Ngubani Lotawusindzisa Umhlaba?

Bantfu labanyenti bakhatsatekile ngetintfo letentiwa bantfu letilimata umhlaba kanye netintfo letiphilako letikuwo. Ngekusho kwaletinye tati temvelo, setinyenti tintfo bantfu labatentako letilimata umhlaba futsi letingacedza tintfo letiphilako emhlabeni.

Bantfu batawuchubeka yini balimata umhlaba? Batawuke bakhone yini kuphila ngendlela lengayilimati imvelo?

Imetamo yebantfu itawuphumelela yini?

Tati letinyenti tikholelwa kutsi bantfu bangakhona kuwuvikela umhlaba futsi baphile ngendlela lengayilimati imvelo. Labanye bacwaningi batsi kuze imetamo yebantfu iphumelele kudzingeka kwentiwe lushintjo etintfweni letehlukahlukene futsi lolushintjo lwentiwe ngasikhatsi sinye. Lolushintjo lungafaka ekhatsi:

• Indlela bantfu labanakekela ngayo umhlaba, emahlatsi, ematete, kanye nelwandle.

• Kusebentisa tindlela letehlukahlukene tekulima kanye netindlela letehlukahlukene tekwakha gesi.

• Kushintja indlela kudla lokukhicitwa ngayo kuze bantfu badle kakhulu tibhidvo, inyama kanye netimfishi letisesilinganisweni ngaleyondlela kungamoshwa kudla.

• Kwemukela kutsi kuze umuntfu ajabule ekuphileni akudzingeki abe netintfo letinyenti.

Ucabangani? Kunengcondvo yini kulindzela bohulumende, bosomabhizinisi kanye nalabanye bantfu kutsi babambisane ngendlela labangazange sebake babambisane ngayo? Nobe ucabanga kutsi angeke yini baze bakhone kubambisana ngobe labanye bantfu banebugovu, baticabangela bona futsi abanendzaba nemiphumela yetento tabo?​—2 KuThimothi 3:1-5.

Lokusenta sibe nelitsemba

LiBhayibheli liyasicinisekisa kutsi iplanethi yetfu isetandleni letiphephile. Lisichazela kutsi yini lebangela kutsi imetamo yebantfu yekusindzisa umhlaba ungaphumeleli, kanye nekutsi nguluphi lushintjo mbambambamba lokufanele lwentiwe. LiBhayibheli liphindze livete kutsi lolushintjo lutokwenteka kanjani.

Lokwenta imetamo yebantfu iyodvwa ingaphumeleli ekusindziseni umhlaba. Jehovaa Nkulunkulu wadala umhlaba, futsi waniketa bantfu umsebenti wekuwunakekela. (Genesisi 1:28; 2:15) Intfo lebeyitobenta baphumelele kulomsebenti wabo kutsi betsembele kuMdali wabo kuze abacondzise futsi balalele ticondziso takhe. (Taga 20:24) Kunekwenta loko, bantfu bamlahla Jehova futsi bakhetsa kwenta lokufunwa ngibo. (Umshumayeli 7:29) Ngaphandle kweMdali wabo, bantfu angeke bakhone kuwunakekela umhlaba, futsi nobe nguluphi lushintjo labalwentako angeke luphemelele ngalokuphelele.​—Taga 21:30; Jeremiya 10:23.

Lushintjo lokufanele lwentiwe. Nkulunkulu utokwenta bantfu bangachubeki nekulimata umhlaba. (Sembulo 11:18) Angeke ashintje bantfu kanye nabohulumende abente bangasawulimati umhlaba futsi babe bantfu labancono, kunaloko utawuletsa lokutsite lokutobatsatsela sikhundla. (Sembulo 21:1) Kungako Jehova atsi: “Ngenta tonkhe tintfo tibe tinsha.”​—Sembulo 21:5.

Indlela lolushintjo lolutokwentiwa ngayo. Jehova utokwenta kutsi hulumende wasezulwini lobitwa ngekutsi nguMbuso waNkulunkulu utsatsele bohulumende bebantfu sikhundla. INkhosi yaloMbuso, lenguJesu Khristu itawubusa umhlaba wonkhe.​—Danyela 2:44; Matewu 6:10.

UMbuso waNkulunkulu utawufundzisa bantfu kutsi baphile ngekuvumelana netimiso takhe tekulunga. Bantfu nabetsembela kuMdali wabo futsi balandzela sicondziso sakhe, batawukhona kuphla ngendlela lengayilimati imvelo. (Isaya 11:9) LiBhayibhelli lichaza indlela uMbuso waNkulunkulu lotowenta ngayo bantfu lobabusako kutsi bakujabulele kuphila futsi bangawulimati umhlaba. Naku lotokwenta:

• Utokwenta bonkhe bantfu babe nekudla.​—Tihlabelelo 72:16.

• Utobuyisela imvelo esimeni sayo.​—Isaya 35:1, 2, 6, 7.

• Utokwenta bantfu batinakekele kahle tilwane futsi netilwane tingabalimati bantfu.​—Isaya 11:6-8; Hoseya 2:18.

• Utokwenta kungabi netehlakalo temvelo.​—Makho 4:37-41.

Ciniseka kutsi madvutane uMbuso waNkulunkulu utolwenta lolishintjo. Kuze utfole lokunyenti, fundza sihloko lesitsi “UMbuso WaNkulunkulu Utawubusa Nini Emhlabeni?”