Mukanda wa Kwanza ku Bakorinto
9 Eba, nene nsili uru kukita kelia kinatona? Eba, nsili mutumua? Eba, nene nsyaamumwene Yesu Mulopue wetu? Eba, mwemue te muli miilo yane muli Mulopue? 2 Ata sie kine nsimwenue na bange kuya nali mutumua, mwemue mumwene kakiine nangue nene ndi mutumua! Mwemue muli kashe isininkiziizie nangue nene ndi mutumua wakue Mulopue.
3 Ku baalia bali bampingula, nene naisakila evi: 4 Tuli ni nsambu ya* kulia ni kumina, eba te evio? 5 Eba, te tuli na nsambu ya kuupa mukazi azumiine ni kuya nakue mu bulendo nga vili vyakita batumua bange ni ba lupua bakue Mulopue pamo ni Kefa?* 6 Eba, nene sie ni Barnaba i bapalile kubomba juu ya kwikwasia mu bwikazi? 7 Eba, ni soda ki ali wailipila ma depanse akue mwine? Nani ali walima bukaba bwa mizabibu kisia bila kuliako matunda akue? Eba, ni musungi ki asizi kuminako mabele a nama elia yali wateeka?
8 Eba, ndi mukulanda bebio bintu kukonkana ni mawazo a bumuntu? Eba, Sheria ni yene te ilandile bebio bintu? 9 Pantu kyandikilue evi mu Sheria Yakue Musa: “Te upalile kukaka kanua ka nghombe ndume* musita lwali mukupuula mbezu.” Eba, Leeza ali waemena sie nghombe* ndume? 10 Ao, eba waalandile evio juu yetu? Kakiine yaandikilue juu yetu. Muntu olia ali walima bukaba ni olia ali wapuula mbezu bonse bapalile kuswapila kupata mu belia bili byafuma mu kuzombola.
11 Kine twaabyele mpunda yakue Leeza* pakati kenu, eba kibipile kuli fwefue kupata kuli mwemue bintu bya kimubili bya kutukwasia? 12 Kine bantu bange bali ni nsambu ya kupata bintu bya kimubili kuli mwemue, eba fwefue te tukililepo kuya twali ni ezio nsambu? Ata sie kine kili evio, fwefue te twaakibombia ezio nsambu.* Inzi, tuli mukusipikizia bintu byonse evi te kunti twanzie muntu onse kuzumina mpunda iweme pa lwakue Kristu. 13 Eba, te mumanine nangue baalia bali babomba miilo itakatifu bali balia bintu bya mu ekalu, kabili nangue baalia bali babombela lingi ku mazabau bali bapata semu kufuma pa mazabau? 14 Mu enka ezio nzila, Mulopue waalaiziizie nangue baalia bali basimikila mpunda iweme, bapalile kulisiiwa* kupitila mpunda iweme.
15 Inzi, pakati ka ezio mipango nsyaabombiiziepo ata umo. Kabili nsili mukwandika bebio bintu juu ya kunti nkitilue evio, pantu kunti kyawama kufua kuliko . . . Nsikaba kulekelela ata kanini muntu ata umo akabe kutwama nsambu yane ya kwitanka. 16 Kine lonu ndi mukusimikila mpunda iweme, nsili na nsambu ya kwitanka palua kako, pantu mpatikiziiziwe kukita evio. Lisyamo pali nene, kine nsili mukusimikila mpunda iweme! 17 Kine nakita evio mu kwitonena, ndi ni kilambu.* Inzi, ata sie kine nakita evio kupusana ni kutona kwane, nkili sie ni miilo ikata* impeelue. 18 Ale kilambu* kyane ni kiki? Kusimikila mpunda iweme mu kwitonena, kabili kwa bule, evi kutiina kwinoona nsambu yane ya kuya nali kasimika wa mpunda iweme.
19 Ata sie kine ndi uru, naakiialula muzia ku bantu bonse evi mpate bantu bengi kukilapo. 20 Ku Bayuda naalukile nga Muyuda evi mbapate Bayuda; ku baalia bali pensina sheria naalukile nga nene ali pensina sheria evi mbapate baalia bali pensina sheria, ata sie kine ne mwine nsili pensina sheria. 21 Ku baalia basili na sheria, naalukile nga nene asili na sheria. Ndi nakita evio ata sie kine kakiine nkonkele sheria yakue Leeza, kabili ata sie kine ntungulwilue na sheria yakue Kristu. 22 Ku batope, naalukile mutope, evi mbapate batope. Naakyaluka bintu byonse ku bantu ba kila namuna evi nvinde kupususiako bamo mu kila nzila elia ili kuvindikana. 23 Inzi, ndi nakita bintu byonse juu ya mpunda iweme evi mbabwileko bange ezio mpunda.
24 Eba, te mumanine nangue baalia bali bakunduka mu masindano a mbilo bonse bali bakunduka, inzi umo sie i ali wapata kilambu?* Kansi, kunduke mu namuna ya kumikwasia kupata kilambu.* 25 Baalia bonse bali basangua mu masindano, bali balangilila mibele ya kwizuia mu bintu byonse. Bali bakita evio evi bapate kisote kya bulumba kelia kili kyainooneka.* Inzi, fwefue tuli twakita evio evi kupata kisote kya bulumba kelia kisikenoonekapo* ata limo. 26 Pa kako, nsizi kukunduka sie kikunduke-kunduke, ndi natandika ma ngumi ane evi te kunti ngiye nauma mwela. 27 Ndi nauma-uma* mubili wane ni kuutungulula nga muzia, evi te kunti nkakaanue* mu nzila imo kisia kusimikila bange.