Yaandikilue na Mateo

5 Yesu lwaabamwene babo bantu bengi sana, waapilukile ku lupili; kisia kwikala, basambi bakue baamupaleeme. 2 Kisia, waabambile kulanda ni kutendeka kubasambilizia walanda evi:

3 “Bali ni nsansa ni baalia benikile nangue bali ni lazima ya kutungululua na Leeza, pantu Bukolo bwa ku muulu ni bwabo.

4 Bali ni nsansa ni baalia bali mukuloosia, pantu bakateekiiwa mutima.

5 Bali ni nsansa ni baalia bafuukile, pantu bakapyana kyalo.

6 Bali ni nsansa ni baalia bonvwile nzala ni kyaka kya nsambu, pantu bakekusiiwa.

7 Bali ni nsansa ni baalia bali ni nkumbu, pantu bakalangililua nkumbu.

8 Bali ni nsansa ni baalia baswetele ku mutima, pantu bakamumona Leeza.

9 Bali ni nsansa ni baalia bali bakita mutende, pantu bakakuutua baana bena Leeza.

10 Bali ni nsansa ni baalia bali mukutesua juu ya kukita bintu biweme pa menso akue Leeza, pantu Bukolo bwa ku muulu ni bwabo.

11 Bali ni nsansa ni mwemue musita bantu lubamituka, kumitesa ni kumibepela bamilandila kila kintu kibipile juu yane. 12 Sansamuke ni kusekelela sana, pantu malipo enu ni akata ku muulu. Evio i vibaateselue ni ba nabi* baamitangiliile.

13 Mwemue muli mukele wa kyalo, inzi kine mukele wasuuka, eba, kunti wasonsiiwa syani? Ozo mukele teukibombiiwa kabili, waaluka sie wa kupozua panze ni kuniantuapo na bantu.

14 Mwemue muli mwangaza wa kyalo. Kine muzi ukuulilue pa muulu lupili, teuvinda kufyama. 15 Te kuli muntu ali waleemia katendeele ni kutupikilapo kipanda;* inzi, ali wakateeka pa muulu evi bantu bonse bali mu nsesi baye basanikiilue. 16 Kansi, lekelele mwangaza wenu ubasanikile bantu, evi bamone bikitua byenu biweme ni kumukindika Baba wenu olia ali ku muulu.

17 Tekumone nangue naaizile kwinoona sheria yakue Musa ao ba Nabi.* Nsyaaizile kwinoona, inzi naaizile kufikilizia. 18 Kakiine namilanda nangue, ata sie kine muulu ni kyalo kunti byapita, te kuli ata ka erufi kamo kanini sana ao ka kisiko kamo ka ku erufi kakaba kufumiiwa mu Sheria mpaka bebi bintu byonse bikabe kukitika. 19 Pa kako, muntu olia watyona limopo pakati ka aza malaizio anini sana ni kubasambilizia bange bakite evio vyenka, wakakuutua munini sana mu Bukolo bwa ku muulu. Inzi, olia ali wakonka azo malaizio ni kubasambiliziako bange, wakakuutua mukulu mu Bukolo bwa ku muulu. 20 Kakiine namilanda nangue, kine te muli ba nsambu kupita ba kalemba ba sheria ni Bafarisayo, temukengila ata kanini mu Bukolo bwa ku muulu.

21 Mwaaunvwile nangue bantu ba pa kale baaninue evi: ‘Te upalile kwipaya, pantu muntu olia waipaya wakasaamba ku tribinali.’ 22 Inzi, namilanda nangue kila muntu olia ali watwalilila kumufiitilua lupua wakue, wakasaamba ku tribinali. Kabili, kila muntu olia ali wamulanda lupua wakue milandu ya matuka ya kukoosiiziana mukinzi, wakasaamba ku Tribinali Ikata; inzi olia ali wamulanda mwinakue nangue: ‘Uli kikilubi!’* wakapozua mu mulilo wa Gehena.*

23 Kine uli mukutwala bupe* bobe ku mazabau, kisia walanguluka nangue ukoseene ni muntu fulani,* 24 sia bupe bobe ntanzi ya mazabau ni kubwelamo. Endo waye ukitenke mutende pamo ni ozo muntu, mane ubwele wize ufumie bupe bobe.

