Je, Unaweza Kutumika Mahali Penye Uhitaji Mkubwa Zaidi wa Wahubiri?

“Tuliishi raha mustarehe nchini Marekani lakini tulikuwa na wasiwasi kwamba hali ya kutafuta sana mali katika eneo hilo ingekuwa na uvutano mbaya kwetu na kwa wana wetu wawili. Zamani mimi na mke wangu tulikuwa wamishonari, na tulitaka kufurahia tena maisha hayo rahisi lakini yenye furaha.”

MWAKA wa 1991, tamaa hiyo iliwachochea Ralph na Pam kuandikia ofisi kadhaa za tawi na kueleza kwamba walitamani kutumika mahali penye uhitaji mkubwa zaidi wa wahubiri wa Ufalme. Ofisi ya tawi ya Mexico iliwajibu kwamba kulikuwa na uhitaji mkubwa sana wa wahubiri wa Ufalme wanaoweza kuwahubiria watu wanaozungumza Kiingereza nchini humo. Ofisi hiyo ya tawi ilisema kwamba kwa kweli eneo hilo ni ‘jeupe kwa ajili ya kuvunwa.’ (Yoh. 4:35) Muda si muda, Ralph na Pam, pamoja na wana wao wawili wenye umri wa miaka 8 na 12, walikubali mwaliko huo wakaanza kujitayarisha kuhamia Mexico.

Eneo Kubwa Sana

Ralph anasema hivi: “Kabla ya kuhama Marekani, ndugu na dada fulani wenye nia nzuri walituambia hivi: ‘Ni hatari sana kuhamia nchi nyingine!’ ‘Mtafanya nini mkipatwa na ugonjwa?’ ‘Kwa nini mnahamia eneo la watu wanaozungumza Kiingereza? Watu hao wanaozungumza Kiingereza hawatapendezwa na kweli!’ Hata hivyo, tuliazimia kwenda. Bila shaka, uamuzi wetu wa kuhama haukuwa wa kushtukia tu. Kwa miaka mingi tulikuwa tukipanga kuhama. Tuliepuka kuwa na madeni ya muda mrefu, tuliweka kando kiasi fulani cha pesa, na tulizungumza mara nyingi tukiwa familia kuhusu matatizo ambayo tungekabili tukihama.”

Kwanza, Ralph na familia yake walitembelea ofisi ya tawi ya Mexico. Katika ofisi hiyo, ndugu waliwaonyesha wageni hao ramani ya nchi yote ya Mexico na kuwaambia hivi: “Hili ndilo eneo lenu!” Familia hiyo iliamua kuishi San Miguel de Allende, mji wenye wageni wengi, ulio umbali wa kilomita 240 kaskazini-magharibi ya jiji la Mexico City. Baada ya miaka mitatu kupita, kutaniko la Kiingereza lenye wahubiri 19 lilianzishwa katika mji huo. Hilo ndilo lililokuwa kutaniko la kwanza la Kiingereza katika Mexico—lakini kulikuwa na kazi nyingi zaidi iliyowangoja.

Inakadiriwa kwamba Wamarekani milioni moja hivi wanaishi katika nchi ya Mexico. Kwa kuongezea, kuna wanafunzi na wataalamu wengi wa Mexico ambao wanazungumza lugha ya Kiingereza ikiwa lugha yao ya pili. Ralph anaeleza hivi: “Tulisali ili tupate wafanyakazi zaidi. Sikuzote tulikuwa na chumba cha ziada cha kulala katika nyumba yetu kwa ajili ya akina ndugu na dada waliokuja katika eneo letu ili ‘kuipeleleza nchi.’”—Hes. 13:2.

Ndugu na dada fulani wa Mexico walianza pia kusaidia kuhubiri kwa lugha ya Kiingereza. Kwa mfano, Rubén na familia yake waliposikia kwamba kutaniko la kwanza la Kiingereza lilikuwa limeanzishwa huko San Miguel de Allende na kwamba eneo la kutaniko hilo ni nchi yote ya Mexico, waliamua mara moja kusaidia. Kwa hiyo, walihitaji kujifunza Kiingereza, kuzoea utamaduni tofauti, na kusafiri mbali sana, kilomita 800 kila juma ili kuhudhuria mikutano. Rubén anasema hivi: “Tulifurahi sana kuwahubiria wageni ambao wameishi Mexico kwa miaka mingi lakini ambao ilikuwa mara ya kwanza kwao kusikia habari njema katika lugha yao wenyewe. Wengine wao walionyesha uthamini sana hivi kwamba wakatokwa na machozi.” Baada ya kusaidia kutaniko la San Miguel de Allende, Rubén na familia yake walitumikia wakiwa mapainia katika mji wa Guanajuato, ulio katikati ya Mexico, ambako walisaidia kuanzisha kutaniko la Kiingereza lenye wahubiri zaidi ya 30. Leo, wanatumikia katika kikundi cha Kiingereza huko Irapuato, mji ulio karibu na Guanajuato.