Mukanda ku Baefeso
5 Pa kako, mupale Leeza mwali baana bakue batonua, 2 kabili twalilile kwenda mu ntono nga evelia Kristu ni wene vyaatutonene* ni kwipeela juu yetu* wali bupe ni zabiu ya bunu buweme sana kuli Leeza.
3 Nga evelia vikipalile kuya kyali palua bantu batakatifu, bukambue* ni aina yonse ya buchafu ao pupa, te bipalile ata sie kuzimbulua pakati kenu; 4 ao sie lwendo lwa busoni ao bulanzi bwa bupuba ao sie miza ibipile, pantu bebio bintu te bipalile. Inzi, kupusana ni kekio, muye mwamutasia Leeza. 5 Pantu mumanine, kabili mwinikile nangue te kuli muntu ata umo wa bukambue* ao afiitile ao wa pupa, olia ali nga muntu ali wapupa mikisi, wakaba kupyana Bukolo bwakue Kristu, kabili Bwakue Leeza.
6 Tekulekelele muntu ata umo amizezie na milandu isili na mana, pantu juu ya bintu bya evio, kipuki kikata kyakue Leeza kili mukwiza pa baana basizi kunakila. 7 Pa kako, tekuye mwakita nga vibali bakita bene; 8 pantu mwemue mubanga mwalinke kafinzi, inzi lonu muli mwangaza juu ya buumo pamo ni Mulopue. Twalilile kwenda nga baana ba mwangaza, 9 pantu litunda lya mwangaza libiikile mukati aina yonse ya mutima uweme,* kooloka ni kisinka. 10 Twalilile kusininkizia bintu bitabiilue na Mulopue; 11 kabili lekele kukitako bikitua bisizi kuvyala matunda belia bikwateene ni kafinzi; kuliko kukita evio, fiikule vili bebio bikitua. 12 Pantu bintu bibali bakita bafyaminiine, ni bya nsoni ata sie kubizimbula. 13 Lonu, bintu byonse belia bifiikwilue* bilangiliilue bwino kupitila mwangaza, pantu kila kintu kelia kilangiliilue bwino, kyene ni mwangaza. 14 Pa kako, Malembo alandile evi: “Kenta, we onene, kabili buuka kufuma ku bafwile, ni Kristu ali kukusanikila.”
15 Pa kako, twalilile kwilabukila sana evi lwendo lwenu te kunti luye lwali nga lwa bantu basili na mulangue, inzi luye lwali nga lwa bantu ba mulangue, 16 ni koku mwabombia bwino sana musita wenu,* pantu enu nsiku izuzimo bubifi. 17 Pa kako, lekele kuya mwali bantu basili na mano, inzi twalilile kwinika bintu bitonene Yehova.* 18 Kabili, tekuye mwakolua divai elia ili yalengia bantu baye bakita bintu bibipile sana,* inzi twalilile kwizuziiwa mupasi. 19 Muye mwalanziana* kupitila malumbo, kumutasia Leeza, ni nghimbo ya kimupasi ni koku mwaimba nga mwemue bali mukulizia muziki mu mitima yenu pa lwakue Yehova,* 20 lyonse muye mwamutasia Leeza, Baba wetu, palua bintu byonse mu liina lyakue Mulopue wetu Yesu Kristu.
21 Kila umo wenu aye waikoosia ntanzi ya mwinakue juu ya kumutiina Kristu. 22 Bakazi baye baikoosia ku balume babo nga evelia bali mukwikoosia kuli Mulopue, 23 pantu mulume i mutue wakue mukazi nga evelia sie Kristu vyali mutue wa kilonghaano, mupususi wa ozu mubili. 24 Kakiine, nga evelia kilonghaano vikiikoosiizie kuli Kristu, bakazi ni bene bapalile kwikoosia ku balume babo mu kila kantu. 25 Mwe balume, twalilile kubatona bakazi benu nga evelia Kristu vyaatonene kilonghaano ni kwipeela mwine palua kekio kilonghaano. 26 Wene waakitile evio evi kukiswesia kupitila kukisamba na mulandu wakue Leeza nga evelia ali mukukisamba na menda, 27 evi kiye kyafwaniine pa menso akue, bila kyali na litaka ao mifwambo ao sie kintu kipaleene ni bebio, inzi kiye kyali kitakatifu, kabili bila kilubo.
28 Mu enka ezio nzila, balume bapalile kubatona bakazi babo nga evelia mibili yabo bene. Mulume olia atonene mukazi wakue, etonene ye mwine, 29 pantu te kuli muntu ausuulile mubili wakue, inzi ali wauliisia ni kuusunga kwa ntono nga evelia Kristu vyali wakita palua kilonghaano, 30 pantu fwefue tuli biungo bya mubili wakue. 31 “Pa kako, mwalalume wakamusia baba wakue ni mama wakue ni wene wakalamatilila ku* mukazi wakue ni babo babili bakaaluka mubili umo.” 32 Ezi siri itakatifu ni ikata. Lonu, ndi mukulanda pa lwakue Kristu ni kilonghaano. 33 Inzi, kila umo wenu apalile kumutona mukazi wakue nga evelia vyali waikala waitonene mwine; ku lubali lunge, mukazi apalile kumukindika sana mulume wakue.