Yaandikilue na Mateo
18 Ozo musita, basambi baamupaleeme Yesu ni kumwipuzia evi: “Kakiine, nani mukulu sana mu Bukolo bwa ku muulu?” 2 Kisia, Yesu waakuutile mwanike umo ni kumwimika pa bukata bwabo 3 ni kulanda evi: “Kakiine namyana nangue, kine te mwalulukile ni kwaluka nga baanike banini, temukengila ata kanini mu Bukolo bwa ku muulu. 4 Pa kako, kila muntu olia ali waikeefia nga ozu mwanike munini, i mukulu sana mu Bukolo bwa ku muulu; 5 kabili, kila muntu olia ali wamupokelela mwanike munini ali nga ozu juu ya liina lyane, ali wampokelela ni nene. 6 Kila muntu olia ali wamuponia umo pa baaba banini bali ni kiketekelo muli nene, kili bwino sana kuli wene akakililue mu mukosi libue lya kupelelako lili lyazyungulusia punda, kisia apozue pa lyezi evi atibile mu menda.
7 Bulanda ku bantu ba mu kenu kyalo bali balengia bantu bakite lizambi. Ata sie pali syani, kelia kili kyalengia kukita lizambi kyakeza, inzi bulanda ku muntu olia wakalengia lizambi likitue. 8 Kine kuboko kobe ao kuulu kobe kwakulengia uluvie, kuputule ni kukupoza kule. Kili bwino sana kuli wewe upate bukose* wali kipumputu ao kilema, kuliko upozue mu mulilo wa muyayaya wali ni maboko abili ao maulu abili. 9 Kabili, kine linso lyobe lyakulengia wiputale, litumbule ni kulipoza kule. Kili bwino sana kuli wewe upate bukose wali ni linso limo, kuliko upozue mu mulilo wa Gehena wali ni menso abili. 10 Mwakengeele evi te kunti mufuupule umo pa baaba banini. Namilanda nangue, ba malaika babo ba ku muulu lyonse bemeene ntanzi yakue* Baba wane olia ali ku muulu. 11 ——
12 Mwamona syani? Kine muntu umo ali ni mikooko mia imo (100), kisia pazeza mukooko umo, eba, tavinda kusianke ezio mikooko makumi kenda na kenda (99) ku mpili ni kuya kukeba olia mukooko umo uzezele? 13 Kabili kine wamupata olia mukooko, kakiine namyana nangue ali kunvua bwino sana juu ya olia mukooko kuliko elia mikooko makumi kenda na kenda (99) isyazezanga. 14 Enka evio, Baba wane* olia ali ku muulu ni wene tezi kutona ata sie umo pa baaba banini azeze.
15 Kukila pa kako, kine muzumizi nobe wakita lizambi, endo waye umubwile paswetele kilubo kyaakikita* mwalipo sie babili. Kine wakutwilizia wamupata muzumizi nobe. 16 Inzi kine wene wakaana kukutwilizia, kuutilapo ni muntu unge umo ao bakilile pa babili evi bintu byonse bilandue na ba kasininkizia* babili ao batatu. 17 Kine ozo muntu wakaana kubatwilizia, bwila kilonghaano. Kine wene wakaana kutwilizia ni kilonghaano, mumone sie nga mupagani kabili nga kasonkia wa bitansi.*
18 Kakiine namyana nangue, kila kintu kimwakakaka pa kyalo kyakaba kyasyakakilue ni ku muulu, ni kila kintu kimwakakakula pa kyalo kyakaba kyasyakakwilue ni ku muulu. 19 Kabili, namyana kakiine nangue, kine bantu babili pakati kenu pa kyalo baitabiziana palua kila kintu kya mana kibapalile kulomba, Baba wane olia ali ku muulu wakaba kubakitila kekio kintu. 20 Pantu, pa fwasi pakolonghana bantu babili ao batatu juu ya liina lyane, ni nene nakaba pamo nabo.”
21 Kisia, Petro waaizile ni kumwipuzia evi Yesu: “We Mulopue, kine mwinane wanduvia, mpalile kumweleela mara inga? Eba, mpaka mara saba?” 22 Yesu waamwasukile evi: “Nakwana nangue te mpaka mara saba, inzi mpaka mara makumi saba na saba (77).
23 Pa kako, Bukolo bwa ku muulu kunti bwapalaniiwa na likolo umo olia waatonene babombi bakue bamulipe madeni abo. 24 Lwaatendekele kukolonghania makuta akue, mubombi umo olia waali ni lideni lya talanta elufu likumi (10 000)* waaletelue. 25 Inzi, pantu tabanga wali na buvinde bwa kulipa azo makuta, likolo waalandile nangue ozo mubombi asisiiwe wene pamo ni mukazi wakue, baana bakue ni bintu byonse byabanga wakwete evi kulipa lideni. 26 Pa kako, ozo mubombi waafukeeme ni kumufwinamina* walanda evi: ‘Mpembelelenke sie, nakaba kukulipa kila kintu.’ 27 Pantu waamunvwiliile nkumbu, likolo waapuulwile ni kuvuta lideni lyakue ozo mubombi. 28 Inzi, ozo mubombi waafumine panze ni kuya kusaakaana ni mubombi nakue olia waali ni lideni lya dinari mia imo (100) kuli wene. Waamusakatiile ni kumufina pa mukosi, wamulanda evi: ‘Lipa lideni lyane lyonse.’ 29 Ozo mubombi nakue waafukeeme ni kutendeka kumupapaata walanda evi: ‘Emue, mpembelelenkeko sie, nakaba kukulipa.’ 30 Ata sie evio, waakeene kumunvua. Kisia waaile ni kulanda bamukake mu prizo mpaka akapue kulipa lideni lyakue. 31 Babombi nakue lubaamwene kekio kintu kyaakitile, baaunvwile sana ovio. Kabili, baaile kumubwila likolo wabo bintu byonse byaakitikile. 32 Kisia, likolo wakue waamukuutile ni kumulanda evi: ‘We mubombi abipile, naakivuta lideni lyobe lyonse luwaakimpapaata. 33 Eba, te wile wapalile kumunvwila nkumbu mubombi nobe nga evelia nene vinaakikunvwila nkumbu?’ 34 Pantu likolo waafiitilue sana, waamutwele ku balinzi bamukake mu prizo, mpaka akapue kulipa lideni lyakue lyonse. 35 Evi, i vibakamikitila ni mwemue kuli Baba wane wa ku muulu kine te mwizi kubeleela benenu kakiine.”