25 Leenga unvuane ni muntu waakikusitaka mwakili mu nzila ntanzi temunafike ku tribinali. Evi olia waakikusitaka te kunti akutwale kuli zuzi, zuzi ni wene te kunti akutwale kuli mulinzi wa prizo, ni mulinzi te kunti akupoze mu prizo. 26 Kakiine, nakwana nangue teukaba kufuma momo kine teunalipe lufalanga lunini lwa kingolongolo* lwa kupeleezia.

27 Mwaaunvwile nangue bantu ba pa kale baaninue evi: ‘Te upalile kukita bukende.’ 28 Inzi, nene namyana nangue kila muntu olia ali watwalilila kumukenta mwanakazi asili mukazi wakue mpaka wafikiila kwaluka ni amu ya kulaala nakue, wakita kale nakue bukende mu mutima wakue. 29 Kine linso lyobe lya kulio lyakulengia wiputale, litumbule ni kulipoza kule. Pantu kili bwino sana kuli wewe uzezie kiizo kimo kya ku mubili obe, kuliko kupozua walingi mu Gehena. 30 Kabili, kine kuboko kobe kwa kulio kwakulengia uluvie, kuputule ni kukupoza kule. Pantu, kili bwino sana kuli wewe uzezie kiizo kimo kya ku mubili obe, kuliko kupozua walingi mu Gehena.

31 Mwaaunvwile yalandua nangue: ‘Kine muntu wamukaana mukazi wakue, apalile kumupeela mukanda witabiziiziwe na sheria ulangiliile nangue wamukaana.’ 32 Inzi, nene namyana nangue kila muntu olia wamukaana mukazi wakue asikitile kilubo kya bukambue,* wamubiika mu bwezio bwa kukita bukende. Kabili, kila mwalalume olia ali kumuupa ozo mwanakazi, ni wene wakita bukende.

33 Kabili, mwaaunvwile nangue bantu ba pa kale baaninue evi: ‘Te upalile kulapa bila kufikilizia, inzi, upalile kufikilizia bilapo byobe kuli Yehova.’ 34 Inzi, nene namyana nangue tekulape ata kanini mwalanda nangue ka lyulu, pantu muulu i kitebe kya Bukolo kyakue Leeza; 35 ao nangue ka kyalo, pantu kyalo i fwasi ya kutikapo makasa akue. Ao sie nangue ka Yerusalemu, pantu i muzi wakue Likolo mukulu. 36 Tekulape mitue yenu, pantu temuvinda kwalulula musisi umo waluke wasue ao wafi. 37 Lekele sie ‘Een’ yenu iye yali een, ni ‘Ata’ yenu iye yali ata, pantu milandu yasonsekuapo pa ezio, ifumine kuli mubifi.

38 Mwaaunvwile yalandua nangue: ‘Linso kwa linso ni liino kwa liino.’ 39 Inzi, nene namyana nangue, tekuye mwaluana ni mubifi. Inzi, kine muntu wakuuma lupi ku litama lya kulio, pilibuka akuume ni ku leli linge. 40 Kabili, kine muntu atonene kukutwala ku tribinali evi aye akupoke ngubo yobe ya mukati, mulekelele atwame ni ngubo yobe ya panze. 41 Kabili, kine muntu wakupatikizia ukite kilometre imo wamutwamiine kifunda, kita nakue kilometre ibili. 42 Olia wakulomba, mupeele. Kabili, olia watona umukopesie,* te kumukaanina.

43 Mwaaunvwile yalandua nangue: ‘Upalile kumutona mwikazi nobe ni kumusuula mulwani obe.’ 44 Inzi, nene namyana nangue: Twalilile kubatona balwani benu ni kubapepela baalia bali bamitesa 45 evi mukabe kulangilila nangue muli bena Baba wenu wa ku muulu. Pantu wene ali wasanikila koba kakue ku bantu babipile ni baweme. Kabili, ali wabanokiizia nvula bantu baalia bali bakita bintu biweme ni baalia bali bakita bintu bibipile. 46 Ale mwakaba kupatapo ki kine mwatona sie baalia bamitonene? Ale baalia bali basonkia bitansi,* ni bene te bezi kukita evio vyenka abe? 47 Kabili, kine mwapozia sie benenu, mwakitapo kintu ki kya kupapia? Bantu basili Baisraeli, eba, ni bene te bezi kukita evio vyenka abe? 48 Kansi, mupalile kuya mwapwililikile* nga evelia Baba wenu wa ku muulu vyapwililikile.