Mukanda wa Bubili ku Bakorinto
9 Lonu, palua kubomba miilo ya kukwasia batakatifu, nsili na lazima ya kumyandikila, 2 pantu manine nangue mwiteaniizie kukwasia. Ndi mukwitanka pa lwenu ku Bakristu bali ku Makedonia. Naakibabwila nangue mu mwaka walingi, mwemue bali mu Akaya mwakiba mwaiteaniizie kukwasia; kabili mute wenu waakibasonsezia bengi pakati kabo. 3 Inzi, nabatuma babo ba lupua evi kwitanka kwetu palua mutima wenu wa kukwasia te kunti kumoneke kwali kwa bule, kabili mupalile kuya mwaiteaniizie kakiine nga evelia sie vinaalandile. 4 Kupusana ni kekio, kine naiza pamo ni ba lupua ba ku Makedonia ni kumisanga bila mwaiteaniizie, fwefue—ni mwemue kumo—tuli kunvua busoni pantu tumiswapiile. 5 Pa kako, naakimona kuya kyali kya mana kubasonsezia ba lupua batangile ni kuteaniizia mbela bupe bwenu bwa kwitonena bumwaalaile, evi lutwakafika, bobo bupe bukabe bwateaniiziwe. Kekio kyakalangilila nangue te mwaakifumia bobo bupe juu ya kupatikiziiwa, inzi mwaakifumia mu kwitonena.
6 Palua kako, olia ali wabyala tunini wakazombola tunini, ni olia ali wabyala bingi wakazombola bingi. 7 Kila muntu akite nga evelia vyaakipingula mu mutima wakue, te kunti akite evio bila watonene ao juu ya kupatikiziiwa, pantu Leeza ali watona muntu olia ali wafumia wali ni nsansa.
8 Kukila pa kako, Leeza ali ni buvinde bwa kulengia buwame bwakue bonse* buvule pali mwemue evi lyonse muye mwarizikile kakiine mu kila kintu, kabili muye mwali ni bintu byonse bimuli nabio lazima evi kufikilizia kila miilo iweme. 9 (Nga evelia vikyandikilue nangue: “Wene waakikasania mu kwitonena, kabili waakibapeela bapabi. Kooloka kwakue kutwaliliile lonse.” 10 Leeza olia ali wamupeela mbezu ingi muntu wa kubyala ni kumupeela mukate wa kulia, wakaba kumipeela ni kuvuzia mbezu ya kubyala, kabili wakamilengia mukazombole bintu bingi biweme bili byafuma mu miilo yenu yolokele.) 11 Leeza amipaalile mu kila kintu evi muye mwapeelana mu kwitonena mu kila nzila, ni bobo buwame buli bwalengia Leeza atasiiwe kupitila fwefue; 12 pantu ezio miilo ya bantu bonse imuli mukubomba, te ya kukwasia sie batakatifu mu bintu bibali nabio lazima, inzi kabili ni ya kusonsezia bengi bamutasie Leeza. 13 Kupitila busininkizio bwa ezio miilo ya kukwasia, bene bali mukumutasia* Leeza pantu muli mukunakila mpunda iweme pa lwakue Kristu nga evelia vimwaapundile ntanzi ya bantu bonse, kabili pantu mwaakilongia mu kwitonena juu ya batakatifu ni juu ya bantu bonse. 14 Kukila pa kako, kupitila kumuliliila Leeza pa lwenu, bene bali mukulangilila nangue bamitonene juu ya buwame* bwibeleele bumuli mukulangililua na Leeza.
15 Leeza atasiiwe palua bupe bwakue bwa kwa bule busivinda kulondololua.