJuda nemaRoma kulendzawo, futsi bantfu labanyenti bakhona bafa.b

10-11. (a) Kungenteka Jehova wabacondzisa njani bantfu bakhe? (KumaHebheru 13:7, 17) (b) Kwawasita njani emaKhristu kulalela labo labaholako? (Buka nesitfombe.)

¹⁰ Kubonakala ngatsi Jehova wacondzisa lamaKhristu asebentisa labo lebebahola ebandleni. Lesinye satimlandvo lokutsiwa ngu-Eusebius, sabhala satsi: “Nkulunkulu wembulela emadvodza lawakhetsile kuze atjele emalunga elibandla laseJerusalema loko lebekufanele akwente . . . lamaKhristu atjelwa kutsi ahambe kulelidolobha ngaphambi kwekutsi kucale lemphi futsi aye edolobheni lasePheriya, lelibitwa ngekutsi yiPhela.” IPhela beyibonakala iyindzawo lekahle lebebangabalekela kuyo. Beyingasikhashane neJerusalema, lebekwenta kube melula kufika kuyo. Ngetulu kwaloko, bantfu labanyenti basePhela bebangasiwo emaJuda, ngako bebangetami kulwela inkhululeko kumaRoma.​—Buka libalave.

¹¹ LamaKhristu labalekela etintsabeni asilalela seluleko saPawula ‘sekulalela labo laholako’ ebandleni. (Fundza KumaHebheru 13:7, 17.) Ngenca yaloko, bantfu baNkulunkulu basindza. Umlandvo ukhombisa kutsi Nkulunkulu akazange abashiye labo ‘lebebalindzele lidolobha lelinetisekelo leticinile,’ lokunguMbuso waNkulunkulu.​—Heb. 11:10.

12-13. Jehova ubacondzise njani bantfu bakhe ngetikhatsi letimatima?

¹² Loko lesikufundzako: Jehova usebentisa labo labaholako kuze anike bantfu bakhe ticondziso leticacile. EBhayibhelini, kunetibonelo letinyenti letikhombisa indlela Jehova lasebentise ngayo belusi kuze bacondzise bantfu bakhe ngetikhatsi letimatima. (Dut. 31:23; Hla. 77:20) Natsi lamuhla sibone bufakazi lobunyenti lobukhombisa kutsi Jehova uyachubeka nekusebentisa labo labaholako.

¹³ Sibonelo nje, ngesikhatsi kucala i-COVID-19, ‘labo labaholako’ bakhipha ticondziso letidzingekile. Labadzala belibandla batfola ticondziso letimayelana nekutsi libandla lingahlangana njani futsi lichubeke nekukhonta Jehova. Ngekushesha nje ngemuva kwekutsi kubhedvuke lesifo, saba nemhlangano loyincophamlandvo ngetilwimi letingetulu kwa-500, lebewutfolakala ku-Internet, ku-TV, naku-radio. Sachubeka sitfola imfundvo lenyenti levela kuNkulunkulu. Ngenca yaloko, sahlala sinebunye. Singaciniseka kutsi ngisho singabhekana natiphi tinkinga esikhatsini lesitako, Jehova utawuchubeka abasita labo labaholako kuze bente tincumo letihlakaniphile. Ngetulu kwekwetsemba Jehova kanye nekulalela imitsetfo yakhe, ngubuphi lobunye buntfu lobutasisita kutsi silungele kuhlupheka lokukhulu futsi sente ngekuhlakanipha ngalesikhatsi lesitawunyakatisa umhlaba wonkhe?

KHOMBISA KUTSI UYABATSANDZA BAZALWANE FUTSI WEMUKELE TIHAMBI

14. Ngekusho kwembhalo waKumaHebheru 13:1-3, ngubuphi buntfu emaKhristu lebekufanele abukhombise ngaphambi kwekutsi iJerusalema ibhujiswe?

