Yaandikilue na Mateo

24 Yesu lwaali wafuma mu ekalu, basambi bakue baamupaleeme evi bamulangilile bikuulua bya ekalu. 2 Yesu waabalandile evi: “Mwamona bebi bintu byonse? Kakiine, namyana nangue te kuli libue ata limo lyakasyala lyali pa muulu libue linge ni bila kuponiiziwa pansi.”

3 Lwabanga waikeele ku Lupili lwa Mizeituni, basambi bakue baamupaleeme kwa bunke ni kumwipuzia evi: “Tubwileko, ati, bebi bintu byakakitika musita ki, kabili ni kiki kyakalangilila kubapo kobe ni mpela ya kenu kyalo?”*

4 Yesu waabaasukile evi: “Mwakengeele evi te kunti muntu ata umo amizezie, 5 pantu bantu bengi bakeza babombia liina lyane balanda evi: ‘Nene ndi Kristu,’ kabili bakabazezia bantu bengi. 6 Mwakonvua palua vita ni mpunda ya vita. Inzi, tekututume pantu bebi bintu bipalile kukitika, inzi mpela yene bado sie.

7 Pantu bantu bakaluana ni bantu bange ni kyalo kyakaluana ni kyalo kinge, kabili kwakaba kwali kimina kya nzala ni ntensi mu ma fwasi apusene-puseene. 8 Bebio bintu byonse i ntendeko ya nsita yaviizie.*

9 Kisia, bantu bakamitesa ni kumipaya, ni bantu ba mu ntundu yonse bakamisuula juu ya liina lyane. 10 Bengi bakakwazika ni kubiikana mu minue ya balwani, kabili bakasuulana. 11 Ba nabi* bengi ba bufi bakeza ni kubazezia bantu bengi; 12 kabili pantu bubifi* bwakakila, ntono ya bantu bengi yakaaluka inini. 13 Inzi, olia wakasipikizia mpaka ku mpela i wakapusuka. 14 Ni ezi mpunda iweme ya Bukolo yakasimikilua mu kyalo kyonse kikeluepo na bantu evi bantu ba aina yonse bakonvue, i kusyali mpela ikeze.

15 Kukila pa kako, lumwakamona kintu kisuulilue kili kyaleta bwinooni kyaimeene patakatifu nga vyaalandile nabi* Danieli (emue, olia ali wasoma abombie buvinde bwa kwinika), 16 baalia bali ku Yudea babambe kubutukila ku mpili. 17 Muntu olia ali pa muulu nsesi, te kunti akooke mwinsina evi atwame bintu mu nsesi yakue, 18 ni muntu olia ali ku bukaba, te kunti abwele ku nsesi ku kutwama maubo akue. 19 Bulanda ku mwanakazi wa mimba ni ku baalia bakaba baonsia baana mu bolia busiku! 20 Twalilile kupepa evi te kunti mukabutuke mu kipindi kya kasama ao mu busiku bwa Sabata; 21 pantu, kwakaba kwali lyemo likata lisinakitikepo ntangia kubumbua kwa bantu mpaka lonu, bila, wala telikakitikapo kabili. 22 Kulanda kisinka, kabenge ezio nsiku te yaakeefiiziwe, nga te kuli muntu wakapusuka; inzi juu ya baalia basaakwilue, ezio nsiku yakakeefiiwa.

23 Kine muntu wamilanda nangue, ‘Mone! Kristu ali panu,’ ao ‘Ali palia,’ tekuzumine. 24 Pantu, ba Kristu ni ba nabi* ba bufi bakeza, kabili bakakita tulangi tukata ni bintu bya kupapia juu ya kuzezia bantu, pange ata sie baalia basaakwilue. 25 Mone! Namipasiizia mbela. 26 Kukila pa kako, kine bantu bamilanda nangue, ‘Mone! Ali mu kaseeba,’ tekuyeko; ‘Mone ali mu biyumba bya mukati,’ tekuzumine. 27 Pantu nga evelia sie myangaza ya koba viili yafuma kutula koba yasanikila mpaka kuzika koba, i vyakaba ni kubapo kwa Mwana mwina muntu. 28 Palia ponse pali kintu kifwile, i pali pakolonghana ba nzwiba.

