Yaandikilue na Marko
14 Ozu musita, kubanga kwasyele nsiku ibili ntanzi Pasaka ni Nsikunkulu ya Mikate Isiliko Levire ifike. Kabili, bakulu ba ba makoani ni ba kalemba ba sheria baali bakeba vya kumukwata Yesu mu bukengezi* ni kumwipaya; 2 pantu baali balanda evi: “Te kunti tumukwate ku nsikunkulu; pange bantu kunti bakita kinvulunghania.”
3 Kabili, lwabanga wali ku Betania wali mukulia* mu nsesi yakue Simoni olia waakosiiziwe bulwele bwa bukoma, mwanakazi umo waaizile watweme lichupa lya alabasta lyalimo mafuta ali anunkila bwino. Azo mafuta abanga ali a nardo* ya kisinka, a bei ikata sana. Waaizwile lichupa lya alabasta ni kutendeka kwitila mafuta ku mutue wakue Yesu. 4 Bamo lubaamwene evio, baabambile kulanziana evi bauzikile: “Ale juu ya ki aza mafuta ali anunkila bwino ainoonua kya mpuni? 5 Pantu aza mafuta ali anunkila bwino akisia kusisiiwa mu bei ikilile pa dinari* mia itatu (300) ni azo makuta apeelua bapabi!” Baamufiitiilue* sana ozo mwanakazi. 6 Inzi, Yesu waalandile evi: “Muleke mwine. Juu ya ki muli mukukeba kumwemia? Wene wankitila kintu kiweme. 7 Pantu, lyonse bapabi muli nabo, kabili kunti mwabakitila bintu biweme musita onse umwatona, inzi temukaba kuya mwali ni nene lyonse. 8 Ozu mwanakazi wakita kelia kili mu buvinde bwakue; wene waitilila mbela ku mubili wane aza mafuta ali anunkila bwino, juu ya kuteania kuziikua kwane. 9 Namyana kakiine nangue, konse kwakasimikilua ezi mpunda iweme mu kyalo kyonse, keki kyakita ozu mwanakazi ni kyene kyakaba kyalandua evi kumulanguluka.”
10 Kisia, Yuda Iskariote, umo wa pa batumua likumi na babili (12), waaile ku bakulu ba ba makoani evi amubiike mu minue yabo. 11 Bakulu ba ba makoani lubaaunvwile kelia kyaalandile Yuda, baaunvwile makola, kisia baamulaile kumupeela makuta. Pa kako, waabambile kukeba nzila ya kunti amubiike mu minue yabo.
12 Mu busiku bwa kwanza bwa Mikate Isiliko Levire, musita bantu lubabanga bazoweye kwipaya nama wa Pasaka, basambi bakue baamwipuziizie evi: “Ni kupi kuutonene tuye tukuteaniizie kyakulia kya Pasaka?” 13 Pa kako, waatuminepo basambi bakue babili, wabalanda evi: “Endo mwaye mu muzi ukata, kabili mwalalume umo ali kuya watweme katondo ka menda ali kuya kusaakaana ni mwemue. Muye mumukonke, 14 kabili lwali kwingila mu nsesi, mumulande evi mwine nsesi, ‘Mwalimu walanda evi: “Kiyumba kya baeni kya kunti ndiilemo Pasaka pamo ni basambi bane kili kupi?”’ 15 Ali kuya kumilangilila kiyumba kikata kya ku muulu. Kekio kiyumba kili kuya kyalimo bintu bya kunti tuye tubombie. Mututeaniizie kyakulia kya Pasaka.” 16 Pa kako, basambi baaile, baaingiile mu muzi ukata ni kusanga bintu byali sie nga vibaaninue na Yesu, kabili baateaniizie Pasaka.
17 Luyaalukile kyungulo sana, Yesu waaizile pamo ni batumua bakue likumi na babili (12). 18 Lubabanga baikeele ku meza bali mukulia, Yesu waalandile evi: “Namyana kakiine nangue, umo pakati kenu olia ali mukulia pamo ni nene ali kumbiika mu minue ya balwani bane.” 19 Batumua baaunvwile bulanda ni kubamba kumwipuzia evi umo-umo: “Ati, ni nene?” 20 Yesu waabalandile evi: “Ni umo wa pa batumua likumi na babili (12), olia ali mukutobezia pamo ni nene mu ezi nsaani. 21 Pantu Mwana mwina muntu ali mukuya nga vilandile Malembo pa lwakue. Inzi, bulanda ku muntu olia wamubiika Mwana mwina muntu mu minue ya balwani bakue! Kabenge ozo muntu taavyelue, kyaasiile kuya kyaweme sana.”
