Mukanda ku Bafilipi
4 Mwe ba lupua bane batonua, mwe bantonene sana kumona, muli nsansa yane, kabili muli kisote kyane kya bulumba.* Mwe batonua bane, namisonsezia mwimane sinta muli Mulopue mu enka ezio nzila.
2 Namusonsezia Evodia, kabili namusonsezia Sintike, baye bali ni mano amonke muli Mulopue. 3 Kabili, nakulomba we mubombi nane wa kisinka, evi utwalilile kubakwasia babo banakazi, baalia baakikwinda kubomba* pamo ni nene palua mpunda iweme, pamo ni Klementi ni babombi nane bange, baalia bali ni meena mu kitabu kya bukose.
4 Lyonse, sansamuke muli Mulopue. Nalanda kabili nangue sansamuke! 5 Lekele bantu bonse baye bamona nangue te mwizi kukakatila mawazo enu.* Mulopue ali pepi. 6 Tekweme palua kintu ata kimo, inzi mu kila kintu, pepe kuli Leeza, mwamulilila ni kumusantila, lekele kupapaata kwenu kumanike kuli Leeza; 7 ni mutende wakue Leeza olia upitile kunvua konse wakaba kusunga mitima yenu ni mano enu* kupitila Kristu Yesu.
8 Kupwako, mwe ba lupua, twalilile kutontonkania* palua bintu bya kisinka, bintu bipalile kwemenua sana, bintu byolokele, bintu biswetele, bintu bitonekele, bintu bili byalandiluapo bwino, bintu biweme, ni palua bintu bipalile kutasiiwa. 9 Kite bintu bimwaasambiliile ni kwitabila, kabili bimwaaunvwile ni kumona kuli nene, ni Leeza wa mutende wakaba pamo ni mwemue.
10 Nasansamuka sana muli Mulopue pantu kupwako mwaakitendeka kabili kungemena. Ata sie kine mwakiba mwaema juu yane, te mwakiba mwapata fwasi ya kulangilila evio. 11 Nsilandile evio juu ya bintu bindi nabio lazima. Naakisambilila kurizika ne mwine ata sie kine ngiye nali mu aali ki. 12 Manine vya kwikala nali na bintu binini ni vya kwikala nali na bintu bingi. Mu kila kintu ni mu aali yonse, naakisambilila siri palua namuna ya kwikuta ni namuna ya kunvua nzala, vya kuya nali ni bintu bingi ni vya kupusua. 13 Palua bintu byonse, ndi ni maka kupitila olia ali wampeela maka.
14 Inzi, mwaakikita bwino pa kunkwasia mu maavia ane. 15 Kakiine mwe Bafilipi, mumanine kabili nangue musita unaafumine ku Makedonia, kisia mwemue kunvua mpunda iweme lya kwanza, te kuli kilonghaano kinge kyaankwasiizie, inga sie mwemue. 16 Musita umbanga nali ku Tesalonika, mwaantumiine bintu binaali nabio lazima, apana limo sie, inzi libili. 17 Apana nangue ndi mukukeba bupe, inzi ntonene sie mupate faida ili yafuma* mu kupeelana. 18 Inzi, nkwete kila kintu kindi nakio lazima, ni kukilapo. Kisia kupokelela bintu bimwaakintumina kupitila Epafrodito, bintu bindi nabio byaakiizula kakiine. Bupe bwenu buli nga bunu buweme, zabiu itabiilue elia ili yamusansamusia Leeza. 19 Ku lubali lunge, Leeza wane wakaba kumiizuziizia bintu byonse bimuli nabio lazima kukonkana ni bunonsi bwa bulumba bwakue kupitila Kristu Yesu. 20 Lonu, Leeza kabili Baba wetu aye wakindikua* lonse sie.* Amen.
21 Mupozie kila mutakatifu ali mu buumo ni Yesu. Ba lupua baalia bali pamo ni nene bamipozia. 22 Batakatifu bonse, asa baalia bali mu nsesi yakue Kaisari, bamipozia.
23 Buwame* bwakue Mulopue Yesu Kristu buye bwali pamo ni mupasi umuli mukulangilila.