Mukanda ku Baefeso
6 Mwe baana, muye mwabanakila* bavyazi benu mu buumo ni Mulopue, pantu kekio kyolokele pa menso akue Leeza. 2 “Mukindike baba obe ni mama obe,” pantu azo i malaizio a kwanza akwateene ni bulayo: 3 “Evi bintu biye byakuwamiine, kabili evi wikale musita waleepele pa kyalo.” 4 Ni mwe ba baba, tekuye mwabasokozia baana benu,* inzi twalilile kubakuzia kupitila kubalapizia ni kubasambilizia* kukonkana ni vitonene Yehova.*
5 Mwe bazia, muye mwabanakila bantu bamuli mwabombela,* mwabatiina ni kututuma mu kisinka kufuma ku mitima yenu nga kuli Kristu; 6 tekuye mwakita sie evio musita umumwenue na bange juu ya kusansamusia sie bantu,* inzi muye mwakita evio nga bazia bakue Kristu bali mukukita kutona kwakue Leeza kwa mweo* onse. 7 Muye mwabomba mwali ni mawazo aweme nga mwemue bali mukubombela Yehova,* apana bantu, 8 pantu mumanine nangue kila kintu kiweme kelia kili kyakita muntu, Yehova* wakamulipa kyenka kekio, ata sie kine aye wali muzia ao muntu ali uru. 9 Kabili, mwe bali babombelua,* twalilile kubakitila bazia mu enka ezio nzila, bila kuya mwabatutumia, pantu mumanine nangue bene pamo ni mwemue muli sie na Mulopue umo ku muulu, kabili wene tezi kusaakwila.
10 Kupwako, twalilile kupata buvinde kufuma kuli Mulopue kupitila maka akue akata. 11 Vwale bintu bya kulwaninako bikumeene kufuma kuli Leeza evi muvinde kwimana sinta ni kupinga bintu bya bukengezi bili byakita* Kibanda; 12 pantu tuli mukuluana,* apana na milopa ni nama, inzi tuli mukuluana na buteeko, na baalia bali ni buvinde, na ba kateeka ba kenu kyalo kya nfinzi, na maka a mipasi ibipile elia ili mu fwasi ya ku muulu. 13 Pa kako, twame bintu bya kulwaninako bikumeene kufuma kuli Leeza, evi muvinde kulwisia mu busiku bwaviizie ni kwimana sinta kisia kufikilizia kila kintu.
14 Pa kako, imane sinta mwaikakile musipi wa kisinka mu kitungu kyenu, ni koku mwavwele kivwalo kya kwikingilila pa nkulo, i kulanda, kukita bintu byolokele pa menso akue Leeza, 15 kabili muye mwavwele bilato ku makasa enu bya kuya mwaiteaniizie kusimikila mpunda iweme ya mutende. 16 Kukila pa bebio byonse, twame kisoolelo* kya kiketekelo, kelia kimwakaba kuvinda kuzimiiziako mivui yonse ileemene yakue mubifi. 17 Kabili, vwale kisote kya kyuma kya bupusuko ni kipanga kya mupasi, i kulanda, mulandu wakue Leeza, 18 ni koku mwapepa kila musita mu mupasi kupitila mapepo a kila namuna ni mapepo a kumulilila Leeza. Pa kako, twalilile kuya mwakentele ni kuya mwamulilila Leeza lyonse mu mapepo palua batakatifu bonse. 19 Muye mwapepa kabili ni pa lwane juu ya kunti ngiye napeelua milandu ya kulanda musita undi naizula kanua kane, evi ngiye navinda kulanda nasipile musita undi nalengia siri itakatifu ya mpunda iweme imanike, 20 elia indi nabombelapo nga mukenzi* akakilue mu mikufu. Kabili, pepe kuli Leeza juu yane evi ndande mpunda iweme nasipile nga vimpalile kukita.
21 Lonu, Tikiko lupua mutonua, kabili mubombi wa kisinka muli Mulopue, wakaba kumibwila palua bintu bindi mukukita ni palua bukose bwane. 22 Namutuma koko palua enka ezio nsambu evi mumane vituli, kabili evi akoselezie mitima yenu.
23 Kansi, mutende, ntono, ni kiketekelo kufuma kuli Leeza Baba, ni kuli Mulopue Yesu Kristu biye byali pa ba lupua. 24 Buwame bwakue Leeza* buye bwali pamo ni baalia bonse bali ni ntono isizi kwinooneka pa lwakue Mulopue wetu Yesu Kristu.