Mukanda ku Bakolosai
1 Nene Paulo, mutumua wakue Kristu Yesu kupitila kutona kwakue Leeza, pamo ni Timoteo lupua wetu, 2 twamyandikila mwe batakatifu, kabili ba lupua ba kisinka bali mu buumo ni Kristu bali ku Kolosai:
Buwame* bwakue Leeza pamo ni mutende kufuma kuli wene, Baba wetu, biye byali pamo ni mwemue.
3 Lyonse tuli twamutasia Leeza, Baba wakue kwa Mulopue wetu Yesu Kristu, musita utuli twapepa pa lwenu, 4 pantu twaaunvwile palua kiketekelo kyenu muli Kristu Yesu ni palua ntono imuli nayo ku batakatifu bonse 5 juu ya kiswapilo kelia kimusungiilue ku muulu. Mwaaunvwile lwa ntanzi palua kekio kiswapilo kupitila mpunda ya kisinka ili mu mpunda iweme 6 elia yaakifika kwenu. Nga evelia sie mpunda iweme viili mukuvyala matunda ni kongezeka mu kyalo kyonse, i vikili mukukitika ni pakati kenu kubambila pa busiku bumwaaunvwile ni kumana mu nzila isili na kilubo buwame* bwakue Leeza mu kisinka. 7 Mwemue mwaakisambilila kekio kuli Epafra muzia netu mutonua, olia ali wamubombela Kristu mu kisinka pa lwetu. 8 Kabili, wene waakitubwila ntono imuli mukulangilila kupitila kukwasiiwa na mupasi wakue Leeza.*
9 Kekio i kilengiizie te kunti tulekele ata kanini kupepa pa lwenu kubambila pa busiku butwaaunvwile ezio mpunda. Lyonse, tuli twapepa evi mwizuziiwe kumana kusili na kilubo kwa kutona kwakue Leeza, pamo ni mulangue onse ni buvinde bwa kunvua kupitila mupasi utakatifu, 10 evi muye mwaenda mu nzila ipalile kuli Yehova* juu ya kunti mumusansamusie kakiine, ni koku mwatwaliliile kuvyala matunda mu kila miilo iweme ni kukila kwaluka ni kumana kusili na kilubo pa lwakue Leeza. 11 Kabili, tuli mukupepa kuli Leeza amipeele buvinde bonse kukonkana ni maka akue a bulumba evi muvinde kusipikizia mwapembeleele, kabili mwali ni nsansa, 12 ni koku mwali mukumutasia Baba, olia waamilengiizie ni mwemue kumo mupale kupokelela bintu bya kupyana batakatifu, baalia bali mu mwangaza.
13 Wene waatupususiizie kufuma mu maka a nfinzi ni kututwala mu bukolo bwakue Mwana wakue mutonua, 14 kupitila wene, twaakikakulua na kilubula-mulandu, kabili twaakyeleelua mazambi etu. 15 Wene i mufuano wakue Leeza asizi kumoneka, kabili i libeli wa bibumbua byonse; 16 pantu kupitila wene, bintu binge byonse byaabumbilue mu muulu ni pa kyalo, bintu belia bili byamoneka ni bisizi kumoneka, biye byali bitebe bya bukolo ao bumulopue ao buteeko ao buvinde. Bintu binge byonse byaabumbilue kupitila wene, kabili juu yakue. 17 Kukila pa kako, wene ni wa ntanzi ya bintu binge byonse, ni kupitila wene, bintu binge byonse byaaizile kwalukako, 18 kabili wene i mutue wa mubili, i kulanda, kilonghaano. Wene i ntendeko, libeli kufuma ku bafwile, evi aaluke wa kwanza mu bintu byonse; 19 pantu Leeza waali ni nsansa ya kulengia bintu byonse biye byakumeene muli wene. 20 Kupitila Kristu, i kulanda, kupitila milopa elia yaaitilile wene pa kimuti kya mateso,* Leeza waapatanisiizie bintu binge byonse bili ku muulu ni pa kyalo kuli wene mwine.
21 Kakiine, lwa ntanzi, mwemue mubanga mwatengelue, kabili mubanga mwali balwani bakue Leeza, pantu mwaali mwawaza sie bintu bibipile. 22 Lonu, wene waakimipatanisia kupitila lufu lwaatesekelemo Yesu wali muntu. Leeza waakikita evio evi amilangisie kuli wene mwine kuya mwali batakatifu, bila mwali na kilubo, kabili bila mwali na mulandu, 23 kine sie kakiine mwatwalilila mu kiketekelo, mwaimaniisie pa musinzi, bila kutenta, ao sie kufumiiwa mu kiswapilo kya mpunda iweme elia imwaaunvwile, kabili elia yaasimikiilue ku bibumbua byonse pensina muulu. Nene Paulo, naalukile mubombi wa ezio mpunda iweme.
24 Lonu, ndi mukusekelela mu maavia ane juu yenu, kabili mwene nangue nsinateseke sana mu mubili wane pa lwakue Kristu juu ya mubili wakue, i kulanda, kilonghaano. 25 Naalukile mubombi wa keki kilonghaano kukonkana ni miilo ya kwimanina elia inaapeelue na Leeza juu yenu evi kusimikila kakiine mulandu wakue, 26 olia ubiikile mukati siri itakatifu elia yaali yafiikilue kubambila mu bipindi byaapitile* ni mu bizazi byaapitile. Inzi, lonu yaakifiikulua ku batakatifu bakue. 27 Leeza ali ni nsansa ya kulengia bunonsi buli ni bulumba bwa ezio siri itakatifu bumanike pakati ka ntundu. Ezio siri ni ezi: Kristu ali mu buumo pamo ni mwemue, kabili muli ni kiswapilo kya kwaluka mu bulumba pamo nakue. 28 Tuli twasimikila pa lwakue, kabili tuli twasoka ni kusambilizia kila muntu mu mulangue onse, evi tukwasie kila muntu amoneke kuya wakumeene mu buumo pamo nakue. 29 Kekio i kilengiizie ntwalilile kubomba kwa maka, ni koku naikwindile kupitila buvinde bwakue bolia buli mukubomba kwa maka muli nene.