Kwa Nini Kuwa Mwenye Shukrani?

TAZAMA jalada la mbele la gazeti hili. Kwa uhakika, linatukumbusha kwamba kuna vitu vingi vyenye uzuri vya kusawazisha sura mbaya na uchafu-uchafu unaoonekana kila upande.

Je! wewe unathamini vitu vyenye uzuri? Fikiria upinde wa mvua wenye mchanganyiko wa rangi tulivu na laini baada ya ule weusi wa mvua kali kupita. Wazia anguko la maji lenye kupomoka-pomoka. Au jaribu kuona akilini wanyama wakiruka-ruka pamoja na wachanga wao. Piga picha akilini ya bustani ya maua yenye kupendeza, au mazao tele ya ngano. Ndiyo, kwa watu wengi hii ni miono ya kawaida. Lakini ina athari gani kwako wewe?

Inachukuliwa Kivivi-hivi kwa Urahisi

Kwa kawaida, jambo linapoonwa maishani mara nyingi zaidi, ndivyo linavyozidi kuwa la kikawaida tu—na ndivyo ilivyo rahisi zaidi kulichukua kivivi-hivi. Kupungukiwa huku huenda kukaonekana wazi zaidi katika karne ya 20 yenye kwenda kasi. Lakini kutochukua wakati wa kutafakari au kuhesabu baraka na sababu za kuwa wenye shukrani kumekuwa sikuzote moja la makosa ya kupungukiwa kwa aina ya binadamu.

Kwa upande ule mwingine, mtunga zaburi Daudi, akiwa chini ya uvuvio wa Mungu, alitoa ushukuru mara nyingi katika wimbo. Maneno haya yaliyoelekezwa kwa Mungu katika mmoja wa midundo mitamu ya Daudi ni mfano mmoja wa msingi wa ushukuru:

“Wakati mimi ninapoona mbingu zako, kazi za vidole vyako,

Mwezi na nyota ambazo wewe umetayarisha,

Binadamu mwenye kufa ni nini hivi kwamba wewe unamtia maanani,

Na mwana wa binadamu hivi kwamba wewe unamtunza?

Wewe unamfanya yeye atawale juu ya kazi za mikono yako;

Kila kitu wewe umeweka chini ya nyayo zake:

Ng’ombe wadogo na maksai, wote kati yao,

Na pia hayawani wa shamba la peupe,

Ndege wa mbinguni na samaki wa bahari,

Kitu cho chote kinachopita katika vijia vya zile bahari.

O Yehova Bwana wetu, jinsi lilivyo lenye adhama jina lako katika dunia yote!”​—Zaburi 8:3, 4, 6-9, NW.

Ushukuru Unaweza Kukandamiza Majonzi

Ushukuru wa mtunga zaburi kwa vitu vyenye uzuri ilisaidia kusawazisha majonzi yo yote yaliyoletwa na miono isiyopendeza au hali zenye magumu. Wewe pia unaweza kuona jambo hilo hilo. Jinsi gani? Kwa kujitahidi kuthamini kwa ukamili zaidi mambo yenye kupendeza yanayotuzunguka. Kwa njia hii, wewe unaweza kuongeza furaha yako na ile ya wale wanaokuzunguka wewe.

Kwa hiyo kwa nini usiache miono ya kila siku iliyo na uzuri na ustaajabu ikuharakishe kuwa na ushukuru wenye kuhisiwa moyoni kwa Muumba wetu mwenye kunufaisha watu? Sasa fikiria sababu fulani za ziada za kuwa mwenye shukrani.