Je, Mashahidi wa Yehova Wanastahili Kuokolewa kwa Sababu Wanahubiri Nyumba kwa Nyumba?

Hapana. Tunahubiri nyumba kwa nyumba kwa ukawaida, lakini hatuamini kama tunastahili kuokolewa kwa sababu tunafanya kazi hiyo. (Waefeso 2:8) Sababu gani?

Fikiria mufano huu: Wazia kwamba mutu fulani mwema anaahidi kutolea zawadi yenye bei kila mutu atakeyekuja mahali fulani tarehe fulani. Ikiwa unaamini kabisa kama mutu huyo atatimiza ahadi yake, je, utafuata maagizo yake? Bila shaka! Labda utaelezea pia marafiki wako na watu wa familia yako kuhusu jambo hilo, ili wao pia wapate zawadi hiyo. Hata hivyo, si kusema kama unastahili kupokea zawadi hiyo kwa sababu ulifuata maagizo ya mutu huyo. Lakini atakutolea zawadi hiyo sababu tu anapenda kufanya hivyo.

Vilevile, Mashahidi wa Yehova wanaamini kama wanadamu wote wanaomutii Mungu watapata uzima wa milele kama alivyoahidi. (Waroma 6:23) Tunajikaza kuwaambia watu wengine mambo tunayoamini, tukitumaini kwamba watafaidika na ahadi za Mungu. Lakini hatuamini kama tunastahili kuokolewa sababu tunahubiri. (Waroma 1:17; 3:28) Hakuna kazi ambayo mutu anaweza kufanya ili kustahili baraka hiyo kubwa kutoka kwa Mungu. Biblia inasema kwamba Mungu “alituokoa si kwa sababu ya jambo lolote jema tulilotenda sisi, bali kwa sababu ya huruma yake.”—Tito 3:5, Biblia Habari Njema.