JE, KUNA jambo baya kuliko kushindwa? Ndiyo, jambo hilo ni mafanikio ya uwongo. Unaposhindwa kutimiza jambo fulani, unaweza kujitahidi kulirekebisha. Hata unaweza kuazimia kuliboresha jambo hilo.

Hali ni tofauti na mafanikio ya uwongo. Mtu anaweza kudhani amefanikiwa ilhali ameshindwa. Lakini anapotambua anahitaji kufanya marekebisho, huenda ikawa kuchelewa mno.

Fikiria mfano ufuatao. Yesu Kristo aliuliza hivi: “Mtu atapata faida gani akiupata ulimwengu wote lakini aipoteze nafsi yake?” (Mathayo 16:26) Hoja hiyo ya Yesu inawahusu wale ambao wanadhani kwamba mafanikio ya kweli yanaletwa na pesa na mali nyingi, ambacho ni chanzo kikuu cha mafanikio ya uwongo. Tom Denham, mshauri wa mambo ya kazi alisema: “Kufikiria tu cheo, kupata pesa zaidi au kutafuta mali nyingi, hakumfanyi mtu aridhike. Kupima mafanikio kwa njia hiyo si sahihi na hakuleti furaha ya kweli.”

Bila shaka, watu wengi wanakubaliana na maneno hayo. Utafiti uliofanywa nchini Marekani kuhusu “mambo yanayochangia maisha yenye mafanikio,” uliorodhesha “kuwa na pesa nyingi” katika nafasi ya 20 kati ya mambo 22. Kati ya mambo yaliyoorodheshwa kwanza ni afya njema, mahusiano mema, na kazi unayoipenda.

Bila shaka, watu wengi wanaweza kutofautisha kati ya mafanikio ya kweli na mafanikio ya uwongo, wanapoombwa kufanya hivyo. Hata hivyo ni vigumu kufanya uamuzi sahihi kuhusiana na mafanikio ya kweli.

Ili ujipime, fikiria hali zifuatazo.

Ni yupi ambaye ungesema amefanikiwa kikweli?

• 

  ALEX

  Alex ni mfanyabiashara. Yeye ni mnyoofu, anafanya kazi kwa bidii, na ni mwenye adabu. Biashara ya Alex imesitawi, na hivyo yeye na familia yake wanaishi vizuri.

• 

  CAL

  Cal pia anafanya biashara kama ya Alex, lakini ana pesa nyingi zaidi. Ili afanikiwe, Cal hufanya kazi kupita kiasi na amepatwa na magonjwa mbalimbali.

• 

  JANET

  Janet ni mwanafunzi mwenye bidii na anapenda masomo. Kwa sababu ya bidii yake, yeye hupata alama nzuri.

• 

  ELLEN

  Ellen hupata alama za juu kuliko Janet na ni mwanafunzi anayeheshimiwa—lakini yeye huiba mitihani na hapendi masomo.

Ikiwa umesema Cal na Ellen—au wote wanne—wamefanikiwa, huenda unapima mafanikio kwa kuangalia tu matokeo, bila kujali jinsi matokeo hayo yalivyopatikana.

Kwa upande mwingine, ikiwa umechagua Alex na Janet, huenda umepima mafanikio kwa kuangalia sifa za mtu na maadili ya kazi. Inafaa kufanya hivyo. Fikiria mifano ifuatayo.

• Ni jambo gani litakalomletea Janet faida za kudumu—je, ni kupata alama za juu au ni kupenda masomo?

• Watoto wa Alex wanahitaji nini? Je, wanahitaji kununuliwa chochote wanachotaka, au wanahitaji baba anayewapenda na anayetumia muda pamoja nao?

Jambo kuu: Mafanikio ya uwongo yanategemea mambo yanayoonekana; mafanikio ya kweli hutegemea maadili yanayofaa.

Biblia inawatia moyo watu wawe na maoni yanayofaa kuhusu mafanikio ya kweli. Biblia haisemi kwamba ni watu wachache tu wanaoweza kufanikiwa. Pia, si kama vitabu vinavyowahimiza watu ‘wafuate ndoto zao’ na mambo yatawaendea sawa. Dhana hiyo—ambayo watu wengi wamefundishwa tangu utotoni—huwakatisha tamaa baadaye.

Ukweli ni kwamba, kila mtu anaweza kupata mafanikio ya kweli—lakini inahitaji jitihada. Chunguza kanuni zifuatazo.

• 

  BIBLIA INASEMA NINI?

  “Anayependa fedha hatatosheka na fedha, wala anayependa mali hatatosheka na mapato.”—Mhubiri 5:10.

