Yaandikilue na Marko
11 Lubabanga basyafika pepi ni Yerusalemu, baafikile ku Lupili lwa Mizeituni, kolia kubanga kwali muzi wa Betfage ni wa Betania. Kisia, Yesu waatuminepo babili pa basambi bakue 2 ni kubalanda evi: “Endo mwaye mu olia muzi umwamona palia. Kabili lumuli kuya sie kwingilamo, muli kuya kumona ka punda kakakilue, kaalia kasinapilukwepo na muntu ata umo mpaka lonu. Mukakakule ni kukaleta panu. 3 Kabili, kine muntu wamiipuzia, ‘Juu ya ki muli mukukita evi?’ lande evi, ‘Mulopue ali nako lazima, kabili ali kumibweziizia sie lenu.’” 4 Pa kako, baaile ni kusanga ka punda kakakilue pepi ni mulyango wa nsesi elia ibanga yali mu mbali musebo, kisia baakakwile kako ka punda. 5 Inzi, bantu bamo babanga baimeene papo baabepuziizie evi: “Muli mukuya mwakakwila ki kako ka punda?” 6 Basambi baalandile sie belia bibaaninue na Yesu, ni babo bantu baabalekeleele baye.
7 Baamuleteele Yesu kako ka punda, kabili baapanzikilepo maubo abo a panze, kisia Yesu waapilukile pa ka punda ni kwikalapo. 8 Kabili, bantu bengi baapanzikile maubo abo a panze mu musebo, ni bange, baali bateeta bimpuze bya ku bimuti bya mu mbali musebo. 9 Baalia babanga batangiile ni baalia babanga bali ku nyuma, baatwaliliile kupunda, balanda evi: “Pususia, twalomba! Apaalilue ni olia waiza mu liina lyakue Yehova!* 10 Bukolo bolia buli mukwiza bwakue baba wetu Daudi, bupaalilue! Pususia, twalomba, wewe ali pa fwasi ilendukile!” 11 Kisia, waaingiile mu Yerusalemu ni kuya mu ekalu, kabili waakentele kila kintu kibanga kyali momo. Inzi, pantu ibanga yasyali kyungulo sana, waafumine ni kuya ku Betania pamo ni batumua.
12 Busiku bwaakonkelepo, lubabanga bafuma ku Betania, Yesu waaunvwile nzala. 13 Lwabanga wali kule, waamwene kimuti kya miku kyaliko mani, kisia waaile evi amone kine kunti wapatako ni kantu. Lwaafikilepo, taapatileko ata kantu, inga sie mani, pantu te kibanga kyali kipindi kya miku. 14 Pa kako, waakilandile evi: “Muntu te kunti akalieko ata limo matunda kuli wewe.” Ni basambi bakue babanga batwiliziizie.
15 Kisia, baafikile ku Yerusalemu. Koko, waaingiile mu ekalu ni kubamba kubakuumba baalia baali basisia ni kusita bintu mu ekalu, kabili waafulamwine ma meza a baalia baali basintuzyania makuta, ni bitebe bya baalia baali basisia tukunda. 16 Kabili, taalekeleele muntu ata umo mu ekalu apite watweme kiyombo. 17 Kabili, abanga wabasambilizia bantu, walanda evi: “Eba, Malembo te alandile abe nangue ‘Nsesi yane yakakuutua nsesi ya lipepo ya bantu bonse’? Inzi mwemue, mwaikita yaaluka nsesi ya ba kabooko.” 18 Kabili, bakulu ba ba makoani ni ba kalemba ba sheria baaunvwile ezio milandu, ni kubamba kukeba vya kunti bakabe kumwipaya. Inzi babanga bamutiina, pantu bantu bonse babanga bapapiiwa na masambilizio akue.
19 Koba lukabanga kasyazikilila, baafumine mu muzi ukata. 20 Busiku bwakonkelepo lukele-keele paakili, lubabanga bapita papo, baamwene kelia kimuti kya miku kyasyaumine kutendekela ku misila yakue. 21 Petro lwaalangulukile palua kelia kimuti, waamulandile evi: “Rabi, mona! kimuti kelia kiwaakilainia kyaumanga.” 22 Yesu waabalandile evi: “Muye mwamuketekeele Leeza. 23 Namyana kisinka nangue kila muntu olia walulanda lolu lupili, ‘Fuma papa uye wipoze mu lyezi,’ kabili bila wali na masyaka mu mutima wakue, inzi wali ni kiketekelo nangue kelia kyalanda kili kukitika, kyakaba kukitika. 24 Keki i kyalengia milande nangue kintu kyonse kimwamulomba Leeza mu lipepo, muye mwaketekeele nga evelia mwe baakikipokelela kale, kabili mwakaba kukipata. 25 Kabili, lumuli mwaimana evi kupepa, eleele bantu bilubo byonse bibaakimikitila, evi ni Baba wenu olia ali ku muulu amyeleele bilubo byenu.” 26* ——
27 Baaizile kabili ku Yerusalemu. Lwabanga wali mukwenda mu ekalu, bakulu ba ba makoani, ba kalemba ba sheria pamo ni bantu bakotele baaizile 28 ni kumwipuzia evi: “Bebi bintu, uli wabikita na maka akue ni? Ao nani waakupeele aza maka a kukita bebi bintu?” 29 Yesu waabaasukile evi: “Ndi kumipuzia kipuzio kimo. Mungasuke, kusyali mibwile kine ndi nakita bebi bintu na maka akue ni. 30 Eba, lubatizio lwakue Yoane lwaafumine ku muulu ao ku bantu? Ale ngasuke.” 31 Pa kako, baabambile kulanziana evi bo bene: “Kine twalanda nangue, ‘lwaafumine ku muulu,’ ali kulanda nangue, ‘Ale juu ya ki te mwaamuzumiine?’ 32 Eba, twezie kulanda nangue ‘Lwaafumine ku bantu’?” Baabatiinine bantu, pantu babo bantu bonse baali bamumwene Yoane kuya wali kakiine nabi.* 33 Pa kako, baamwasukile evi: “Te tumanine.” Yesu waabalandile evi: “Ni nene nsimibwila kine ndi nakita bebi bintu na maka akue ni.”