Mukanda ku Bakolosai
3 Inzi, kine mwaafufwilue pamo ni Kristu, twalilile kukeba bintu bya ku muulu, kolia kwikeele Kristu ku kuboko kwa kulio kwakue Leeza. 2 Twalilile kupoza mano enu ku bintu bya ku muulu, apana ku bintu bya pa kyalo. 3 Mwaafwile, kabili bukose bwenu bwaafiikilue pamo ni Kristu olia ali mu buumo ni Leeza. 4 Musita Kristu, bukose bwetu, lwakaba kumoneka, ni mwemue kumo mwakaba kumoneka pamo nakue mu bulumba.
5 Pa kako, ipaye biungo byenu bya mubili belia bili pa kyalo palua bukambue,* buchafu, tama ikata ya kulaalana isizi kwanziiwa, tama ili yakisia ni pupa. Pupa yene ni imonke sie ni kupupa mikisi. 6 Juu ya bebio bintu, kipuki kikata kyakue Leeza kili mukwiza. 7 Lolo i lwendo lumubanga mwali nalo ni mwemue mu bwikazi bwenu bwa kale.* 8 Inzi lonu, mupalile kupozela kule bebi bintu byonse: Kipuki kikata, kufipua, bubifi, bulanzi bwa matuka, ni bulanzi bufiitile kufuma mu kanua kenu. 9 Tekuye mwabepana. Vuule bumuntu bwa* kale pamo ni bikitua byakue, 10 ni kuvwala bumuntu bwa lenu. Kupitila kumana kusili na kilubo, bobo bumuntu buli mukwalulua bwa lenu kukonkana ni mufuano wakue Leeza olia waabukitile. 11 Palua bumuntu bwa lenu, muntu kuya wali Mugiriki ao Muyuda ao muntu atairiiwe ao muntu asitairiiwe ao mweni ao Musikite* ao muzia ao sie kuya wali muntu ali uru, te kantu; inzi Kristu i bintu byonse, kabili mu bonse.
12 Pa kako, pantu mwaasaakwilue na Leeza, mwali batakatifu, kabili batonua, vwale ntono ikata ili ni nkumbu, kuwamiziana, kwikeefia,* bufuuke ni kupembelela. 13 Twalilile kusipikiziana ni kweleelana mu kwitonena ata sie kine umo ali ni nsambu ya kwitendooka palua mwinakue. Nga evelia sie Yehova* vyaamyeleele mu kwitonena, ni mwemue mupalile kukita enka evio. 14 Inzi, kukila pa bebio bintu byonse, vwale ntono pantu yene i kifundo kipwililikile kya buumo.
15 Kabili, lekele mutende wakue Kristu uteeke mu* mitima yenu, pantu mwaakuutilue ku ozo mutende mwali biungo bya mubili umo. Kukila pa kako, langilile mibele ya kusantila. 16 Lekele mulandu wakue Kristu wikale kakiine muli mwemue, kabili umyalule kuya mwali ni mulangue. Twalilile kusambiliziana ni kukoseleziana* kupitila malumbo, kumutasia Leeza, ni nghimbo ya kimupasi ni ya kutasia, ni koku mwamwimbila Yehova* mu mitima yenu. 17 Kintu kyonse kimuli mwakita ao kulanda, kikite mu liina lyakue Mulopue Yesu ni koku mwamusantila Leeza Baba kupitila wene.
18 Mwe bakazi, muye mwaikoosiizie ku balume benu nga evelia vikipalile muli Mulopue. 19 Mwe balume, twalilile kutona bakazi benu, kabili tekuye mwabafipilua sana.* 20 Mwe baana, muye mwabanakila bavyazi benu mu kila kantu, pantu kukita evio kuli kwamusansamusia Mulopue. 21 Mwe ba baba, tekuye mwabasokozia baana benu* evi te kunti batyoke mutima. 22 Mwe bazia, muye mwabanakila mu kila kantu bantu bamuli mwabombela,* apana sie musita ubamimwene juu ya kusansamusia sie bantu,* inzi muye mwakita evio mu kisinka kufuma ku mitima, juu ya kumutiina Yehova.* 23 Kyonse kimuli mukukita, muye mwakikita kwa mweo* onse nga mwemue bali mukukikita pa lwakue Yehova,* apana palua bantu, 24 pantu mumanine nangue Yehova* i wakamipeela kilambu* kyenu.* Bombele Mulopue wa kisinka, Kristu. 25 Kakiine, olia ali wakita bibipile, wakalipua palua bintu bibipile byali wakita. Leeza wakabapingula bantu bila kulangilila kapatulula ku muntu ata umo.