Mukanda wa Kwanza ku Bakorinto
4 Bantu bapalile kutumona kuya twali babombi* bakue Kristu, baalia baapeelue siri itakatifu yakue Leeza. 2 Babombi* ba evio, bapalile kuya bali ba kisinka. 3 Lonu, te kya mana kuli nene kutoosiiwa na mwemue ao na tribinali ya bantu. Kakiine, ata sie ne mwine nsizi kwitoosia. 4 Nsimwene nangue kuli ni kintu kibipile kinaakikita, inzi kekio te kisininkiziizie nangue ngolokele. Yehova* i ali wantoosia.* 5 Pa kako, tekupingule kantu ata kamo ntanzi ya musita upalile, mpaka Mulopue akabe kwiza. Wakabileta mu mwangaza bintu bya siri bya mu kafinzi, kabili wakalengia bintu bili ku mutima wa kila muntu bikamanike. Kisia, kila muntu wakatasiiwa na Leeza kukonkana ni vyapalile.
6 Mwe ba lupua, naakibombia bebi bintu pa lwane ne mwine ni pa lwakue Apolo juu ya faida yenu, evi musambilile ezi sheria kupitila fwefue: “Tekupitilile pa bintu byandikilue,” evi te kunti mwaluke ni kibuli ni kutonesiapo muntu umo kuliko unge. 7 Nani waakikulengia uye wapuseene ni muntu unge? Ni kiki kyukwete kakiine kelia kyusyaapeelue? Kine kakiine wewe waapeelue, ale juu ya ki uli mukwitantamuna nga evelia we asyaapeelue?
8 Eba, mumwene nangue mukwete kila kintu kimuli nakio lazima? Eba, mumwene nangue mwaakinonka kale? Eba, mwaakitendeka kuteeka mwali ba makolo bila fwefue? Kunti natona sana kine mwaakitendeka kuteeka mwali ba makolo, evi ni fwefue tuvinde kuteeka pamo nenu. 9 Kimwenekele nangue twaakyaluka nga kilangililo kya kukentelelua na kyalo, bantu ni ba malaika. Leeza waakindekelela nene pamo ni batumua bange evi twaluke ba mwisio kulangililua nga bantu bapingwilue kufua. 10 Tumwenue kuya twali bilubi juu yakue Kristu, inzi mumwene nangue mwemue muli ni mulangue muli Kristu. Fwefue tumwenekele kuya twali batope, inzi mwemue mumonekele kuya mwali ni maka. Mwemue mupeelue mukinzi, inzi fwefue te tukindikilue. 11 Mpaka lonu, tutwaliliile kuya twali ni nzala, twaunvwile kyaka, kabili te tukwete maubo atosiizie a kuvwala,* tuli twaumua,* kabili te tukwete masesi. 12 Tuli twabomba sana na maboko etu fwe bene. Lutuli twatukua, tuli twapaala. Lutuli twatesua, tuli twasipikizia twapembeleele. 13 Musita utuli twabepelua, fwefue tuli twaasuka twafuukile;* tutwaliliile kumonua nga busapia bwa kyalo, nga bikukilizi bya bintu byonse.
14 Nsili mukwandika bebi bintu evi kumimonia busoni, inzi ndi mukukeba kumisoka nga baana bane batonua. 15 Ata sie kine kunti mwaaluka ni basungi* elufu likumi (10 000) muli Kristu, kakiine te mukwete ba baba bengi; pantu naakyaluka baba wenu muli Kristu Yesu kupitila kumiletela mpunda iweme. 16 Pa kako, namikinkizia muye mwakonka mufuano wane.* 17 Kekio i kyalengia nene mulande Timoteo eze kuli mwemue. Wene ni mwana wane mutonua, kabili wa kisinka muli Mulopue. Wakaba kumilangulusia nzila indi nabombia evi kukita belia bitonene Kristu Yesu ni kulangulusia belia bindi nasambilizia fwasi yonse mu kila kilonghaano.
18 Bamo pakati kenu bali mukwaluka ni kibuli kusia ne asikaba kwiza kwenu. 19 Inzi, kine Yehova* watona, nakaba kwiza kwenu lenu sie. Kine naiza, nsikaba kupoza mano ku kumana milandu ya baalia bali ni kibuli, inzi nakaba kwiza kumana maka abo. 20 Pantu, Bukolo Bwakue Leeza te buli mu milandu, inzi buli mu maka. 21 Eba, mutonene ki? Ngize koko kwenu natweme nfimbo ao nali ni ntono ni mutima ufuukile?