22 Lubabanga batwaliliile kulia, Yesu waabuulile mukate, wamutasia Leeza, waumokola ni kubapeela, walanda evi: “Twame mukate; ozu ulangiliile mubili wane.” 23 Kabili waatemwine kikombe kya divai, wamutasia Leeza, kisia waabapeele batumua, ni bonse baamininemo. 24 Yesu waabalandile evi: “Keki kilangiliile ‘milopa yane ya mapatano’ elia yakaba kwitilua juu ya bantu bengi. 25 Kakiine, namyana nangue nsikaminapo ata limo divai ya mizabibu, mpaka bolia busiku bunakamina yali ya lenu mu Bukolo Bwakue Leeza.” 26 Ku mwisio, lubaapwile kwimba nghimbo ya kumutasia Leeza, baafumine ni kuya ku Lupili lwa Mizeituni.
27 Kabili, Yesu waabalandile evi: “Mwe bonse muli kunsia, pantu Malembo ali alanda evi: ‘Nakavipula musungi, ni mikooko yakasalanghana.’ 28 Inzi, kisia kufufulua, nakaba kumitangilila ku Galilaya.” 29 Petro waamwasukile evi: “Ata sie kine baaba bange bonse bali kukusia, nene bila.” 30 Kisia, Yesu waamulandile evi: “Kakiine nakwana nangue lelo, een, onu wenka musita wa busiku ntanzi kazenze tekanabike mara ibili, uli kuya kunkaana mara itatu.” 31 Petro waakonkobeziizie walanda evi: “Kine mpalile kufua pamo ni wewe, nsiya kukukaana ata kanini.” Kabili, bange bonse baabambile kulanda evio vyenka.
32 Pa kako, baafikile ku fwasi yaali yakuutua Getsemane, kisia waabalandile evi basambi bakue: “Ikale panu, lundi kuya napepa.” 33 Yesu waamutweme Petro, Yakobo ni Yoane, ni kuya nabo. Kisia, waabambile kwemooka sana mu mano ni kuvulunghana sana. 34 Waabalandile evi: “Naunvua* bulanda sana, nga nene umiine kufua. Mwemue syale panu, kabili twalilile kukesia.” 35 Waaile pa ntanzi kakanini, waafukeeme pansi ni kubamba kupepa walanda nangue, kine kyakitika, bobu bwezio bupitile kule ni wene. 36 Kisia, waalandile evi: “Abba,* Baba, bintu byonse bili byavindikana kuli wewe; fumia keki kikombe pali nene. Kakiine, te kunti kikitike nga vintonene, inzi nga viutonene.” 37 Yesu waabwelele ni kubasanga baonene, kisia waamulandile evi Petro: “Simoni, uli mukoona? Eba, waanduanga kupata maka a kutwalilila kukesia nsa imo? 38 Twalilile kukesia ni kupepa mukeeza kwingila mu bwezio. Kakiine, mutima utonene, inzi mubili utope.” 39 Kabili, Yesu waaile ni linge ni kupepa walanda sie bintu byenka belia. 40 Waabwelele kabili, ni kubasanga baonene pantu menso abo aali afinine sana na tulo. Pa kako, te baamwene kya kumwasuka. 41 Kisia, Yesu waabwelele lya butatu ni kubalanda evi: “Emue, musita nga onu mwemue kuya mwaonene ni kutuuzia! Lekele koona! Nsa yakumana! Mone! Mwana mwina muntu ali kubiikua mu minue ya bantu ba mazambi. 42 Buuke, twende. Mone! Olia wa kumbiika mu minue ya balwani bane wapalama.”
43 Penka papo, lwabanga wakilanda sie, Yuda, umo wa pa baalia batumua likumi na babili (12), waafikile wali pamo ni bantu bengi batweme bipanga ni tupini. Babo bantu baali batuminue na bakulu ba ba makoani, ba kalemba ba sheria ni bantu bakotele. 44 Olia wa kumubiika Yesu mu minue ya balwani bakue, waabapeele alama, walanda evi: “Olia undi kuya kuuma beze, i wenka, muye mumukwate ni kumukaka, kabili, muye mumutwame mwamusungile bwino akabutuka.” 45 Yuda waaizile walungheeme mpaka kuli Yesu ni kumupalama, walanda evi: “Rabi!” kisia waamuumine beze. 46 Kisia papo, baamukwete Yesu ni kumutwama. 47 Inzi, umo wa pa baalia babanga baaimeene pepi waasomwene kipanga kyakue ni kumukoma mubombi wakue koani mukulu ni kumusempa kutui. 48 Inzi, Yesu waabalandile evi: “Eba, mwaiza kunkwata mwatweme bipanga ni tupini nga mwemue bali mukuya kumukwata kabooko? 49 Kila busiku nakiba nali pamo ni mwemue mu ekalu nali mukusambilizia, te mwaakiza kunkwata ni kuntwama. Inzi, bebi bintu byakitika juu ya kufikilizia Malembo.”