29 Kisia sie lyemo lya mu ezio nsiku, koba kakaaluka kafinzi, ni mwezi teukafumia mwangaza wakue, ni ntanda yakapona kufuma mu muulu, ni maka a muulu akatensiiwa. 30 Kisia alama ya Mwana mwina muntu yakamoneka mu muulu, ni bantu* bonse ba pa kyalo bakalila,* kabili bakamumona Mwana mwina muntu wali mukwiza mu malezi a mu muulu wali ni maka ni bulumba bukata. 31 Kabili tarumbeta luyakalila na lizui likata, wakabatuma ba malaika bakue, kisia bakabakolonghania bantu bakue basaakwilue kufuma mu tutunfi tuna twa kyalo, kutendekela ku mpela imo ya muulu mpaka ku mpela inge.

32 Ale sambilileko ku ozu mufuano wa kimuti kya miku. Musita sie lukili kyaalukako misambo iteku ni kutombako mani, muli mwainika nangue mainza apalama. 33 Enka evio, ni mwemue lumwakamona bebi bintu byonse, mane nangue ali pepi, een, emeene ku milyango. 34 Kakiine, namyana nangue keki kizazi tekikapita* ata kanini, mpakanke bebi bintu byonse bikakitike. 35 Muulu ni kyalo byakapita, inzi milandu yane teikapita ata kanini.

36 Palua bolia busiku ni nsa, te kuli ata muntu amanine, ata sie ba malaika ba mu muulu ao Mwana, inzi inga sie Baba. 37 Pantu nga evelia sie vikyaali mu nsiku yakue Noa, ni kubapo kwa Mwana mwina muntu i vikwakaba. 38 Nga vyaali bantu mu ezio nsiku, ntanzi Kibunda tekinaize, baali balia ni kumina, balalume baali baupa ni banakazi baali baupua, mpaka bolia busiku bwaaingiile Noa mu safina, 39 kabili te baapozeleko mano mpaka Kibunda lukyaaizile ni kubenoona bonse, ni kubapo kwa Mwana mwina muntu i vikwakaba. 40 Kisia, balalume babili bakaba bali mu bukaba; umo wakatwamua ni unge wakasiiwa. 41 Banakazi babili bakaba bapela pa libue lya kupelelapo na minue; umo wakatwamua ni unge wakasiiwa. 42 Kansi, twalilile kuya mwakentele, pantu te mumanine kine Mulopue wenu wakeza busiku ki.

43 Mwine nsesi amanenge nsa yaaiziilepo* kabooko, waasiile kukesia kabili taasiile kumulekelela kabooko atuute nsesi yakue. 44 Pa kako, ni mwemue muye mwaiteaniizie, pantu Mwana mwina muntu wakeeza pa busiku bolia bumusiswapiile.

45 Kakiine, nani muzia wa kisinka ni wa mano* olia waabiikilue na mukulu wakue evi emanine bantu ba mu nsesi yakue ni kubapeela kyakulia kyabo pa musita upalile? 46 Ali ni nsansa ni ozo muzia kine mukulu wakue waiza kumusanga wali mukukita evio! 47 Kakiine namyana nangue wakamubiika evi akabe wamusungila bintu byakue byonse.

48 Inzi, kine ozo muzia abipile walanda evi mu mutima wakue: ‘Mukulu wane wakokola,’ 49 ni kutendeka kuuma bazia nakue, kulia ni kumina pamo ni balevi bene-beene, 50 mu busiku bolia busiswapiile ozo muzia kabili pa nsa elia yasimanine, i yakeezilapo mukulu wakue, 51 kabili wakamukanda sana ni kumubiika pa fwasi imo ni banafiki. Koko, i kwakalila ni kusyenkania meno akue.