Yaandikilue na Mateo
15 Kisia, Bafarisayo ni ba kalemba ba sheria baafumine ku Yerusalemu ni kwiza kumumona Yesu, baamwipuziizie evi: 2 “Juu ya ki basambi bobe bali batyona masambilizio a ba bikolue betu? Kwa mufuano, te bezi kusamba* minue yabo pa kulia kyakulia.”
3 Waabaasukile evi: “Juu ya ki mwemue muli mwatyona malaizio akue Leeza, juu ya masambilizio a ba bikolue benu? 4 Kwa mufuano, Leeza waalandile evi: ‘Mukindike baba obe ni mama obe,’ kabili ‘Olia wamutuka* baba wakue ao mama wakue, apalile kwipaiwa.’ 5 Inzi mwemue muli mwalanda evi: ‘Olia wamulanda evi baba wakue ao mama wakue: “Kila kintu kindi nakio kelia kili kuvinda kukukwasia, naakilaya kale kumupeela Leeza,” 6 tapalile ata kanini kumukindika baba wakue.’ Pa kako, mwemue mwaakilengia mulandu wakue Leeza te kunti uye wali wa mana juu ya masambilizio a ba bikolue benu. 7 Mwe banafiki, Isaya waali ni nsambu ya kulanda evi ntanzi pa lwenu: 8 ‘Baaba bantu bali bankindika sie pa milomo yabo, inzi mitima yabo ili kule ni nene. 9 Bali mukutwalilila kumpupa kya mpuni, pantu masambilizio abo ni malaizio sie a bantu.’” 10 Kisia, waabakuutile bantu bengi bamupalame ni kubalanda evi: “Twilizie ni kunvua mana ya bebi bintu: 11 Muntu tezi kufisiiwa na kelia kili kyaingila mu kanua kakue, inzi ali wafisiiwa na kelia kili kyafuma mu kanua kakue.”
12 Kisia, basambi bakue baaizile ni kumulanda evi: “Eba, umanine nangue Bafarisayo bakwazikanga lubaunvwanga belia biwalandanga?” 13 Waabaasukile evi: “Kila kimuti kelia kisyaabyelue na Baba wane wa ku muulu, kyakazyulua. 14 Babo bantu, baleke sie. Bene ni ba ntunguluzi ba mpofu. Kine mpofu wamutungulula mpofu nakue, bonse babili bali kuponena mu kiina.” 15 Petro waamulandile evi: “Tubwile mana ya olia mufuano.” 16 Yesu waabepuziizie evi: “Eba, ni mwemue temunaunvue mana? 17 Eba, te mumanine nangue kila kintu kili kyaingila mu kanua, kili kyapita munda, kisia kyafuma ni kwingila mu kabine? 18 Inzi, kila kintu kili kyafuma mu kanua, kili kyafuma ku mutima; ni bebio bintu i bili byafiisia muntu. 19 Kwa mufuano, ku mutima i kuli kwafuma mawazo abipile a bungipaani, bukende, bukambue,* bukabooko, kumubepela muntu, ni matuka. 20 Bebi i bintu bili byafiisia muntu. Inzi, kulia kyakulia bila kusamba* minue tekwizi kufiisia muntu.”
21 Kisia, Yesu waafumine papo ni kuya mu kazonga ka Tiro ni Sidoni. 22 Mona! mwanakazi umo wa ku Foinike olia abanga waikeele mu kako kazonga, waaizile wali mukulila walanda evi: “Ngunvwileko nkumbu, we Mulopue, Mwana mwina Daudi. Mwana wane mwanakazi ali mukwemiiwa sana na mupasi ubipile.” 23 Inzi, Yesu taamwasukile. Pa kako, basambi bakue baaizile ni kumulanda evi: “Mulande ayewaye, pantu atwaliliile kutukonka watuteekeele nsungu na kulila.” 24 Waasukile evi: “Leeza taantumine ku bantu bonse, inzi waantumine sie ku mukooko uzezele wa mu nsesi ya Israeli.” 25 Inzi, ozo mwanakazi waaizile ni kumufukamina* walanda evi: “We Mulopue, nkwasie!” 26 Yesu waamwasukile evi: “Te kili bwino kubuula mukate wa baana ni kupozela tubua twana.” 27 Ozo mwanakazi waalandile evi: “Walanda sie bwino we Mulopue. Inzi, kakiine toto tubua twana tuli twalia mavunga ali aponena munsina meza ya ba selenzi babo.” 28 Ku mwisio Yesu waamulandile evi: “We mwanakazi, uli ni kiketekelo kikata; kansi kikitike kuli wewe nga muutoneene.” Penka papo, mwana wakue mwanakazi waakosele.
29 Yesu waafumine papo ni kuya pepi ni Lyezi lya Galilaya, waapilukile ku lupili ni kwikala koko. 30 Kisia, bantu bengi sana baamupaleeme ni kumuletela bantu babanga bali ba bilema, ba bipumputu, ba mpofu, ba kameme, ni balwele bange bengi. Kabili, baaile kubateeka ku maulu akue ni wene waabakosiizie. 31 Pa kako, bantu bengi baasyele sie baapapile lubaamwene ba kameme babamba kulanda, ni ba bipumputu bakosiiwa, ba bilema baenda ni ba mpofu bamona. Kabili, baamutasiizie Leeza wa ba Israeli.
32 Inzi, Yesu waabakuutile basambi bakue ni kubalanda evi: “Baaba bantu bengi nabonvwila nkumbu, pantu bakita kale nsiku itatu baali pamo ni nene, kabili te bali ata na kantu kakulia. Nsitonene kubalekelela baye ni nzala,* pantu kunti bapenzuka mu nzila.” 33 Ata sie evio, basambi bakue baamulandile evi Yesu: “Ale panu pa kaseeba patuli tuli kupata pi mikate ingi ya kunti baaba bantu bengi bekute?” 34 Yesu waabalandile evi: “Eba, mulipo na mikate inga papo?” Basambi baamwasukile evi: “Mikate saba, ni tusabi tunini sie.” 35 Kisia kubalanda babo bantu bengi bekale pansi, 36 waabuulile elia mikate saba ni tusabi. Kabili, kisia kumutasia Leeza, waamokwele mikate ni kubapeela basambi, ni basambi baabapeele babo bantu bengi sana. 37 Bantu bonse baaliile ni kwikuta, kabili basambi baatolele bipande bya mikate byaasyeleko ni kwizuzia bipanda* saba bikata. 38 Baalia baaliile babanga bali balalume elufu ina (4 000), bila kupendako banakazi ni baanike. 39 Kisia kubalanda babo bantu bengi sana baye, waapilukile mu bwato ni kuya mu kazonga ka Magadani.