50 Kisia, basambi bonse baamusiile ni kubutuka. 51 Inzi, mulumendo umo olia abanga wavwele sie ngubo ya kitani kyaweme ku mubili wakue, waabambile kumukonka Yesu lwa pepi, kisia bantu baaeziizie kumukwata, 52 inzi waasiile ngubo yakue ni kubutuka wali bwamba.*
53 Kisia, baamutwele Yesu kuli koani mukulu; kabili bakulu ba ba makoani, bantu bakotele ni ba kalemba ba sheria bonse baakolongheene pamo. 54 Inzi Petro, wali lwa kule, waamukonkele mpaka wafika mu musolo wakue koani mukulu; kabili abanga waikeele pamo ni babombi ba ku ezio nsesi wali mukonta mulilo watutuukile. 55 Bakulu ba ba makoani ni Sanedrini yonse babanga bakeba busininkizio pa lwakue Yesu evi bamwipaye, inzi, te baapatile ata bumo. 56 Kakiine, bantu bengi babanga baleta busininkizio bwa bufi pa lwakue Yesu. Inzi, busininkizio bwabo bubanga bwapuseene. 57 Ni bange babanga baimana ni kuleta busininkizio bwa bufi pa lwakue, balanda evi: 58 “Twaakimunvua walanda nangue, ‘Nene nakaba kutuuta ezi ekalu yaaimikilue na minue ya bantu, ni mu nsiku itatu nakaba kwimika inge isikaba kwimikua na minue ya bantu.’” 59 Ata sie kine babanga balanda evio, busininkizio bwabo bubanga bwapuseene.
60 Kisia, koani mukulu waaimeene pa bukata bwabo ni kumwipuzia Yesu, walanda evi: “Te uli mukulandapo ata kantu? Baaba bantu bali mukusininkizia ki pa lobe?” 61 Inzi, Yesu waasyele sie wataleele, kabili taasukilepo ata kantu. Koani mukulu waabambile kabili kumwipuzia evi: “Eba, uli Kristu Mwana mwina Olia Apaalilue?” 62 Yesu waasukile evi: “Een, i nene wenka; kabili, mwakamumona Mwana mwina muntu waikeele ku kuboko kwa kulio kulumine kabili wali mukwiza pamo ni malezi a mu muulu.” 63 Koani mukulu lwaaunvwile evio, waazabwile maubo akue, ni kulanda evi: “Eba, tuli ni lazima kabili ya bantu bange ba kusininkizia? 64 Mwaiunvwila kale vyali mukumufuupula Leeza. Ale mwemue mwapingula syani?”* Bonse baapingwile nangue apalile kwipaiwa. 65 Kisia, bamo baabambile kumutiila mate, kabili baamuvimbile ku menso, bamuuma ma ngumi ni kumulanda evi: “Kine uli nabi,* ale tubwile kine nani wakuuma!” Kisia kumuuma mapi ku menso, balinzi baamutweme.
66 Ozo musita, Petro lwabanga wali mu musolo mwinsina, umopo pa babombi banakazi bakue koani mukulu waaizile. 67 Lwaamumwene Petro wali mukonta mulilo, ozo mwanakazi waamukentele sana ni kulanda evi: “Ni wewe wakiba wali pamo ni ozu Yesu wa ku Nazareti.” 68 Inzi, Petro waakeene, walanda evi: “Ao sie nsimumanine, kabili nsyunvwile kine uli mukulanda ki.” Kisia, Petro waafuminepo ni kuya ku fwasi ya kwingililako mu musolo. 69 Lwabanga wali koko, olia mubombi mwanakazi waamumwene ni kubamba kabili kubabwila evi baalia babanga baimeene pepi nakue: “Ozu ni wene, musambi wakue.” 70 Petro waakeene kabili. Kisia musita unini, baalia babanga baimeene pepi baabambile kabili kumulanda evi Petro: “Kakiine, wewe uli umo wabo, pantu kulanda kisinka, wewe uli wa ku Galilaya.” 71 Inzi, waabambile kwilainia ni kulapa walanda evi: “Emue, ozu muntu umuli mukulanda, nene nsimumanine!” 72 Penka papo kazenze kaabikile lya bubili, ni Petro waalangulukile milandu ibaamulandile kuli Yesu nangue “Ntanzi kazenze tekanabike lya bubili, uli kuya kunkaana mara itatu.” Waandilue kwizuia, kisia waabambile kulila.