¹⁴ Nakucala kuhlupheka lokukhulu, kutawudzingeka sikhombise kakhulu kunakucala kutsi siyatsandzana. Kuloku, kutawudzingeka silingise sibonelo salamaKhristu lebekahlala eJerusalema naseJudiya. Bewavele akhombisana kutsi ayatsandzana. (Heb. 10:32-34) Kodvwa eminyakeni lengaphambi kwekutsi iJerusalema ibhujiswe, bekufanele akhombisane kakhulu kunakucala kutsi ‘ayatsandzana’ futsi ‘ayemukelana.’c (Fundza KumaHebheru 13:1-3.) Natsi kutawudzingeka sente lokufanako nakufika kuphela kwalelive.

15. Yini leyenta emaKhristu langemaHebheru kwadzingeka kutsi akhombisane lutsandvo sibili futsi emukelane ngemuva kwekubaleka?

¹⁵ Ngesikhatsi libutfo lemaRoma litungeleta iJerusalema futsi lijika kungakalindzeleki, emaKhristu abaleka netintfo letimbalwa nje kuphela. (Mat. 24:17, 18) Kwadzingeka etsembele kulomunye nalomunye njengobe ahamba etintsabeni futsi acala imphilo ekhaya lawo lelisha. Siyaciniseka kutsi ‘bewanetidzingo letiphutfumako’ letinyenti, futsi loko bekutawuniketa lamaKhristu litfuba lekutsi akhombisane kutsi atsandzana sibili nekutsi ayemukelana ngekutsi asekelane futsi ephane loko lanako.​—Thit. 3:14.

16. Singakhombisa njani kutsi siyabatsandza bazalwane betfu nabodzadze labadzinga lusito? (Buka nesitfombe.)

¹⁶ Loko lesikufundzako: Lutsandvo lusikhutsata kutsi sisite bazalwane betfu nabodzadze nabadzinga lusito. Sibonelo nje, labanyenti bavule tandla kuze basite bazalwane babo nabodzadze lababaleke emaveni abo ngenca yetimphi kanye netehlakalo temvelo. Banikete labazalwane nabodzadze tintfo labatidzingako kuze bachubeke baphila, babasita futsi babakhutsata kutsi bachubeke bakhonta Jehova. Lomunye dzadze wase-Ukraine lowashiya likhaya lakhe ngenca yemphi utsi: “Sisibonile sandla saJehova sisicondzisa futsi usisitile asebentisa bazalwane betfu nabodzadze. Basemukele kahle futsi basisita kakhulu e-Ukraine, eHungary, nalaGermany.” Labo labemukela bazalwane babo nabodzadze futsi banakekele tidzingo tabo, bangemathulusi etandleni taJehova.​—Taga 19:17; 2 Khor. 1:3, 4.

17. Kubaluleke ngani kutsi sibatsandze kakhulu nyalo bazalwane betfu nabodzadze futsi sibemukele?

¹⁷ Siyaciniseka kutsi sitawuba sikhulu kakhulu sidzingo sekusita bazalwane betfu nabodzadze esikhatsini lesitako kwendlula nyalo. (Hab. 3:16-18) Jehova uyasicecesha kwanyalo kutsi sibatsandze kakhulu bazalwane betfu nabodzadze futsi sibemukele, lokubuntfu lesitabudzinga kakhulu ngaleso sikhatsi.

LOKO LOKUSETA

18. Singawalingisa njani emaKhristu langemaHebheru?

¹⁸ Njengobe umlandvo ukhombisa, lamaKhristu labalekela etintsabeni akhona kugwema lenhlekelele leyehlela iJerusalema. Alishiya lelidolobha, kodvwa Jehova akazange awashiye. Kutsiwani ngasesikhatsini setfu? Asati kutsi kahle kahle kutawentekani esikhatsini lesitako. Kodvwa sinesecwayiso saJesu sekutsi kufanele sihlale sikulungele kulalela. (Luk. 12:40) Siphindze sibe neseluleko Pawula lasibhala encwadzini lebeyiya kumaHebheru, futsi leseluleko sisasebenta nalamuhla, njengobe besisebenta ngesikhatsi semaKhristu ekucala. Ngetulu kwaloko, sinesicinisekiso lesivela kuJehova sekutsi akayuze asishiye nobe asilahle. (Heb. 13:5, 6) Shengatsi singatimisela kufuna lelidolobha lelitawuhlala njalo, lokunguMbuso waNkulunkulu, futsi sijabulele tibusiso talo letitawuba khona kuze kube phakadze.​—Mat. 25:34.