Mukanda wa Kwanza ku Bakorinto
3 Mwe ba lupua, nsyaavindile kumilanzia nga nene ali mukulanda na bantu ba kimupasi, inzi nga nene ali mukulanda na bantu ba kimubili, nga nene ali mukulanda na baalia bakili sie baana mu kiketekelo kya Kikristu. 2 Naamipeele* mabele, apana kyakulia kilumine, pantu maka enu abanga akili anini. Kakiine, ata sie lonu temunaaluke na maka atosiizie. 3 Mwemue mukili sie bantu ba kimubili. Pantu pakati kenu pali bwivu ni kukankabula, eba kekio te kilangiliile nangue muli mwakita sie nga bantu ba mu kenu kyalo? 4 Pantu, kine umo ali walanda nangue “Nene ndi wakue Paulo,” inzi unge ali walanda nangue “Nene ndi wakue Apolo,” eba te muli mukukita sie nga bantu ba mu kenu kyalo?
5 Ale Apolo nani? Ni Paulo nani? Fwefue tuli sie babombi baalia baamikwasiizie kuzumina. Twaakitile sie kelia kitwaalandilue na Mulopue. 6 Nene naabyele lubezu, Apolo waaitiliile, inzi Leeza i waalengiizie lukule. 7 Olia ali wabyala ni olia ali waitilila te ba mana, inzi wa mana ni Leeza olia ali walengia lukule. 8 Olia ali wabyala ni olia ali waitilila bali babomba mu kimo,* kabili kila umo wakapaalua kukonkana ni miilo yakue. 9 Fwefue tuli twabomba pamo ni Leeza, mwemue muli nga bukaba bolia buli mukulimua na Leeza, kabili muli nga kikuulua kelia kili mukukuulua na Leeza.
10 Kupitila kubombia bupe bunaapeelue na Leeza, naabiikile musinzi nga mukulu wa miilo ya kukuula olia ali ni bufundi.* Lonu, kuli muntu unge ali mukukuula pa ozo musinzi. Inzi, kila muntu apalile kuya wakentele vyali mukukuula pa ozo musinzi. 11 Leeza waamubiikile Yesu Kristu evi aye wali musinzi, pa kako te kuli muntu ata umo ali kubiika musinzi unge onse. 12 Muntu umo kunti wakuula pa musinzi kupitila kubombia oro, mabue a nfalanga, mabue a bei, bimuti ao bikusi byume bipusene-puseene. 13 Inzi ku mwisio, miilo ya kila muntu yakalangililua viili, pantu busiku bwa kweziiwa bwakailangilila. Yakafiikulua na mulilo; mulilo wakalangilila kine miilo elia yaakikita kila muntu ni ya syani. 14 Kine kelia kyaakikuula muntu pa ozo musinzi kyatwalilila kuya kyaimeene, wene wakapaalua.* 15 Kine miilo ya muntu ali onse yazia, ozo muntu wakaba kuzezelua. Ata sie kine wene wakaba kupususiiwa, kyakaba kuya kyali nga evelia kupusuka ku mulilo.
16 Eba, te mumanine nangue mwemue muli ekalu yakue Leeza, kabili nangue mupasi wakue wikeele muli mwemue? 17 Kine muntu onse wainoona ekalu yakue Leeza, Leeza wakaba kumwinoona, pantu ekalu yakue ni itakatifu, kabili mwemue i ezio ekalu.
18 Muntu te kunti ebepe: Kine umo pakati kenu emwene nangue ali ni mulangue mu kenu kyalo,* muleke aaluke kipuba evi akabe kwaluka ni mulangue. 19 Pantu pa menso akue Leeza, mulangue wa kenu kyalo ni bulubi, nga vilandile Malembo nangue: “Wene ali wabakwata baalia bali ni mulangue mu bukengezi bwabo bene.” 20 Kabili Malembo ali alanda nangue: “Yehova* amanine nangue mawazo a bantu ba mulangue ni a bule.” 21 Kansi, muntu ata umo te kunti aye waitasia palua belia bili kuvinda kukita bantu, pantu bintu byonse ni byenu, 22 ibe ni Paulo, ao Apolo, ao Kefa,* ao kyalo, ao bukose, ao lufu, ao bintu biliko lonu, ao bintu belia byakaba kwiza, byonse ni byenu. 23 Ni mwemue muli bakue Kristu; Kristu ni wene, wakue Leeza.