Mukanda ku Bakolosai

2 Ntonene mumane vitanine lizibo lyane pa lwenu, palua baalia bali ku Laodikia, ni palua baalia bonse basinasaakaanepo ni nene.* 2 Kikata kintonene ni keki: Kukoselezia mitima yabo, ni kubakwatania bwino lwa pamo mu ntono evi baye bali ni bunonsi bonse buli bwafuma mu bukisinka, bolia buli bwaletua na buvinde bwa kisinka bwa kunvua, evi baaluke ni kumana kusili na kilubo kwa siri itakatifu pa lwakue Leeza. Ezio siri i Kristu. 3 Bunonsi bonse bwa mulangue pamo ni bwa kumana, bufiikilue bwino muli Kristu. 4 Ndi mukulanda evio evi te kunti muntu ata umo amizezie na milandu ya bukengezi. 5 Ata sie kine nsili pamo ni mwemue kimubili, ndi pamo ni mwemue kimupasi ni koku nali mukusekelela kumona bintu vibili mukukitika mu nzila ipangilue bwino ni kumona kiketekelo kyenu vikimeene sinta muli Kristu.

6 Pa kako, nga evelia sie vimwaakimwitabila Kristu Yesu Mulopue, twalilile kwenda mu buumo pamo nakue, 7 ni koku mwaziikile misila ni kukuulua muli wene pamo ni kwimana sinta mu kiketekelo nga evelia sie vimwaasambiliziiziwe, kabili lyonse mwamutasia Leeza.

8 Muye mwailabukiile evi muntu ata umo te kunti amikwate mu muteo* kupitila filozofia ni mawazo a bufi. Bebio bintu te bimaniine pali Kristu, inzi bimaniine pa desturi ya bantu ni pa bintu bya musinzi bya kyalo. 9 Muli Kristu i muli mwalangililua bwino mibele yakue Leeza. 10 Mwemue mwaakyalulua bantu bakumeene kupitila wene, olia ali pa muulu buteeko bonse ni buvinde bonse. 11 Kupitila wene, ni mwemue mwaatairiiwe, apana na minue, inzi kupitila kuvuula mubili wa nama mu kutairiwa kolia kupateene ni Kristu. 12 Pantu mwaaziikilue pamo nakue mu lubatizio lwakue, kabili pantu muli mu burafiki pamo nakue, mwemue mwaafufwilue pamo nakue kupitila kiketekelo kyenu mu maka akue Leeza, olia waamufufwile kufuma ku bafwile.

13 Kukila pa kako, ata sie kine mubanga mwafwile mu bilubo byenu, ni mu aali ya kusitairiwa kwa mubili wenu, Leeza waamilengiizie mwaluke ni bukose pamo ni Yesu. Wene waatweleele bilubo byetu byonse mu buwame, 14 kabili waavutile sheria yonse ibanga yaandikilue na minue, elia ibanga yatupinga. Wene waaifumiizie kupitila kuikonkomena pa kimuti kya mateso.* 15 Kupitila kekio kimuti,* waavuulile buteeko pamo ni buvinde ni kubilangilila ku bantu bonse nangue byaakivindua, ni koku wabitweme nga bantu bakakilue.

16 Pa kako, tekulekelele muntu ata umo amipingule palua kelia kimuli mwalia ni palua kelia kimuli mwamina, ao palua kukonka nsikunkulu ao kusekelela kumoneka kwa mwezi wa lenu ao sie kusekelela sabata. 17 Bebio bintu byene ni kizinzimia kya bintu bya kwiza, inzi kisinka kiine ni kyakue Kristu. 18 Tekulekelele muntu ata umo amipoke kilambu* ata sie kine amwenekele nangue ekeefiizie, kabili nangue akonkele lupupo lwa ba malaika ni koku “waswapiile sana”* bintu byaakimona. Kakiine, ali waitantamuna bila nsambu kukonkana ni mano akue a kimubili. 19 Muntu wa evio, tezi kukwata na maka ku mutue, i kulanda, tezi kukwata kuli olia ali waupeela mubili onse bintu byuli nao lazima, olia ali walengia biungo byonse bikwatane, kabili kupitila wene, Leeza ali mukulengia mubili onse ukule.

20 Kine mwaafwile pamo ni Kristu kukonkana ni bintu bya musinzi bya kyalo, ale juu ya ki mwikeele nga evelia mwe bakili sie semu ya kyalo kupitila kuya mwanakila ezi sheria: 21 “Te kutwama, te kutompa, te kukumia”? 22 Bebio bintu byene ni malaizio sie, kabili byene ni masambilizio a bantu palua bintu bili byaliiwa ni kuminua na bantu, kisia bili byapita. 23 Ata sie kine kukita bebio bintu kuli kwamoneka kuya kwali kwa mulangue mu lupupo lwa kwitungila ni kwikeefia kwa bufi, pamo ni kuutesa mubili, bebio bintu tebizi kukwasia kulwisia tama ya mubili.