  MAANA YAKE NI NINI? Kuwa na pesa nyingi hakumfanyi mtu aridhike. Mara nyingi huwa ni kinyume. Dakt. Jean M. Twenge anasema hivi katika kitabu chake Generation Me: “Watu ambao malengo yao ni kupata pesa nyingi huwa na wasiwasi na hushuka moyo kuliko wale ambao wanathamini kuwa na uhusiano mzuri na wengine.” Anaongeza hivi: “Utafiti unathibitisha kwamba pesa haziwezi kununua furaha—baada ya kupata vitu unavyohitaji maishani, si lazima upate pesa nyingi ili uridhike.”

  JAMBO LA KUFANYA. Jiwekee lengo lenye kuridhisha zaidi kuliko kutafuta pesa na mali. Yesu alisema hivi: “Mjilinde na kila namna ya tamaa, kwa sababu hata wakati mtu ana vitu vingi uzima wake hautokani na vitu alivyo navyo.”—Luka 12:15.

• 

  BIBLIA INASEMA NINI?

  “Kiburi hutangulia kuanguka, na roho ya majivuno hutangulia kujikwaa.” —Methali 16:18.

  MAANA YAKE NI NINI? Kiburi na kujitakia makuu hakuwezi kukusaidia ufanikiwe kikweli. Kitabu kiitwacho, Good to Great kinasema kwamba wasimamizi wa makampuni waliofanikiwa zaidi “ni wenye kiasi na wasiotaka makuu. Kinyume chake, karibu asilimia 66 ya wasimamizi waliotamani sana kutambulika, walisababishia kampuni zao hasara.” Tunajifunza nini? Ukijifikiria kupita kiasi huenda utashindwa, badala ya kufanikiwa.

  JAMBO LA KUFANYA. Badala ya kujitakia makuu, uwe mwenye kiasi. Biblia inasema: “Yeyote akifikiri kuwa yeye ni kitu wakati yeye si kitu, anaidanganya akili yake mwenyewe”—na hayo si mafanikio!—Wagalatia 6:3.

• 

  BIBLIA INASEMA NINI?

  “Kwa mwanadamu hakuna jambo bora kuliko . . . kuifanya nafsi yake ione mema kwa sababu ya kazi yake ngumu.”—Mhubiri 2:24.

  MAANA YAKE NI NINI? Ukisitawisha mazoea mazuri ya kazi, utafurahia kazi yako. Katika kitabu chake kiitwacho Teach Your Children Well, Dakt. Madeline Levine aliandika hivi: “Ili ufanikiwe kufanya jambo fulani unapaswa kulifanya kwa ustadi, na ili ulifanye kwa ustadi unahitaji bidii na kutokufa moyo.” Hilo linatia ndani kutokata tamaa unapokabiliana na hali ngumu.

  JAMBO LA KUFANYA. Jitahidi kupata ustadi wa kufanya kazi, na unapokabiliana na hali ngumu usikate tamaa. Ikiwa una watoto, wape fursa (kulingana na umri na uwezo wao) ya kutatua matatizo yao. Usifanye haraka kuwasaidia kutatua matatizo yao yote. Vijana huridhika sana—na kupata mazoezi yatakayowasaidia baadaye maishani—wanapositawisha uwezo wa kutokata tamaa.

• 

  BIBLIA INASEMA NINI?

  “Mbwa aliye hai ni afadhali kuliko simba aliyekufa.”—Mhubiri 9:4.

  MAANA YAKE NI NINI? Ikiwa umeajiriwa, kazi yako inapaswa kuwa sehemu ya maisha yako, bali si maisha yako yote. Kwa kweli, je, unaweza kusema kwamba una mafanikio ya kweli ikiwa umepata cheo kikubwa kazini lakini afya yako imezorota au familia yako haikuheshimu? Watu wenye mafanikio ya kweli hujitahidi kusawazisha kati ya kazi, afya, na familia zao.

  JAMBO LA KUFANYA. Tunza afya yako. Pumzika vya kutosha. Hakuna faida kufanya kazi kupita kiasi na kupuuza mambo mengine yote kutia ndani afya yako, familia, na marafiki ili tu upate mafanikio.

• 

  BIBLIA INASEMA NINI?

  “Wenye furaha ni wale wanaotambua uhitaji wao wa kiroho.”—Mathayo 5:3.

  MAANA YAKE NI NINI? Siri ya mafanikio ya kweli ni kusoma Biblia na kutumia yale unayosoma. Kwa kweli, mamilioni ya Mashahidi wa Yehova wamepata mafanikio ya kweli kwa kutanguliza mambo ya kiroho maishani, na hilo limewapunguzia mahangaiko kuhusiana na vitu vya kimwili.—Mathayo 6:31-33.

  JAMBO LA KUFANYA. Jifunze jinsi Biblia inavyoweza kukusaidia kupata mafanikio ya kweli. Ili upate habari zaidi zungumza na Mashahidi wa Yehova katika eneo lenu au utembelee Tovuti yetu ya www.pr2711.com/sw.